9
Uma a̱ shika̱i unushi u le
A kanna ka kamanga n ka̱na̱shi ko wotoi u cindere wa, aza a Isaraila o ɓolongi a ya'in kakuli ɗa a ukai akashi o ntogu, a̱ tsungi kokomo aci e le. Ɗa aza a Isaraila e pecei ka̱ci ka̱ le kau n omoci a, ɗa a̱ shika̱i unushi u le n unushi wi ikaya i le. Ele lo kashani a̱ ubuta̱ u na i, ɗa a ya'in iyim i tatsu e kukece ke le katagarda ka̱ wila̱ ka Vuzavaguɗu Ka̱shile ke le. Ɗa kpamu a ya'in iyim i tatsu ele a̱ kushika̱ unushi u le, n ya'ankai Vuzavaguɗu Ka̱shile ke le a̱ga̱nda̱. Ɗa aza e Levi a shamgbai a gaɗi vu kirukpa ku na a ya'ankai le. A̱ ka̱tsuma̱ ke le, ele ɗa Jesuwa m Bani n Kadimiyelu n Shebaniya m Buni n Sherebeya m Bani n Kenani. Ɗa a ya'in kavasa n ka̱la̱ka̱tsu ka utsura u Vuzavaguɗu Ka̱shile ke le. Ɗa aza e Levi a nanpa a, anan Jesuwa n Kadimiyelu m Bani n Hashabiya n Petahiya, a shamgbai kashani e ɗekei uma a danai,
<<Ɗa̱nga̱i kashani i cikpa Vuzavaguɗu Ka̱shile ka̱ ɗa̱,
Ka̱shile ka̱ ɗa̱ ka na ki n ugiti ba kpamu ki n uteku ba.
Ucikpi a kubana u kula ku gbayin ku nu,
kula ku na ku la'i n una̱singai n ucikpi.
<<Vuzavaguɗu avu ɗa ende'in, avu ɗa vuza na vu ya'in gaɗi, n a̱da̱nga̱ a̱ Ka̱shile n azangata a gaɗi. Avu ɗa kpamu vu ya'in iɗika n ili i na yi punu a i ɗa. Avu ɗa vuza na vu ya'in mala n ili i na yi punu. Avu ɗa vuza na vu ya'in wuma ra̱ka̱. Ɗa kpamu ili i wuma i gaɗi yi a kuya'anka wu a̱ga̱nda̱. Vuzavaguɗu Ka̱shile, avu ɗa vu zagbai Aburam. Vu uta̱ka̱ ni a iɗika i Ur vu Kalidiya, ɗa vu saba'i ni kula Ibirahi. Vu ene yi ta̱ wi ta̱ n ka̱ɗu ka singai wa̱ a̱ nu, ɗa vu ya'in uzuwakpani n a̱yi vi ta̱ e kuneke ntsukaya n ni iɗika ya aza a Kana'ana n aza a Hitiya n aza a Amoriya n aza a Periziya n aza a Jebusiya n aza a Girigeshiya. Vu shatangu ta̱ kadanshi ka̱ nu, adama a na avu vuza vu usuɓi ɗa.
<<Vu ene ta̱ atakaci a ikaya i tsu a iɗika i Masar, ɗa kpamu vu panai ma̱shi me le a̱ ka̱kina̱ ka mala mashili. 10 Vu ya'an ta̱ i li mereve n a̱bunda̱i a̱ ubuta̱ u mogono Firi'auna koɓolo n nkoshi n gba̱ra̱-gba̱ra̱ ma ulinga u ni, n uma a iɗika i ni, adama a na vu yeve ta̱ tsu na o doroi ikaya i tsu. Ta vu ya'in kula nannai, kula ku na vi n kuɗa ali ananna. 11 Vu pecei mala kure a̱ a̱shi ikaya i tsu, ɗa a walai punu a mere ma mala ma a iɗika i ɗekpu. Ɗa vu ni'wa̱ta̱ngi aza a na i o kutono le a mala ma, tsu na katali ka̱ tsu ni'wa̱n a mala. 12 N kanna vu wala ta̱ kelime ke le n kabashi ke keleshu adama a na u yotsongu le uye, n kayin tamkpamu vu wala ta̱ e kelime ke le n kabashi ke keleshu ka kutashi ka akina adama a na wa akana ka le ubuta̱ u na i a kubana. 13 Ɗa vu cipa̱i a kusan ku Sinai, ɗa vu ya'in kadanshi n ikaya i tsu ɗe. Vu nekei le wila̱ n ili i kutono n kuyotsongusu ku singai ku nu. 14 Ɗa vu yotsongi le e yeve kanna ka ciɗa ka ashibi, ka̱ta̱ o tono ka'a mayin, ɗa vu nekei le wila̱ u nu n kadanshi ka̱ nu n ili i kutono u kagbashi ka̱ nu Musa. 15 Ana kambulu ka̱ ka̱na̱i le, ɗa vu nekei le mana, kpamu ana a panai kakuli ɗa vu nekei le mini ma na muta̱i a ka kpanlai, ɗa vu danai le a bana a lya'a uka̱ni wu iɗika ya, ka̱ta̱ yo okpo yi uka̱ni i le i na vu kucinakai le.
16 <<Ama ikaya i tsu a ya'in a̱ra̱ɗi n ugbamukaci, ɗa a̱ kpa̱ɗa̱i kutono wila̱ u nu. 17 N ili mereve i na i na vu ya'an ki le, ɗa a cinukpai n i ɗa. Ɗa a ya'in ugbamukaci, ɗa kpamu a̱ kpa̱ɗi kupana ukuna, a ugbamiwasuvu u le, ɗa a̱ la̱nsa̱i vuza kelime vu na u kubonoko le a iɗika i tsugbashi a Masar. Ama avu Ka̱shile ka kucinukpa unushi ka'a, vuza va asuvayali n ka̱sa̱'a̱, kpamu vu tsu ya'an wupa gogo ba, vuza vu ucigi u na wi a kusaba'a ba. Avu Ka̱shile vu varuku le ba. 18 Ko ana a ya'ankai ka̱ci ke le ka̱ma̱li ka viyum ki iyoci i medendem, ɗa a danai, <Na ɗa Ka̱shile ka na ka̱ utuka̱i tsu a iɗika i Masar,> Na lo kugoyi ku ɗa a ya'ankai nu Vuzavaguɗu. 19 Ama vu varuku le a meremune ba, adama a asuvayali a̱ bunda̱i a̱ nu. Kabashi ke keleshu ka̱ ka̱sukpa̱ kutono le n kanna ba, kpamu kabashi ka akina ka̱ ka̱sukpa̱ ku akana ka le uye n kayin ba. 20 Vu nekei le Ayinviki a singai a na o kuyotsongu le, vu kpaɗa̱ ku neke le ilikulya'a i mana ba, ko tana vu sa̱nga̱ le mini ɗa baci a panai kakuli ba. 21 A̱ya̱ amangere avu a̱ kula̱na̱ le e meremune, a namba ili ba, ntogu n le n kporo ba, ene ele kpamu a shitasa ba.
22 <<Ɗa vu nekei le tsugbayin n uduniya kakau, ɗa vu pecekei le iɗika. Ɗa a lya'i iɗika i Heshibon i mogono Sihon n kuvon, n iɗika i Bashan i mogono Ogu. 23 Ɗa vu zuwai muku n le n yimkpa tsu azangata a gaɗi. Ɗa vu tukai le a iɗika i na vi ya'in uzuwakpani vi ta̱ e kuneke ikaya i le. 24 Ɗa ntsukaya n le n uwai a lya'i uka̱ni wi iɗika i Kana'ana, ɗa vu lyai le melentsu vu bana vu lya'i irala i le n kuvon. Ɗa vu nekei aza a Kana'ana ekiye e le, nu ngono n uma a iɗika ya dem adama a na a ya'anka le tsu na a cikalai. 25 Uma a̱ nu isa ta̱ likuci yi ukanji, n iɗika i na yi n tsuta̱ ka̱u. Ɗa isai i'uwa n ili i singai-singai i na yi punu n ayinva a na a̱ ga̱va̱i ɗe n ashina a itacishi nu nɗanga n zaitu nu nɗanga ma̱ umaci n a̱bunda̱i. Ɗa a lya'i, a̱ cuwa̱i, ali ɗa aya'in i kyamba, ɗa a panai uyo'o wi ili singai i na avu vu ya'ankai le gbani.
26 <<Ama ɗa a̱ kpa̱ɗa̱i kupana a ya'in ugbamukaci, ɗa a vadalukpakai wila̱ u nu kucina̱. Ɗa unai eneki a̱ nu, aza a na odokushi le o bono wa̱ a̱ nu. Nannai ɗa a ya'ankai nu unushi wa̱ a̱bunda̱i. 27 Adama a nannai ɗa vu nekei le ekiye a irala i le aza a na a takacikai le. A̱ ka̱tsuma̱ ka atakaci e le, ɗa a̱ tuka̱i nu n ma̱shi me le, ɗa tana vu panakai le ɗe gaɗi, vu panai asuvayali e le ɗa vu suki aza a na a isai le ekiye a irala i le. 28 Ama a makyan ma na a̱ ciya̱i wuvuki, ɗa o doku a ya'in kagbanigbani a̱ a̱shi a̱ nu. Ɗa vu nekei le ekiye a irala i le, a lya'akai le tsugono. N nannai dem, a na a̱ ta̱wa̱i n ma̱shi me le wa̱ a̱ nu, ɗa vu panakai le ɗe gaɗi, a makyan dem vu tsu isa le ta̱ adama a ucigi wa̱ a̱bunda̱i u nu. 29 Vu ɓarangu le ta̱ adama a na o bono o tono wila̱ u nu, ama ɗa a ya'in ugbamukaci a iwain kutono wila̱ u nu, a ya'in unushi ɗa o goyoi kadanshi ka̱ nu. Ko a na wo okpoi sai vuma u tono wila̱ ɗaɗa u kuciya̱ wuma. Ɗa a ya'in ugbamukaci n ugbamiwasuvu, a iwain kutono kadanshi ka̱ nu. 30 Adama a ucigi u nu, vu yongo ta̱ n e le a̱ya̱ n a̱bunda̱i, vu suki n Ayinviki a̱ nu a ya'ankai le kadanshi a̱ una̱ u eneki a̱ nu. Ama n nannai dem ɗa a iwain kupanaka wu. Ɗa vu doku vu nekei le ekiye uduniya u yoku u lya'akai le tsugono. 31 Ama adama a ucigi u gbayin u nu, vu una le ra̱ka̱-ra̱ka̱ ba. Adama a na avu Ka̱shile vuza va asuvayali ɗa.
32 <<Gogo na Ka̱shile ka̱tsu vuzagbayin, vuza vu tsura vuza vu ili i wovon vuza na u tsu shatangu uzuwakpani, n vuza vu ucigi u na u tsu saba'a ba, ka̱ta̱ vu goyo atakaci a̱ tsu ba. Atakaci a na a̱ ta̱wa̱i wa̱ a̱tsu nu ngono n tsu n aza e kelime a̱tsu n anan ganu a̱tsu n eneki a̱ tsu n ikaya i tsu n uma a̱ nu ra̱ka̱, ili i na i ɗikai a makyan ma ngono ma aza a Asuriya ali a̱ kuta̱wa̱ ayin a nampa. 33 Ama ɗa vu ya'ankai tsu kasingai ni ili i na i ciya̱i tsu ra̱ka̱, vu ya'ankai tsu kamayun ko a na wo okpoi tsu nusaka wu ta̱. 34 Ngono n tsu n aza kelime a̱ tsu n anan ganu a̱tsu n ikaya i tsu o tono kuyotsongusu ku nu ba. A zuwa atsuvu e le a̱ wila̱ u nu ba. Ko feu a panaka kadanshi ka na vu danai le ba. 35 Ko a na wo okpoi a̱ ga̱nda̱ka̱ wu ba a̱ ka̱sukpa̱ kagbanigbani ke le ba. Ko a na wo okpoi i ta̱ n tsugono ci le, kpamu a pana ta̱ uyo'o u kasingai ka̱ nu. Vu nekei le iɗika i tsuta̱ n a̱bunda̱i. 36 La̱na̱ a̱tsu agbashi a ɗa ci, a iɗika i na vu nekei ikaya i tsu, a lya'a umaci wu nɗanga n ili i na yi punu, a̱tsu ɗa na tana agbashi a ɗa. 37 Adama a unushi u tsu, uciyi wa̱ a̱bunda̱i wo okpoi ekiye o ngono n na vu zuwakai tsu, a ikyamba i tsu n ili ku zuwa i tsu, ngono ma a kuya'an tsu na uga'in le. A̱tsu tsu okpoi a̱ ka̱tsuma̱ ka atakaci.
Uma ushuki kutono wila̱ wa
38 <<Adama ili i na i ciya̱i tsu ra̱ka̱, ɗa a̱tsu uma a Isaraila ci a kuya'an uzuwakpani u nampa, kpamu ci a kuɗana u ɗa. Aza e kelime a̱ tsu n aza e Levi n anan ganu a̱ tsu ɗa a zuwai a̱ta̱mba̱ri e le.