MEKECU
Katagarda ke
Kuɓa̱yuwa̱
Katagarda ke Mekecu ka dana ta̱ ukuna u tsumani tsa aza a Isaraila ɗevu n a̱ya̱ amangere, a ayin a na a̱ ka̱sukpa̱i Kusan ku Sinai, ali a kubana a ayin a na a yawai a uɓon u kasana wu uteku u na Ka̱shile ka ya'ankai le uzuwakpani u kuneke le. Kula ku katagarda ka ki ta̱ a kadanshi ki ili i na katagarda ka ki a kudansa mayin, ɗaɗa mekecu ma na Musa u kecei aza a Isaraila a Kusan ku Sinai kafu a laza lo, m Mowabu feu a kasana ke Kuyene ku Urudu wana ɗai tsukaya ci yoku tsu laza. A̱ ka̱tsuma̱ ka ayin e mekecu e re a nanlo, aza a Isaraila a banai a Kadeshi Baniya a uɓon u ɗaka u kure ku Kana'ana. Ama a̱ ubuta̱ wa ɗe a fuɗa a uwa a iɗika yu uzuwakpani ya ba. Ana a ya'in lo a̱ya̱ n a̱bunda̱i a uɓon wa, ɗa o bonoi a kasana ke Kuyene ku Urudu a̱ ubuta̱ u na uma e le o yoku a vaki ɗa aza o yoku tamkpamu o foɓusoi kupasa kuyene ka a kubana a Kana'ana.
Katagarda ke Mekecu ke neke ta̱ kadanshi ka tsumani tsu uma a na ubuta̱ u yoku asuvu a̱ gusa̱i le n wovon adama atakaci. Ka ya'an ta̱ kpamu kadanshi ka uma a na o yongoi a kuya'anka Ka̱shile ugbamukaci m Musa feu, vuma na Ka̱shile ka zagbai adama a na u uka le kelime. Ki ta̱ feu a kadanshi ku uneki u ka̱ɗu u Ka̱shile a kubana u uma a̱ ni n uka̱ni u ka̱ɗu a̱ ubuta̱ u uma a̱ ni ko a na a wo okpoi a tsurukpai ba, ɗa kpamu i n ugbamukaci. Ɗa feu ka ya'in kadanshi ku uka̱ni wa asuvu u Musa a kubana u Ka̱shile koɓolo n ubuta̱ u uma a̱ ni, ko ana wo okpoi makyan mo yoku asuvu a̱ tsu gusa̱ yi ta̱.
Ili i na yi punu udari a katagarda ka nampa
Aza a Isaraila o foɓusoi kuka̱sukpa̱ Kusan ku Sinai (1:1--9:23)
a. Mekecu ma iyain (1:1--4:49)
b. Wila̱ kakau (5:1--8:26)
c. Ka̱ɗiva̱ ka Kupasamgbanai ke ire (9:1-23)
Ili i na i ɗikai a Kusan ku Sinai ali a Mowabu (10:1--21:35)
Ili i na i ya'in ɗe a Mowabu (22:1--32:42)
Kadanshi ka gbati ka nwalu n na a̱ gita̱i a Masar ali a kubana a Mowabu (33:1-49)
Wila̱ kafu a pasa Kuyene ku Urudu (33:50--36:13)
1
Mekecu ma iyain ma aza a Isaraila
1 A kanna ka iyain ko wotoi u ire, a̱ ka̱ya̱'a̱ ke ire ka ayin a na aza a Isaraila a ka̱sukpa̱i Masar, ɗa Vuzavaguɗu u ya'in kadanshi m Musa a Kusan ku Sinai e meremune, a̱ Ma̱va̱li mo Oɓolo. Ɗa u danai,
2 <<Avu n Haruna a̱ɗa̱ ɗa i kukece uma a Isaraila kumaci-kumaci m kpa'a-kpa'a, ka̱ta̱ i ɗana kula ku mavali dem,
3 aza a na a yawai a̱ya̱'a̱ kamanga ko vuza gbayin dem vuza na u kufuɗa ulinga u tsusoji.
4 I folono vuza te a̱ ka̱tsuma̱ ku umaci dem a̱yi na wi kesheku ka kpa'a, a̱ ɓa̱nka̱ ɗa̱.
5 Ula a ali a na a̱ kuɓa̱nka̱ ɗa̱ a ɗaɗa na. A kumaci ku Ruben, Elizu kolobo ka Shedeyu.
6 A kumaci ku Simiyon, Shelumiye kolobo ka Zurishada.
7 A kumaci ku Yahuda, Nashon kolobo ka Aminadabu.
8 A kumaci ku Isaka, Nataniya kolobo ka Zuwaru.
9 A kumaci ku Zabalun, Eliyabu kolobo ka Helon.
10 A kumaci ko olobo a̱ Isufu, n ku Ifirayimu, n ku Elishama kolobo ka Amihudu, n kumaci ka aza a Manasa, Gamaliya kolobo ka Pedazuru.
11 A kumaci ku Bayami, Abidan kolobo ka Gidiyon.
12 A kumaci ku Dan, Ahiyeza kolobo ka Amishada.
13 A kumaci ku Ashera, Pagiyelu kolobo ka Okiran.
14 A kumaci ku Gadu, Eliyasafa kolobo ka Dewuyelu.
15 A kumaci ku Nafutali, Ahira kolobo ka Enanu.>>
16 Nava ɗaɗa ali a na a zagbai a̱ ka̱tsuma ka̱ ka̱tsura̱ dem, aza e kelime e kelentsu ku umaci dem, ele ɗa aza e kelime a kumaci ka a aza a Isaraila.
17 Ɗa Musa n Haruna e ɗekei uma a, aza na e nekei ula e le,
18 ɗa e ɗekei uma a̱ likuci ra̱ka̱ a kanna ku ugiti o wotoi u ire. Ɗa e kecei mavali dem kpa'a-kpa'a n kumaci-kumaci, ula a aza na a yawai a̱ya̱'a̱ kamanga n kapashi. A ɗana le ta̱ ɗa e kecei le.
19 Uteku tsu na Vuzavaguɗu u danai Musa, ta u kecei le nannai ɗe e meremune ma Sinai.
20 I na i ɗikai a kumaci ku Ruben kolobo ku ugiti ki Isaraila. Ali dem aza na a yawai a̱ya̱'a̱ kamanga n kapashi, aza na a yawai kuɗika ulinga u tsusoji a kecei le n ula e le, vuza te-te, u teku tsu na i kumaci-kumaci n kpa'a-kpa'a.
21 Ka̱bunda̱i ka uma ka na e kecei a kumaci ku Ruben ka yawa ta̱ a̱kpa̱n amangere n a̱ ta̱li n amangatawantawun (46, 500).
22 A kumaci ku Simiyon, ali ra̱ka̱ a na a yawai a̱ya̱'a̱ kamanga n kapashi, aza a na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te dem, uteku tsu na i kumaci-kumaci m kpa'a-kpa'a.
23 Ka̱bunda̱i ka uma ka na e kecei a kumaci ku Simiyon, a yawa ta̱ a̱kpa̱n amangerenkupa n kuci n amangatawantatsu (59, 300).
24 A kumaci ku Gadu, ali ra̱ka̱ a na a yawai a̱ya̱'a̱ kamanga n kapashi, aza na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
25 Kabunda̱i ka uma ka na e kecei a kumaci ku Gadu, a yawa ta̱, a̱kpa̱n amangere n a tawun n amangatawa̱nta̱li n amangerenkupa. (45, 650).
26 A kumaci ku Yahuda, ali a na a yawai a̱ya̱'a̱ kamanga n kapashi, aza a na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
27 Ka̱bunda̱i ka uma ka na e kecei a kumaci ku Yahuda, a yawa ta̱ a̱kpa̱n amangatatsunkupa n a̱na̱shi, n amangatawa̱nta̱li (74, 600).
28 A kumaci ku Isaka, ali a na a yawai a̱ya̱'a̱ kamanga n kapashi, aza a na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
29 Ka̱bunda̱i ka uma ka na e kecei a kumaci ku Isaka, a yawa ta̱ a̱kpa̱n amangerenkupa n a̱na̱shi, n amangatawa̱na̱shi (54, 400).
30 A kumaci ku Zabalun, ali a na a yawai a̱ya̱'a̱ kamanga n kapashi, aza a na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
31 Ka̱bunda̱i ka uma ka na e kecei ka kumaci ku Zabalun, a yawa ta̱ a̱kpa̱n amangerenkupa n e cindere, n amangatawa̱na̱shi (57, 400).
32 A kumaci ku Ifirayimu, ali a na a yawai a̱ya̱'a̱ kamanga n kapashi, aza na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
33 Ka̱bunda̱i ka uma ka na e kecei ka kumaci ka Ifirayimu, a yawa ta̱ a̱kpa̱n amangere n amangatawantawun (40, 500).
34 A kumaci ku Manasa, ali a na a yawai a̱ya̱'a̱ kamanga n kapashi, aza na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
35 Ka̱bunda̱i ka uma ka na e kecei ka kumaci ka Manasa, a yawa ta̱ a̱kpa̱n kamangankupa n e re n amangatawenre (32, 200).
36 A kumaci ku Bayami, ali a na a yawai a̱ya̱'a̱ kamanga n kapashi, aza na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
37 Ka̱bunda̱i ka uma ka na e kecei ka kumaci ku Bayami, a yawa ta̱ a̱kpa̱n kamangankupa n a tawun n amangatawa̱na̱shi (35, 400).
38 A kumaci ku Dan, ali a na a yawai a̱ya̱'a̱ kamanga n kapashi, aza a na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
39 Ka̱bunda̱i ka uma ka na e kecei ka kumaci ku Dan, a yawa ta̱ a̱kpa̱n amangatatsu n re n amangatawencindere (62, 700).
40 A kumaci ku Ashera, ali a na a yawai a̱ya̱'a̱ kamanga n kapashi, aza a na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
41 Ka̱bunda̱i ka uma ka na e kecei ka kumaci ku Ashera, a yawa ta̱ a̱kpa̱n amangere n kete n amangatawantawun (41, 500).
42 A kumaci ku Nafutali, ali a na a yawai a̱ya̱'a̱ kamanga n kapashi, aza na a yawai kubana tsusoji ra̱ka̱, e kece le ta̱ ɗa a ɗanai ula e le vuza te-te, uteku tsu na i kumaci-kumaci m kpa'a-kpa'a.
43 Ka̱bunda̱i ka uma ka na e kecei ka kumaci ku Nafutali, a yawa ta̱ a̱kpa̱n amangerenkupa n a tatsu n amangatawa̱na̱shi (53, 400).
44 Nava ele ɗa ali a na Musa n Haruna e kecei koɓolo n aza e kelime kupa n ere a Isaraila, yaba dem wi ta̱ a kashani ka kpa'a ku ni.
45 Nannai ɗa e kecei ali ra̱ka̱ a Isaraila a na a yawai a̱ya̱'a̱ kamanga n kapashi, aza a na a yawai kubana tsusoji, e kece le ta̱ kumaci-kumaci.
46 Uɓolongi u mekecu wa ra̱ka̱-ra̱ka̱ u ɗaɗa a̱kpa̱n amangatawa̱nta̱li n a̱kpa̱n a tatsu n amangatawantawun n amangerenkupa, (603, 550).
47 Ama e kece kumaci ka aza e Levi koɓolo n kumaci ku na ku buwai ba.
48 Adama a na Vuzavaguɗu u dana ta̱ Musa.
49 <<Ka̱ta̱ i kece kumaci ka aza e Levi, ko kpamu i ɓolongu le e mekecu n aza a Isaraila a na a buwai ba.
50 N tsu nanlo, yi ta̱ a kufuɗa ya zagba aza e Levi okpo aza a na a̱ kula̱na̱ Ma̱va̱li ma̱ Ka̱shile n ucanuku u na wi punu ra̱ka̱ koɓolo n ili ra̱ka̱ i na yi punu. Ele ɗa a kuɗika Ma̱li ma̱ Ka̱shile ka n ucanuku u na wi punu koɓolo n ili ra̱ka̱ i na yi punu, ele ɗa a̱ kula̱na̱ ka̱ta̱ a̱ da̱sa̱ngu uka̱ra̱'i n ka'a.
51 Ayin a na baci de dem i cigai kuya'ansaka ubuta̱ u na a cigai kubana n Ma̱va̱li ma̱ Ka̱shile ma, aza e Levi a ɗa a kubanka n ka'a, ele ɗa kpamu a̱ kushikpa̱ ka'a. Yaba dem vu na u yawai ɗevu i ta̱ a kuna yi.
52 Aza Isaraila a na a buwai i ta̱ a̱ kushikpa̱ a̱pa̱m e le ka̱tsura̱-ka̱tsura̱, yaba dem n ka̱pa̱m ka̱ ni, a uteku u tsugbayin tsu ni.
53 Ka̱ta̱ aza e Levi a a̱ shikpa̱ a̱pa̱m e le uka̱ra̱'i n Ma̱va̱li ma̱ Ka̱shile ka. Adama a na ka̱ta̱ Vuzavaguɗu u ɗa̱ngusa̱ wupa u ni wa aza a Isaraila ba. Ulinga wa aza e Levi u ɗa a̱ la̱na̱ Ma̱va̱li ma̱ Ka̱shile.>>
54 Ɗa aza a Isaraila a ya'in ili dem derere tsu na Vuzavaguɗu u danai Musa u ya'an.