23
Balam u zuwakai aza a Isaraila una̱singai
1 Ɗa Balam u danai Balaku, <<Ma'aka mu atali alyuka e cindere na, ka̱ta̱ vu tuka̱ mu mbomburon n cindere n a̱giri e cindere feu.>>
2 Balaku u ya'in tsu na Balam u danai. Ɗa Balaku m Balam a ya'in alyuka a katalikalyuka dem n kobomburon n ka̱giri.
3 Ɗa Balam u danai Balaku, <<Shamgba ɗevu n ubuta̱ u kune'e ku kusongu ku nu, mpa kpamu mi ta̱ a kulaza, yoku Vuzavaguɗu wi ta̱ a̱ kuta̱wa̱ u gasa nu mpa. Ili i na baci u yotsonki mu mi ta̱ a kudana wu.>> Ɗa u lazai u banai a̱ ubuta̱ u kaginda.
4 Ka̱shile ka cinai Balam, ɗa Balam u danai ni, <<N gere ta̱ atali alyuka e cindere ɗa n ya'ankai le kune'e ku kobomburon n ku ka̱giri a katalikalyuka dem.>>
5 Ɗa Vuzavaguɗu u zuwakai Balam kadanshi una̱ u ni u danai, <<Bono u Balaku, ka̱ta̱ vu dana yi.>>
6 Ɗa u bonoi wa̱ ni, u cinai ni kisani a̱yi nu nkoshi m gba̱ra̱-gba̱ra̱ m Mowabu dem a̱ ubuta̱ u kune'e ku kusongu ku ni.
7 Balam ta na u danai ni kadanshi ke kene ka̱ ni, u danai,
<<Balaku mogono ma Mowabu wu uta̱ ta̱ nu mpa a Aram ɗa u tuka̱i mu na,
na ɗe a nsansa n kasana u danai,
<Ta̱wa̱, vi ya'anka mu Yakubu una̱,
ta̱wa̱, vi ya'anka mu aza a Isaraila una̱.>
8 Nini ɗai n kuya'anka vuza una̱,
a na Ka̱shile ka ya'ankai ni ba?
Nini ɗai kpamu n kuya'anka,
vuza na Vuzavaguɗu u ya'ankai una̱ ba?
9 E, na ɗe gaɗi vu katali me ene le ta̱,
na ɗe gaɗi vu nsansa me ene le ta̱,
aduniyan a ɗa a na i ida̱shi ende'en ni,
e yeve ta̱ a̱ ciya̱ ta̱ una̱singai u na u la'i aduniyan dem.
10 Yayi u kufuɗa kukece kumaci ku Yakubu?
Ka̱bunda̱i ke le an kubuta̱ ki iɗika,
ka̱bunda̱i ke le ka la'a ta̱ kukece.
Ya'an ukpa̱ u va̱ wo okpo ukpa̱ u mejege,
Ya'an ukocishi u va̱ wo okpo tsu le.>>
11 Ɗa Balaku u danai Balam, <<Yiɗa̱i vi ya'ankai mu na? N ɗika wu ta̱ adama a na vi ya'anka irala a̱ va̱ una̱, ɗa na, vi ya'an ili ba, ɗa kucikpa vu zuwakai le una̱singai.>>
12 Ɗa wu ushuku ni u danai, <<Kadanshi ka na Vuzavaguɗu u zuwai una̱ u va̱ ka ɗaɗa n kudansa koci ba?>>
13 Balaku u danai ni, <<N folono wu ta̱ ta̱wa̱ tsu bana ubuta̱ u yoku, ubuta̱ u na ve kene le. Vi ta̱ e kene kagimi, ama ve kene le dem ba, ka̱ta̱ vi ya'anka mu ele una̱.>>
14 Ɗa u ɗikai ni a kubana e keteshe ka Zofim, a gaɗi vu Pisiga. U ma'i atali alyuka e cindere, ɗa u ya'in kune'e n kobomburon n ka̱giri a katalikalyuka dem.
15 Balam u danai Balaku, <<Shamgba punu na a uɓon u kune'e ku kusongu ku nu, mi ta̱ a kubana kucina Vuzavaguɗu na ɗe.>>
16 Ɗa Vuzavaguɗu u gasai m Balam ɗa u zuwai kadanshi una̱ u ni u danai, <<Bono u Balaku, vu dana yi ili i na n danai nu.>>
17 Ana Balam u bonoi u Balaku, u cinai ni kisani a uɓon u kune'e ku kusongu, nu nkoshi m gba̱ra̱-gba̱ra̱ m Mowabu koɓolo n a̱yi. Ɗa Balaku we ecei ni, <<Yiɗa̱i Vuzavaguɗu u dansai?>>
18 Balam u ɗikai kadanshi u tonoi,
<<Ɗa̱nga̱, Balaku, vu panaka mu,
panaka mu maku ma Ziporu.
19 Ka̱shile vuma ɗa ba, a na wa ya'an a'uwa,
ko maku ma vuma, a na wa saba'a ka̱ɗu ka̱ ni.
U ci ya'an ta̱ kadanshi ka̱ta̱ u kpa̱ɗa̱ kushatangu?
Ko u ya'an uzuwakpani, ka̱ta̱ u kpa̱ɗa̱ ku kushatangu?
20 Pana, a dana mu ta̱ n zuwa una̱singai,
u vuza na u zuwakai una̱singai, mi ta na a kusaba'a ili i na u danai ba.
21 We ene unushi a̱ ubuta̱ u Yakubu ba,
we ene atakaci a̱ ubuta̱ wa aza a Isaraila ba.
Vuzavaguɗu Ka̱shile ke le wi ta̱ koɓolo n ele,
i ta̱ a kudansa n kaca'a adama a na a̱yi mogono me le ma'a.
22 Ka̱shile ka̱ uta̱ka̱ le ta̱ a Masar,
ɗa kpamu wi a̱ kushilika̱ adama e le an kujima.
23 Babu tsuboci tsu na tso kudoro Yakubu,
babu kpamu nkunu n na n kuya'an tsurala n aza a Isaraila,
gogo na uma i ta̱ a kuya'an kadanshi ka aza a Isaraila a dana,
<La̱na̱ ili i na Ka̱shile ka ya'in!>
24 Uma a Isaraila i ta̱ an kawu vu gbayin.
A tsu uvuka ba ali a̱ ciya̱ ili i na e remei ɗa unai,
ka̱ta̱ o so'o mpasa mi ili i na a unai.>>
25 Balaku u danai Balam, <<Ka̱ta̱ vu ya'anka le una̱ ba, ka̱ta̱ kpamu vu ya'anka le una̱singai ba.>>
26 Ama ɗa Balam wu ushuki Balaku, <<N dana wu ba, ili na Vuzavaguɗu u danai, I ɗaɗa n kuya'an?>>
27 Ɗa Balaku mogono u danai Balam, <<Ta̱wa̱ gogo na, mi ta̱ a kuɗika wu a kubana a̱ ubuta̱ u yoku. Yoku ta ɗe Ka̱shile ka kupana uyo'o ali u zuwa vi ya'anka mu ele una̱.>>
28 Balaku u ɗikai Balam a kubana gaɗi vu kusan ku Piyo, ku na ki a kinda keteshe.
29 Ɗa Balam u danai Balaku, <<Ma'aka mu atalilyuka e cindere na ka̱ta̱ vu tuka̱ obomburon e cindere n a̱giri e cindere.>>
30 Balaku u ya'in tsu na Balam u danai, u ya'in alyuka n kobomburon n ka̱giri a katalikalyuka dem.