9
Ka̱ɗiva̱ ka kupasamgbanai
1 Vuzavaguɗu u ya'in kadanshi m Musa a kakamba ka Sinai, o wotoi u iyain a̱ ka̱ya̱ ke ire, ana a̱ uta̱i a iɗika i Masar, u danai,
2 <<Zuwa aza a Isaraila a ya'an Ka̱ɗiva̱ ka Kupasamgbanai ka nampa, a ayin a na o yotsoi.
3 A kanna ka kupa n ka̱ na̱shi ko wotoi u nampa, n kulivi, a ya'an ka̱ɗiva̱ ka kupasamgbanai tsu na wila̱ u danai.>>
4 Ɗa Musa u danai aza a Isaraila a ya'an Ka̱ɗiva̱ ka Kupasamgbanai.
5 Ɗa ta na a ya'in Ka̱ɗiva̱ ka Kupasamgbanai ka a kanna ka kupa n ka̱ na̱shi ko wotoi ka n kulivi, a kakamba ka Sinai. Aza a Isaraila a ya'in derere tsu na Vuzavaguɗu u danai Musa.
6 Ama aza o yoku e le a kuya'an Ka̱ɗiva̱ ka Kupasamgbanai ka a kanna ka nanlo ka ba, adama a na ka̱ta̱ a ciɗatangu ka̱ci ke le ba, ana wo okpoi a sa'wa ta̱ keven ki ikyamba ka vuma. Ɗaɗa a̱ ta̱wa̱i u Musa n Haruna a kanna ka nanlo ka,
7 ɗa a danai Musa va, <<Tsu sa'wa ta̱ keven ki ikyamba ɗa tsu ukai ka̱ci ka̱ tsu nshinda̱. Ama yiɗa̱i i kusa̱nka̱ tsu kuneke kune'e ku tsu u Vuzavaguɗu a kanna ka nanlo feu, koɓolo n aza a Isaraila a na a buwai?>>
8 Ɗaɗa Musa wu ushuki le, <<Ya'in bi'i n yeve i na Vuzavaguɗu u kudana adama a̱ ɗa̱.>>
9 Ɗa Vuzavaguɗu u ya'in kadanshi m Musa u danai,
10 <<Ya'an kadanshi n aza a Isaraila vu dana le, ɗa baci vuza yoku a̱ ka̱tsuma̱ ka̱ ɗa̱, ko a̱ ka̱tsuma̱ ka ntsukaya n ɗa̱ u sa'wai keven ki ikyamba ko u banai nwalu n da'in, wi ta̱ a kufuɗa kuya'an ka̱ɗiva̱ ka kupasamgbanai ka.
11 A ya'an ka̱ɗiva̱ ka a kanna ka kupa n ka̱ na̱shi o wotoi u ire n kulivi. A takuma ma̱giri koɓolo m boroji vu na vi n yisiti ba, n a̱vuku o okono kpamu.
12 Ka̱ta̱ a̱ ka̱sukpa̱ ili i nanlo ya asa ali a kubana usana u yoku ba, ko kpamu o ɓoso etele a̱ ni ba. I baci a kuya'an Ka̱ɗiva̱ ka Kupasamgbanai ka, u ga'an ta̱ o tono wila̱ u ni ra̱ka̱.
13 Ama ɗa baci vuza yoku vu na vi ciɗa, u ya'an kpamu nwalu ba ɗa u kpa̱ɗa̱i kuya'an Ka̱ɗiva̱ ka Kupasamgbanai ka. Mayun ɗa e pece vuma vu nanlo n uma a̱ ni, adama a na u tuka̱ n kune'e ku Vuzavaguɗu a ayin a na o yotsoi ba, mayun ɗa unushi u ni wo okpo a kaci ka̱ ni.
14 Komoci ki baci ida̱shi n a̱ɗa̱ ɗa u cigai kuya'an Ka̱ɗiva̱ ka Kupasamgbanai ka Vuzavaguɗu ka, mayun ɗa u tono wila̱ u kuya'an. Mayun ɗa wila̱ u vuza likuci n komoci feu wo okpo u te.>>
Keleshu ka na ka palai Ma̱va̱li ma̱ Ka̱shile
(Kut 40:34-38)
15 A kanna ka na a̱ shikpa̱i Ma̱va̱li ma̱ Ka̱shile ka, ɗa keleshu ka palai ka'a. N kulivi ali a kubana usana, ka̱ta̱ keleshu ka ko bono tsa akina.
16 Ta ka lya'i kelime n kuya'an nannai ayin tutu, ka pala ka'a n kanna, ka̱ta̱ n kayin kokpo tsa akina.
17 A ayin a na baci keleshu ka ka̱ ka̱sukpa̱i uɓon u Ka̱pa̱m wa, ka̱ta̱ aza a Isaraila o foɓuso kulaza, a̱ ubuta̱ u na baci ka shamgbai, ka̱ta̱ ele feu a̱ da̱sa̱ngu lo.
18 Nannai ɗa a̱ tsu ɗa̱nga̱ ka̱ta̱ a bana a̱ da̱sa̱ngu a̱ ubuta̱ u yoku tsu na Vuzavaguɗu u tsu zuwa le. Keleshu ka ka laza baci ka̱ ka̱sukpa̱ Ka̱pa̱m ka ba, ta lo ele feu o kuyongo a̱ ubuta̱ u na a̱ da̱sa̱ngi va.
19 Keleshu ka shamgba baci a gaɗi vu Ka̱pa̱m va ali ka ya'in ayin e re, aza a Isaraila i ta̱ o kuyongo lo ka̱ta̱ a ya'an i na i ga'in a ya'an a̱ ubuta̱ u Vuzavaguɗu.
20 A makyan mo yoku keleshu ka ke ci geshe a gaɗi vu Ka̱pa̱m ba, ele feu i ta̱ a kushamgba lo a̱ ubuta̱ wa tsu na Vuzavaguɗu u zuwai a ya'an. Ka̱ta̱ a̱ ta̱wa̱ a laza kpamu tsu na u danai le.
21 A makyan mo yoku kpamu keleshu ka ci shamgba ta̱ a̱ ubuta̱ u te n kulivi ali a kubana usana, ayin a na baci ka lazai n usana, ka̱ta̱ aza a Isaraila feu a laza. Ko n kayin ko n kanna, keleshu ka̱ ɗa̱nga̱ baci de dem, ele aza a Isaraila feu a̱ tsu ɗa̱nga̱ ta̱.
22 Ko keleshu ka ka shamgba baci a gaɗi vu Ka̱pa̱m va ali ayin e re ko wotoi, ko ka̱ya̱, ele aza a Isaraila feu i ta̱ o kuyongo a̱ ubuta̱ u na a̱ da̱sa̱ngi va babu kubana ubuta̱ u yoku. Ama ayin a na baci ka lazai, ele feu i ta̱ o kutono ka'a.
23 Tsu na Vuzavaguɗu u danai, ta a kulaza nannai, tsu na kpamu u danai a shamgba, ta a kushamgba nannai. O tonoi wila̱ u Vuzavaguɗu n kadanshi ka̱ ni nannai, tsu na a panai ka'a a̱ una̱ u Musa.