28
Kune'e ku kanna dem
(Kut 29:38-46)
1 Vuzavaguɗu u ya'in kadanshi m Musa, u danai.
2 <<Ya'an kadanshi n aza a Isaraila vu dana le, <I neke mu ilikulya tsu kune'e ka alyuka ku na a ya'in n akina a makyan ma na mo yotsoi i ya'an, ci ili i ma̱gula̱ni ma singai wa̱ va̱.>
3 Dana le, na ɗa kune'e ku na a ya'in n akina ku na i kuneke Vuzavaguɗu: ngiri n re n na mi ka̱ya̱ ke te ke te, n na mi babu u'iwin u Ka̱shile tsu kune'e ka alyuka o kusongu ku kanna dem.
4 Yi ta̱ a kuya'an kune'e m me te n usana me te kpamu n kulivi,
5 koɓolo n kagisamkpatsu ka ifa vi te a̱ ka̱tsuma̱ ka kupa ka kiya ku singai usatari n kedele ka mani'in ma zaitu, ɗaɗa i kuya'anka kune'e ki ishina.
6 Na ɗa kune'e ku kusongu ku kanna dem, ku na a zuwai a Kusan ku Sinai, adama a̱ ma̱gula̱ni ma singai, kune'e ka akina ku na a ya'ankai Vuzavaguɗu.
7 A ya'an baci kune'e ku kusongu ku nampa, mayun ɗa o ɓolongu n Kune'e ki ili i kuso'o i kagimi ke te a̱ ka̱tsuma̱ ka tatsu i kedele a̱ ma̱giri dem. Ubuta̱ u ciɗa u ɗa i kutsungu kune'e ki ili i kuso'o yu utsura u Vuzavaguɗu.
8 N kulivi yi ta̱ a kuya'an kune'e ku ma̱giri me ire n kune'e ki ishina n kune'e ki ili kuso'o tsu na i ya'in n usana. Adama a̱ ma̱gula̱ni ma singai u Vuzavaguɗu.
Kune'e ku kanna ka Ashibi
9 <<A Kanna ka Ashibi i neke, muku ma̱ a̱giri n re ma̱ ka̱ya̱ ke te ke te aza na i n u'iwin u Ka̱shile ba n agisamkpatsu a ifa e re a̱ ka̱tsuma̱ ka kupa ka kiya ku singai ku kune'e ki ishina, usatari m mani'in ma zaitu, n kune'e ki ili i kuso'o.
10 Na ɗa kune'e ku kusongu ku kanna ka Ashibi dem, koɓolo n kune'e ku kusongu n kune'e ki ili i kuso'o ku na i ci ya'an a kanna dem.
Kune'e ku wotoi dem
11 <<A kanna ka iyain ko wotoi dem, yi ta̱ a kuya'an kune'e ku kusongu u Vuzavaguɗu. Mbomburon n re, n ka̱giri ke te, ni ngiri n cindere aza a̱ ka̱ya̱ ke te ke te, aza na i n u'iwin u Ka̱shile ba.
12 Yi baci e kuneke mobomburon dem, i neke feu kagisamkpatsu ka ifa vu tatsu a̱ ka̱tsuma̱ ka kupa ka kiya ku singai usatari m mani'in ma zaitu. A̱ ka̱giri dem i neke feu kagisamkpatsu ka ifa vi re a ka̱tsuma̱ ka kupa ka kiya ku singai usatari m mani'in ma zaitu.
13 A̱ ma̱giri dem i neke kagisamkpatsu ka ifa ke te ka kiya ku singai usatari m mani'in ma zaitu tsu kune'e ki ishina. Na ɗaɗa kune'e ku kusongu ku ma̱gula̱ni ma singai, kune'e ku na a ya'in n akina a kubana u Vuzavaguɗu.
14 O mobomburon dem, i neke kagimi ke kedele ka̱ ma̱kya̱n, a̱ ka̱giri dem, i neke kagimi ke te a̱ ka̱tsuma̱ ka tatsu ke kedele ka̱ ma̱kya̱n, a̱ ma̱giri dem. I neke kpamu kagimi ke te a̱ ka̱tsuma̱ ka̱ na̱shi ka̱ ma̱kya̱n, tsu kune'e ki ili i kuso'o. Na ɗa kune'e ku kusongu ku na a kuya'an o wotoi dem ali ka̱ya̱'a̱.
15 E neke ma̱ga̱ji adama e kune'e ku unushi u Vuzavaguɗu. I ta̱ e kuneke ku ɗa koɓolo n kune'e ku kusongu n ki ili i kuso'o a kanna dem.
Kune'e ku kupasamgbanai
(A Gan 23:5-14)
16 <<A kanna ka kupa n ka̱ na̱shi o wotoi u iyain ɗaɗa kanna ka̱ ka̱ɗiva̱ ka kupasamgbanai ka Vuzavaguɗu.
17 A kanna ka kupa n ka tawun ko wotoi ka, ɗaɗa ka̱ɗiva̱, i ta̱ a kuya'an ayin e cindere a kutakuma boroji vu na vi n yisiti ba.
18 A kanna ka iyain ka̱ ka̱ɗiva̱ ka, yi ta̱ a kuya'an koɓolo ka ciɗa, yi ta na a kuya'an ulinga ba,
19 ama yi ta̱ a kuya'an kune'e ki ilikulya, n kune'e ku kusongu u Vuzavaguɗu. Mbomburon n re n ka̱giri ke te, ni ngiri n cindere aza a̱ya̱ ke te ke te, aza na i n u'iwin u Ka̱shile ba.
20 Koɓolo n ilikuzuwa ya, i neke agisamkpatsu a tatsu a ifa a̱ ka̱tsuma̱ ka kupa ku kiya ku singai usatari m mani'in ma zaitu, adama o mobomburon dem, n kagisamkpatsu kure ka ifa a̱ ka̱tsuma̱ ka kupa a̱ ka̱giri.
21 I neke kagisamkpatsu ka ifa ke te a̱ ka̱tsuma̱ ka kupa a̱ ma̱giri dem.
22 Yi ta̱ feu a kuya'an kune'e m ma̱ga̱ji adama a unushi, adama na a takpaka ɗa̱ unushi.
23 Yi ta̱ a kuya'an kune'e ka, koɓolo n kune'e ku kusongu ku na i ci ya'an a kanna dem.
24 Ta ya kuya'an kune'e ka nannai a kanna dem, ali ayin e cindere, kune'e ki ilikulya, n ili i ma̱gula̱ni a kubana u Vuzavaguɗu. Yi ta̱ a kuya'an nannai koɓolo n kune'e ku kusongu n kune'e ki ili i kuso'o ku na i ci ya'an ayin tutu.
25 A kanna ke cindere yi ta̱ a kuya'an koɓolo ka ciɗa. Yi ta na a kuya'an ulinga a kanna ka nanlo ba.>>
Kune'e adama a̱ ka̱ɗiva̱ ka ayin e cindere lakam
(A Gan 23:15-22)
26 <<A kanna ka iyain ka̱ ka̱ɗiva̱ ka vikya, ɗa baci i ya'in kune'e ki ili i kashina i savu u Vuzavaguɗu, yi ta̱ a kuya'an koɓolo ka ciɗa. Yi ta na a kuya'an ulinga ba.
27 Ama i neke mu kune'e ku kusongu, ku mbomburon n re, n ka̱giri, ni ngiri n cindere aza ka̱ya̱ ke te ke te ci ili i ma̱gula̱ni i singai u Vuzavaguɗu,
28 koɓolo n ilikuzuwa ya, i neke kiya ku singai usatari m mani'in ma zaitu, n kagisamkpatsu ku tatsu ka ifa a̱ ka̱tsuma̱ ka kupa o kobomburon dem, n kagisamkpatsu kure ka ifa a̱ ka̱tsuma̱ ka kupa a̱ ka̱giri,
29 I neke kagisamkpatsu ka ifa ke te a̱ ka̱tsuma̱ ka kupa a̱ ma̱giri dem.
30 Yi ta̱ feu a kuya'an kune'e m ma̱ga̱ji adama a unushi, adama na a takpaka ɗa̱ u ɗa.
31 Kune'e ku kusongu n ki ishina kau, yi ta̱ e kuneke le koɓolo n kune'e ki ili i kuso'o ku le. Nnama ma mo okpo aza a na i babu u u'iwin u Ka̱shile.