24
1 Ana Balam we enei u yokpo ta̱ Vuzavaguɗu u zuwaka aza a Isaraila una̱singai, ɗa u kpa̱ɗa̱i kubana kula̱nsa̱ aza o tsuboci, tsu na wi ishi u tsu bana, ɗa u vadalukpai a kinda kakamba.
2 Ana Balam u ɗa̱ngusa̱i a̱shi a̱ ni ɗa we enei aza a Isaraila a̱ da̱sa̱ngi kumaci-kumaci. Ɗa Ayinviki a̱ Ka̱shile a̱ cipa̱i wa̱ ni.
3 Ɗa Balam u danai kadanshi ka na wi n ka'a.
<<Kene ku Balam maku ma Biyo,
Kene ku vuza na a̱shi a̱ ni i uɓa̱yuwi,
4 Kene ku vuza na u tsu pana kadanshi ka̱ Ka̱shile,
vuza na u ci ya'an kene ku tsalatani u Mala'imili,
vuza na wi u kuɗa̱ngi n a̱shi a̱ ni uɓa̱yuwi.
5 A̱ɗa̱ kumaci ku Yakubu a̱pa̱m a̱ ɗa̱ a ga'an ta̱,
ubuta̱ wi ida̱shi u ɗa̱, wi ta̱ n uga'in.
6 I ta̱ kisani tsu nshuwa,
an kashina a̱ ka̱kina̱ ka̱ mini,
a na nɗanga n na Vuzavaguɗu u ca̱'i,
a na nɗanga n sida a̱ ka̱kina̱ ka̱ mini.
7 I ta̱ a̱ kuciya̱ mini ma̱ Ka̱shile n a̱bunda̱i,
ka̱ta̱ a̱ ca̱'a̱ icu'u i le a̱ ubuta̱ u na mini mi gbani,
mogono me le mi ta̱ o kokpo vuza gbayin n Agagu,
tsugono ci le ci ta̱ a̱ kuciya̱ tsugbayin.
8 Ka̱shile ka na ka̱ uta̱ka̱i le a Masar,
u tsu shilika̱ ta̱ adama e le tsu kujima,
wi ta̱ a kuna uma a na i a tsurala n ele,
ka̱ta̱ u koɗoso etele e le miri-miri,
ɗa kpamu u tawai le n aya e le.
9 Aza a Isaraila i ta̱ tsu kawu vu utsura,
wi baci alavu babu vuza na u yawai u ɗa̱ngusa̱ yi.
Vuza na u zuwakai Isaraila una̱singai dem, a̱yi feu i ta̱ a kuzuwaka yi,
Vuza na baci u ya'ankai ni una̱ a̱yi feu i ta̱ a kuya'anka yi.>>
10 Ɗa Balaku u ya'in wupa ka̱u adama Balam, ɗa u ɓasai ekiye a̱ ni. Balaku u danai Balam, <<N ɗeke wu ta̱ kutatsu adama na vi ya'anka irala a̱ va̱ una̱, ama ɗa vu zuwakai le una̱singai ali kutatsu.
11 Adama nannai puwa̱nka̱ punu na vu bono a kpa'a, n dana wu ta̱, mi ta̱ e kuneke wu tsugbayin, Ama Vuzavaguɗu u sa̱nka̱ wu ta̱ kuciya̱ tsu ɗa.>>
12 Balam u danai Balaku, <<Mpa n dana alingata a na vu suki wa̱ va̱ ba?
13 <Ko Balaku wi baci e kuneke mu kpa'a ku ni tukpa n azurufa koɓolo n azanariya, mi a kufuɗa kupasa kadanshi ka Vuzavaguɗu ba, ko n ya'an kasingai ko ka gbani-gbani n tsu va̱ ba. Ili i na Vuzavaguɗu u danai, i ɗaɗa n kudana.>
14 Gogo na, mi ta̱ o kubono ubuta̱ u uma a̱ va̱, ama ka̱ta̱ vu ta̱wa̱ n dana wu ili i na uma a kuya'anka wu a ayin a̱ kuta̱wa̱.>>
15 Balam u ɗikai kadanshi u danai,
<<Kadanshi ke kene ka Balam maku ma Biyo,
kene ku vuma vu na a̱shi a̱ ni i uɓa̱yuwi,
16 Kene ku vuma vu na u tsu pana kadanshi ka̱ Ka̱shile,
a̱yi na wi n kuyeve ku Mala'imili,
n kuya'an kene tsalatani ku Mala'imili,
vuza na u tsu kuɗa̱ngu, ka̱ta̱ wi isa akaka a̱shi a̱ ni uɓa̱yuwi.
17 Mi ta̱ e kene yi, ama gogo na ba,
Mi ta̱ e kene yi, ama ɗevu ɗa ba,
Kazangata ki ta̱ a̱ kuta̱ a kumaci ku Yakubu.
Kalangu ko tsugono ki ta̱ a̱ kuta̱ wa aza a Isaraila,
ka̱ta̱ u lapa aza Mowabu,
ka̱ta̱ kpamu u koɗoso muku n Shitu.
18 I ta̱ a kulya Edom,
Siyaru feu, irala yi Isaraila i ta̱ a kuya'an ulya'i.
Ama aza Isaraila i ta̱ a kulya'a kelime n kuya'an utsura.
19 A kumaci ku Yakubu ku ɗa tsugono tsa̱ kuta̱,
ka̱ta̱ wu una aza a na a la'akai n wuma a̱ likuci i Iru.>>
20 Ɗa Balam wu indanai aza Ameleki, u ya'in kadanshi ke kene u danai,
<<Ameleki iɗika i ɗa yi utsura a aduniyan,
ama o kukotsoso ku ni ukpa̱ u ɗa.>>
21 Ɗa wu indanai aza e Kenetu, ɗa u ya'in kadanshi ke kene u danai,
<<Ubuta̱ wi idashi u ɗa̱ u tsurakpa ta̱,
i'uwa i ɗa̱ yi ta̱ uma'i a kakpanlai.
22 N nannai dem kumaci ku Kenetu ki ta̱ a kuya'an wuni
ayin a na baci aza a Asiriya a ɗikai ɗa̱ yo okpoi agbashi e le.>>
23 Ɗa kpamu u doku u ya'in kadanshi ke kene u danai,
<<Ili ya atakaci i ɗa, yayi u kula'a ayin a na baci Ka̱shile ka ya'in ka nanlo?
24 Antsu i ta̱ a̱ kuta̱ a̱ Kitimu,
i ta̱ a kutakacika aza Asiriya n Eberu,
ele n ka̱ci ke le i ta̱ a̱ kukuwa̱.>>
25 Ɗa Balam u ɗa̱nga̱i u bonoi a̱ likuci i ni, Balaku tamkpamu u ya'in nwalu n ni.