13
A̱ suki n aza a tsusaki a Kana'ana
(Wil 1:19-33)
1 Vuzavaguɗu u danai Musa,
2 <<Suku uma a bana a saka iɗika i Kana'ana, i na mi a kuciga me neke aza a Isaraila a. Suku vuza kelime vi te a̱ ka̱tsuma̱ ka kumaci dem.>>
3 Ɗa Musa u ya'in uteku tsu na Ka̱shile ka danai ni u ya'an ɗa u suki uma kupa n ere aza a Isaraila, dem vu le aza e kelime a kumaci a ɗa. Ɗa u suki le a̱ uta̱i ɗe a kakamba ka Paran.
4 Ula a uma a na a zagbai a ɗa na.
A kumaci ka aza a Ruben, Shamuwa kolobo ka Zakuru,
5 a kumaci ka aza a Simiyon, Shafatu kolobo ko Hori,
6 a kumaci ka aza a Yahuda, Kelepu kolobo ka Jefune,
7 a kumaci ka aza a Isaka, Igalu kolobo ka̱ Isufu,
8 a kumaci ka aza a Ifirayimu, Hosiya kolobo ka Nun,
9 a kumaci ka aza a Bayami, Paliti kolobo ka Rafu,
10 a kumaci ka aza a Zabalun, Gadiyelu kolobo ko Sodi,
11 a kumaci ka aza a Manasa, Gadi kolobo ka̱ Susi,
12 a kumaci ka aza a Dan, Amiyelu kolobo ka Gemali,
13 a kumaci ka aza a Ashera, Seturu kolobo ka Makelu,
14 a kumaci ka aza a Nafutali, Nabi kolobo ko Vopusi,
15 a kumaci ka aza Gadu, Geyuwelu kolobo ka Maci
16 Na ɗa ula a uma a na Musa u suki a bana a ya'an tsusaki ki iɗika ka. Ɗa Musa u ne'i Hosiya kolobo ka Nun kula, Jesuwa.
17 Ana Musa u suki le a bana a saka iɗika i Kana'ana, ɗa u danai le, <<Ɗa baci yi a kubana, ka̱ta̱ i tonoko n Negebu n uɓon wu nsasan u likuci wa.
18 Ka̱ta̱ i la̱na̱ yene tsu na iɗika ya yi, ko uma a na i punu ida̱shi a̱ likuci ya aza a utsura a ɗa ko babu utsura n a̱bunda̱i ko kenu.
19 Icu'u yi iɗika ye ne i ɗai i ida̱shi? I singai ko i gbani-gbani? Icu'u i likuci ye ne i ɗai i ida̱shi? Ukanji ko babu ukanji?
20 Nini ɗai iɗika ya yi? N tsuta̱ ko babu tsuta̱? Iɗika ya yi ta̱ nu nɗanga ko babu? Ya'in tsu na i kufuɗa, ka̱ta̱ i ta'a umaci u mambulu wi iɗika ya i bonoko.>> Ayin a nanlo a ɗaɗa ayin a na umaci wu nɗanga u tsu kugita̱ kuge'we.
21 Ɗa a banai a sakai iɗika ya, ili i na i gita̱i e meremune ma Zinu ali a kubana a Rehobu a uɓon u Lebo-hamata.
22 Ɗa o tonoi n Negebu, a yawai Heburon, a̱ ubuta̱ u na Ahiman, n Shishayi, n Talimayi, ntsukaya n Anaku i n ida̱shi. (A ma'a ta̱ Heburon a̱ya̱'a̱ e cindere a na a lazai kafu Zowa a iɗika i Masar.)
23 Ana a yawai a̱ ka̱ra̱'a̱ ka Eshikolu, ɗa o koɗoi kacaka ka mambulu ka na ki n a̱miki ali sai a na uma e re a ɗikai ka'a n kalangu, koɓolo n umaci wu nɗanga m ruman m ma̱biri.
24 Ubuta̱ u nanlo e ci ɗeke ta̱ u ɗa Ka̱ra̱'a̱ ke Eshikolu adama a na ta ɗe aza a Isaraila o koɗoi kacaka ku umaci wi itacishi yi inabi.
25 A ukocishi u ayin amangere ɗa o kotsoi tsusaki, ɗa o bonoi.
A danai i na a̱ ciya̱i a̱ ubuta̱ u tsusaki
26 Ɗa o bonoi u Musa n Haruna koɓolo n aza a Isaraila ra̱ka̱ a na i e Kadeshi vu kakamba ka Paran. Ɗa o tonokoi le n aza a Isaraila ukuna wi ili ra̱ka̱ u na a̱ ciya̱i a̱ ubuta̱ u tsusaki wa, ɗa kpamu o yotsongi le umaci wu nɗanga wi iɗika wa.
27 Ɗa a danai Musa ukuna u nampa, <<Tsu bana ta̱ a iɗika i na vu suki tsu va, iɗika ya yi ta̱ m mani'in n tsuta̱, umaci wu nɗanga wi iɗika u ɗa na.
28 Ama uma a na i ɗe a iɗika ya i ta̱ n utsura, likuci ya feu i gbagba'in i ɗa n ukanji mayin. Ali ce ene ta̱ ɗe kumaci ka aza Anaku.
29 Aza a Emeleki i ta̱ punu ɗe ida̱shi a iɗika i Negebu, aza a Hitiya, n aza a Jebusiya koɓolo n aza a Amoriya i ta̱ ida̱shi a akambu a nsasan. Aza a Kana'ana tamkpamu i ta̱ ida̱shi a̱ ka̱kina̱ ka mala, ɗevu n Kuyene ku Urudu.>>
30 Ɗa Kelepu u danai uma a paɗa bini e kelime ka Musa ɗa u danai, <<Tsu bana ci isa iɗika ya, adama a na ci ta̱ a kufuɗa.>>
31 Ama aza a na a banai koɓolo n a̱yi va a danai, <<Tsa kufuɗa kurono n uma a nanlo ba, adama a na a la'a tsu ta̱ utsura.>>
32 Ɗa a lya'i kelime n kuka̱ra̱ka̱ aza a Isaraila n kadanshi ka gbani-gbani adama a ukuna wi iɗika i na a banai a sakai va. A danai, <<Iɗika i na tsu banai tsu sakai va, yu una ta̱ aza na ishi punu ida̱shi ɗe. Kpamu uma a na ce enei ɗe aza a gbagba'in a ɗa.
33 Kpamu ce ene ta̱ ɗe aza e Nefilim kumaci ka aza Anaku aza na uta̱i Nefilim. Ɗa ce enei ka̱ci ka̱ tsu tso okpoi tsa akyun a̱ a̱shi e le, ta ta na ci nannai we le.>>