35
Likuci ya aza e Levi
1 Ɗa Vuzavaguɗu u ya'in kadanshi m Musa ɗe a agbata aza a Mowabu a̱ ka̱kina̱ ke Kuyene ku Urudu n upashi u Jeriko, u danai,
2 <<Dana aza a Isaraila e neke aza e Levi likuci i na a̱ kuda̱sa̱ngu punu a̱ likuci yu uka̱ni i ɗa̱. Ka̱ta̱ kpamu i neke le ubuta̱ u kalina a̱ uka̱ra̱'i u likuci wa.
3 Nannai ɗa a̱ kuciya̱ likuci yi ida̱shi n ubuta̱ u kalina wa anaka e le, n ushiga wu nlala koɓolo n ilikuzuwa i na i buwai dem.
4 Ubuta̱ u kalina u na i kuneke le a̱ uka̱ra̱'i u likuci wa, wi ta̱ a kuyawa udashi ka̱kpa̱n ke te n amangatawantawun (1, 500), n asaka a̱ likuci a.
5 N tsupulai tsu likuci ya yi ta̱ e kukece ngona̱shi derere udashi a̱kpa̱n a tatsu (3,000) n tsu kasana, n tsu ɗaka, n tsu ka̱livi, koɓolo n tsu uɓon u gaɗi feu dem nannai. Na va wi ta̱ o kokpo ubuta̱ u kalina u uma a̱ likuci, ka̱ta̱ likuci ya yokpo e mere.
6 <<Likuci i ta̱li i na ve kuneke aza e Levi a, yi ta̱ o kokpo ubuta̱ u kusheɗeku u vuma dem vu na baci wu unai vuma n ucikali u ni ba, wa kusuma wa bana. Ka̱ta̱ vu doku le likuci amangere n ire.
7 Ra̱ka̱-ra̱ka̱ yi ta̱ e kuneke aza e Levi likuci amangere n kunla̱i, koɓolo n ubuta̱ u kalina u le.
8 Aza a Isaraila ra̱ka̱ i ta̱ e kuneke aza e Levi likuci ya a̱ ka̱tsuma̱ ku upecu u na a̱ ciya̱i. Kumaci ku na i n ubuta̱ wa̱ a̱bunda̱i e neke n a̱bunda̱i, kumaci ku na i n ubuta̱ u kenu e neke kenu.>>
Likuci i kusheɗeku
(Wil 19:1-13; Jes 20:1-9)
9 Ɗa Vuzavaguɗu u danai Musa.
10 <<Ya'an kadanshi n aza a Isaraila ka̱ta̱ vu dana le, a ayin a na baci i pasai Kuyene ku Urudu ɗa i uwai a Kana'ana,
11 zagbai likuci kakau i yoku yo okpo ɗa̱ ubuta̱ u kusheɗeku, adama na vuza na baci wu unai vuma n ucikali u ni ba, wi ta̱ a kufuɗa wa suma wa bana ɗe.
12 Wi ta̱ o kokpo ubuta̱ u kusheɗeku adama a uma a na a kuciga kutsupaka vuma vu le. Nannai va wi ta̱ a kuzuwa vuza munuka u la'aka n wuma u ni ali sai ayin a na a da̱sa̱nki ni a̱ ubuta̱ wa afada e kelime ka uma.
13 Likuci i ta̱li i nampa i na e nekei va, yi ta̱ o kokpo ɗa̱ ubuta̱ u kusheɗeku.
14 I neke likuci i tatsu n tsu uɓon u Urudu, i tatsu kpamu punu a iɗika i Kana'ana, wo okpo ɗa̱ ubuta̱ u kusheɗeku.
15 A̱ likuci i ta̱li i nampa yi ta̱ o kokpo ubuta̱ u kusheɗeku wa aza a Isaraila, omoci n aza o yoku a na i punu ida̱shi n ele, adama na vuza na baci de dem wu unai vuza n ucikali u ni ba, u suma u bana ɗe.
16 <<Ama ɗa baci vuma u sovoi toku n viyum adama a na wu una yi, a̱yi va vuza vu ma̱ga̱la̱ka̱ ɗa. Vuza ma̱ga̱la̱ka̱ ta na i ta̱ a kuna yi.
17 Ko kpamu ɗa baci vuza u varai vuza n katali ali ɗa u kuwa̱i, a̱yi feu wo okpo ta̱ vuza ma̱ga̱la̱ka̱, vuza ma̱ga̱la̱ka̱ va i ta̱ a kuna yi.
18 Ko kpamu ɗa baci u lapai vuza n kalangu ali ɗa u kuwa̱i, a̱yi feu wo okpo ta̱ vuza vu ma̱ga̱la̱ka̱, vuza vu ma̱ga̱la̱ka̱ va i ta̱ a kuna yi.
19 A̱yi na a unai toku ni va, a̱yi ɗa wa kuna vuza vu ma̱ga̱la̱ka̱ na wu unai toku ni va, ayin a na baci u ciya̱i ni.
20 Ɗa baci vuza wu unai toku ni adama e cishe'e, ko u tecengi ni n ucikali u ni, ko u varai ni n ili ali u kuwa̱i, na lo vuza vu ma̱ga̱la̱ka̱ ɗa,
21 ko kpamu ɗa baci u lapai ni n ka̱kun adama e cishe'e ali ɗa u kuwa̱i, a̱yi va vuza ma̱ga̱la̱ka̱ ɗa. Toku ni wi ta̱ a kuna yi, ayin na baci u ciya̱i ni.
22 <<Ama ɗa baci vuza wu unai vuza ba adama e cishe'e ba, ko utecengi, ko uvari n ucikali u ni ba,
23 ko kpamu u vara vuza n katali n uyevi u ni ba, ali ɗa u kuwa̱i, a na wo okpoi vurala ni ɗa ba, kpamu n ucikali u ni u ɗa u foro yi ba.
24 Nannai va uma i ta̱ a kuya'anka vuza vu ma̱ga̱la̱ka̱ va n vuza na wi a kuciga kutsupaka toku va afada tsu nampa.
25 Koɓolo ka uma ki ta̱ a kisa vuza vu ma̱ga̱la̱ka̱ va ekiye vuma na wu unai ni vuma va. Ka̱ta̱ o bonoko vuza ma̱ga̱la̱ka̱ va a̱ likuci i kusheɗeku i na u sumai u banai va. Ta ɗe u kuda̱sa̱ngu sapu ayin a na ganu vu gbayin na e erengi va u kuwa̱i.
26 Ama ɗa baci vuza vu ma̱ga̱la̱ka̱ va wu uta̱i u lazai kure ku likuci i kusheɗeku i na u sumai u banai va,
27 ɗa vuza na a unai ni vuma va u cinai ni a pulai vu likuci ya, wi ta̱ a kufuɗa kuna yi, kpamu na lo va wo kokpo unushi u munuka ba.
28 Vuza vu ma̱ga̱la̱ka̱ va mayun ɗa u da̱sa̱ngu a̱ likuci i kusheɗeku ya sapu ayin a na ganu gbayin u kuwa̱i, ta lo wa kufuɗa wo bono a kpa'a ku uka̱ni ku ni.
29 Na va wi ta̱ o kokpo ɗa̱ wila̱ n odoki a tsukaya n tsukaya a̱ ubuta̱ u na i da̱sa̱ngi dem.
30 <<Vuza na baci wu unai vuma, a̱yi feu i ta̱ a kuna yi derere n uteku tsu na ngan n tonoi. Ko vuza te a kuna adama a magan me te ma na ma dansai ba.
31 Ka̱ta̱ yi isa ikebe adama na yi isa wuma u vuza vu ma̱ga̱la̱ka̱ na u yawai kuna ba. Mayun ɗa a una vuza vu ma̱ga̱la̱ka̱.
32 Ka̱ta̱ yi isa ikebe adama a vuza na u sumai a kubana a̱ likuci i kusheɗeku, adama na a̱ ka̱sukpa̱ yi u bono a̱ likuci yu uka̱ni i ni kafu ukpa̱ u ganu gbayin ba.
33 Ka̱ta̱ i la̱nga̱sa̱ likuci i na a̱ɗa̱ yi ida̱shi ba. Adama a na munuka ma̱ tsu la̱nga̱sa̱ ta̱ iɗika, babu kpamu uye u yoku u na a kutakpaka iɗika i munuka nshinda̱, mayun ɗa a una vuza ma̱ga̱la̱ka̱ na wu unai vuma va.
34 Ka̱ta̱ i la̱nga̱sa̱ iɗika i na a̱ɗa̱ yi ida̱shi ba, iɗika i na mpa feu mi punu ida̱shi. Adama a na mpa Ka̱shile feu mi ta̱ punu ida̱shi a̱ ka̱tsuma̱ ka aza a Isaraila.>>