18
Ulinga u anan Ganu koɓolo n aza e Levi
1 Vuzavaguɗu u danai Haruna, <<Avu, m muku n ali n nu, n aza a̱ ɗa̱ a na yu uta̱i a kumaci ke esheku a̱ nu, a̱ɗa̱ ɗa i kuɗika a̱miki a̱ unushi u na u sa'wai a̱'isa̱. Ama avu m muku n ali n nu koci, a̱ɗa̱ ɗa i kuɗika a̱miki a̱ unushi dem a na a sa'wai ubuta̱ wu ulinga u tsuganu.
2 Ka̱ta̱ vu tuka̱ n aza a̱ nu, aza e Levi, aza na yi kumaci ku te, adama a na o ɓolongu ekiye n avu, m muku n nu, ka̱ta̱ a̱ ɓa̱nka̱ ɗa̱ a ayin a na yi a kuya'an a̱ga̱nda̱ punu a̱ Ma̱va̱li mo Oɓolo.
3 Ulinga u le u ɗa a̱ ɓa̱nka̱ ɗa̱, ka̱ta̱ kpamu a ya'ansa ulinga u na wi punu a̱ Ma̱va̱li dem. Ama ka̱ta̱ a yawa ɗevu n ili yu ulinga i Ma̱va̱li ya ba, ko katalikalyuka ba, ta lo dem vu ɗa̱ ya̱ kuwa̱.
4 I ta̱ o kuɓolongu ekiye n avu ka̱ta̱ a̱ la̱na̱ Ma̱va̱li mo Oɓolo ma, ka̱ta̱ a ya'an ulinga dem, ama ka̱ta̱ vuza yoku kau u yawa ɗevu n ubuta̱ u na yi ulinga ba.
5 <<Avu m muku n ali n nu n ɗa i kuɗika a̱miki a ulinga u kula̱na̱ Ma̱va̱li ma̱ Ka̱shile koɓolo n katalikalyuka, adama a na ka̱ta̱ wupa u Vuzavaguɗu u doku u cipa̱ wa aza a Isaraila kpamu ba.
6 Mpa n ka̱ci ka̱ va̱ n zagbaka ɗa̱ ta̱ aza a̱ɗa̱ aza e Levi a̱ ka̱tsuma̱ ka aza a Isaraila, o okpo ta̱ tsu kune'e wa̱ ɗa̱, e nekei le u Vuzavaguɗu adama a na a ya'an ulinga u na wi punu a̱ Ma̱va̱li mo Oɓolo.
7 Ama avu ɗa koci m muku n nu i kuya'an ulinga u tsuganu, koɓolo n ili i na i buwai i na a kuya'an a katalikalyuka dem n asuvu a kakashi ku utsutsu ka. N neke ɗa̱ ta̱ ulinga u tsuganu tsu kune'e ku gbani. Ɗa baci vuza yoku kau u yawai ɗevu m Ma̱va̱li ma, wi ta̱ a̱ kukuwa̱.>>
Upecu u anan ganu n aza e Levi
8 Ɗa Vuzavaguɗu u danai Haruna, <<Mpa a̱ ka̱ci ka̱ va̱ n zuwa wu ta̱ vo okpo vuza na u kula̱na̱ kune'e ku na a̱ kutuka̱sa̱ wa̱ va̱. Kune'e ku ciɗa ku na aza a Isaraila a̱ kutusa̱ka̱ dem, mi ta̱ e kuneke wu ku ɗa avu m muku n nu ciya̱ wo okpo upecu u ɗa̱ u ayin dem.
9 Mayun ɗa vo okpo n ugboku u kune'e ku na ku la'i n ciɗa, ku na a̱ kpa̱ɗa̱i kusongu. A̱ ka̱tsuma̱ ke kune'e ra̱ka̱ ku na a̱ tuka̱i mu ku na kula'i n ciɗa, ko ki ishina, ko kune'e ku unushi, ko ku kutakpa ku unushi, ugboku u nanlo wi ta̱ o kokpo u nu m muku n nu.
10 Lya'a i ɗa ci ili i na i la'i n ciɗa, mavali dem u lya'a i ɗa. Ɗikai i ɗa yo okpo ɗa̱ ili i na i la'i n ciɗa.
11 Na va feu ku ɗa̱ ku ɗa, kune'e dem ku na baci a̱ tuka̱i mu, a ayin a na aza a Isaraila a̱ ɗengusa̱i ku ɗa gaɗi a katalikalyuka. N neke wu ta̱ ku ɗa avu n olobo a̱ nu ni nkere n nu feu, wo okpo ɗa̱ ta̱ upecu u ayin tutu. Yaba dem a kpa'a ku nu, vuza na nshinda̱ n ni n ya'in utakpi wi ta̱ a kulya'a i ɗa.
12 N neke wu ta̱ mani'in ma zaitu ma na ma la'i n kuga'an, m ma̱kya̱n ma na ma la'i n kuga'an, koɓolo n ishina i na a̱ tsu gita̱ kuneke Vuzavaguɗu.
13 Imacishi i kashina yi iɗika i na i gita̱i kuge'we, i na uma a̱ kutuka̱ u Vuzavaguɗu yi ta̱ o kokpo i nu. Yaba dem vu na wi babu nshinda̱ a kpa'a ku nu, wi ta̱ a kufuɗa kulya'a i ɗa.
14 <<Ili ra̱ka̱ i na yi punu a Isaraila ɗa e nekei i ɗa u Vuzavaguɗu, i nu i ɗa.
15 Maku ma na a̱ gita̱i kumatsa, vuma ko manama, ɗa e nekei ma'a u Vuzavaguɗu, mo okpo ta̱ ma̱ nu. Ama mayun ɗa ayin dem vi shiba̱ maku ma vali ma vuma ma na a̱ gita̱i kumatsa, ko manama ma na a̱ gita̱i kumatsa ɗa mi n unata.
16 Ayin a na baci i wotoi u te n umaci, katsupu ka̱ kushiba̱ ka ka ya'an azurufa a tawun. U wala derere n kagisamkpatsu ka̱ a̱'isa̱ ka.
17 <<Ama ka̱ta̱ vu shiba̱ maku ma kanaka, ko mokyon, ko maraɗika ma na a̱ gita̱i kumatsa ba, adama na i ta̱ ciɗa. Vu vishangu mpasa n le a katalikalyuka, ka̱ta̱ kpamu i songu ushuma u le wo okpo ili i kune'e ku na a ya'in n akina, ci ili i ma̱gula̱ni a kubana u Vuzavaguɗu.
18 Inyama yi nnama n nanlo yi ta̱ o kokpo i nu, tsu na kpamu uɓon u ma̱ka̱nga̱ koɓolo m ma̱kuta̱ mu usingai ma na e nekei tsu kune'e ku kuɗa̱ngusa̱ yo okpoi i nu.
19 Kune'e ku ciɗa dem ku na aza a Isaraila e kuneke Vuzavaguɗu, n neke wu ta̱ ku ɗa n olobo a̱ nu koɓolo ni nkere n nu dem, tsu ugboku u nu u ayin dem. Uzuwakpani wa akucina, a kubana u Vuzavaguɗu adama a̱ nu m muku n nu.>>
20 Ɗa Vuzavaguɗu u danai Haruna, <<Va kuciya̱ punu ili yu uka̱ni i nu a iɗika ya ba, ko vi ciya̱ ugboku punu we le ba. Mpa ɗa ugboku u nu n upecu u nu a̱ ka̱tsuma̱ ka aza a Isaraila.
21 <<N neke ta̱ anan Levi i te dem a̱ ka̱tsuma̱ ka kupa punu a Isaraila wo okpo ili i ka̱ci ke le, tsu katsupu ku ulinga u na a ya'in, a ayin a na i a kuya'an ulinga a̱ Ma̱va̱li mo Oɓolo.
22 Ili i na i ɗikai gogo na, aza a Isaraila o kudoku kuyawa ɗevu m Ma̱va̱li mo Oɓolo ba, a ya'an baci nannai i ta̱ a kuɗika a̱miki a̱ unushi u le ka̱ta̱ a̱ kuwa̱.
23 Aza e Levi a ɗa a kuya'an ulinga u Ma̱va̱li mo Oɓolo, ka̱ta̱ kpamu a ɗika a̱miki a̱ unushi a̱ ubuta̱ u nanlo. Na va uzuwakpani u ɗa u na u kukotso ba, ali a kubana ntsukaya n ntsukaya n na n kuta̱wa̱. A̱ kuciya̱ ili i ka̱ci ke le a̱ ubuta̱ wa aza a Isaraila ba.
24 Adama a na n neke ta̱ aza e Levi i te a̱ ka̱tsuma̱ ka kupa i na aza a Isaraila a̱ tsu tuka̱, adama a na wo okpo upecu u le wi ili i te a̱ ka̱tsuma̱ ka kupa i na aza a Isaraila e nekei ci ili i kune'e u Vuzavaguɗu. I ɗaɗa i zuwai ɗa n danai, ele a̱ kuciya̱ ili i ka̱ci ke le a̱ ubuta̱ wa aza a Isaraila ba.>>
25 Ɗa Vuzavaguɗu u ya'in kadanshi m Musa u danai,
26 <<Ya'an kadanshi n aza e Levi vu dana le, <Yi isa baci ili i te a̱ ka̱tsuma̱ ka kupa i na aza a Isaraila a̱ tuka̱i, n neke ɗa̱ ta̱ i ɗa yo okpo i ɗa̱, mayun ɗa i neke ili i te a̱ ka̱tsuma̱ ka kupa ki ili i nanlo ya u Vuzavaguɗu tsu kune'e.
27 Kune'e ku nanlo i ta̱ e kukece ku ɗa tsu kune'e ku na kacimbi ka ya'in, ɗaɗa kune'e ki ishina i na i gita̱i kuge'we, m ma̱kya̱n ma savu feu.
28 Ta feu a̱ɗa̱ i kuya'an nannai i neke kune'e u Vuzavaguɗu a̱ ubuta̱ wi ili i te a̱ ka̱tsuma̱ ka kupa i na i ciya̱i a̱ ubuta̱ wa aza a Isaraila. Punu a̱ ka̱tsuma̱ ki ili i te i nampa, mayun ɗa i neke ugboku u Vuzavaguɗu u Haruna ganu.
29 A̱ ka̱tsuma̱ ke kune'e ku na e nekei ɗa̱ ra̱ka̱, i neke ku na ku la'i n kuga'an u Vuzavaguɗu.>
30 <<Dana aza e Levi, <Ɗa baci e nekei ugboku u na u la'i n kuga'an, i ta̱ e kukeceke ɗa̱ u ɗa tsu kune'e ki ishina koɓolo n ku ma̱kya̱n ma savu.
31 A̱ɗa̱ n aza a kpa'a a̱ ɗa̱ yi ta̱ a kulya'a i na i buwai va a̱ ubuta̱ dem, adama a na i ɗaɗa katsupu ka̱ ɗa̱ ku ulinga u na i ya'in a̱ Ma̱va̱li mo Oɓolo.
32 Nannai wi ta̱ a kuzuwa yo okpo babu unushi, i neke baci ugboku u na u la'i n kuga'an. Yi feu a ku'uka kune'e ku ciɗa ka aza a Isaraila nshinda̱ ba, yi feu a̱ kukuwa̱ ba.> >>