Katagarda ko
Obodiya
Kuɓa̱yuwa̱
Katagarda ke kenu ka nampa a ɗana ta̱ ka'a ayin atakaci, ana Urushelima u yikpa̱i a̱ ka̱ya̱ ka (586) kafu a matsa Yesu Kirisiti. Aza a Edom a na i a uɓon u ɗakai n tsugaɗi n Urushelima, ele irala ya aza a Yahuda i ɗa. A makyan ma na Urushelima u yikpa̱i, a ya'in ma̱za̱nga̱ n atakaci aza e le, a na a kupana asuvayali e le. Nannai koci ba ɗa a uwai a̱ pura̱i ucanuku u likuci wa, a̱ ɓa̱nka̱i aza a na a̱ tuka̱i likuci ya n kuvon. Obodiya u ya'in kene u danai, i ta̱ a kutakacika Edom, i ta̱ a kulya'a yi n kuvon tsu na a kuya'anka kagimi ka irala yi Isaraila.
Ili i na yi punu udari a katagarda ka nampa
1 Atakaci aza a Edom 1:1-14
1 Kanna ka Vuzavaguɗu 1:15-21
1
Kene ku uyikpi u Edom
1 Na ɗa akaka a Vuzavaguɗu Mala'imili a na Obodiya wu enei tsa alatani a ukuna wu iɗika i Edom.
A̱ suki vuza vu usuki uduniyan,
ɗa kpamu tsu panai akaka u Vuzavaguɗu a danai,
<<Ɗenga̱i tsu bana ci ya'an kuvon n iɗika i Edom.>>
2 Vuzavaguɗu u danai,
La̱na̱, n kubonoko wu ta̱ vu okpo kenu a̱ ka̱tsuma̱ ku uduniyan u na u buwai,
i ta̱ o goyo wu ko kenu ba.
3 A̱ra̱ɗi a̱ nu o doro wu ta̱ avu Edom,
avu na vi a̱ ida̱shi a kaɓatsu,
avu na vi a̱ ida̱shi a gaɗi vu nsasan m gbagba'in,
a ku dana a̱ ka̱ɗu ka̱ nu,
<<Yayi u kufuɗa kucipa̱ka̱ mu a iɗika?>>
4 Ko vi ishi baci vi ɗimkpai gaɗi tsu mashangi,
ko vi ishi vu ya'an kpa'a a̱ ka̱tsuma̱ ka azangata,
mi ta̱ o kurono wu ɗe n cipa̱ka̱ a iɗika.
5 Ɗa baci oboki a uwai a kpa'a ku nu,
ɗa baci kpamu aza a̱ ma̱ga̱la̱ka̱ a̱ ta̱wa̱i nu n kayin,
i ta̱ a kuɗika ili i na a cigai ɗa.
ɗa baci kpamu oboki a umaci wu nɗanga a uwai a kashina ka̱ nu,
kuɗayu ku ɗa a̱ kuka̱sukpa̱ka̱ wu koci,
6 Ama a̱ɗa̱ uma e Edom, kumaci ku Isuwa,
a una wu ta̱,
uciyi u ɗa̱ ra̱ka̱ a̱ pura̱ ta̱ u ɗa.
7 Uduniyan u na vu gbaɓai kaci n e le,
i ta̱ o kuloko wu a iɗika i nu.
i ta̱ a̱ kuya̱nsa̱ wu ka̱ta̱ a lya'a wu n kuvon.
a̱ja̱'a̱ a na vi a kulya'a ilikulya koɓolo n e le,
i ta̱ a ku azuku wu maza,
ka̱ta̱ a dana vi n ugboji ba.
8 Mpa Vuzavaguɗu n dana ta̱,
a kanna ka na n kutakacika Edom,
mi ta̱ a ku una aza a ugboji a Edom,
mi ta̱ a ku takpa aza e kuyeve a nsansa n Isuwa.
9 Teman, ovonshi a utsura a̱ nu i ta̱ a kupana wovon,
i ta̱ a ku una yaba dem a kusan ku Isuwa.
Unushi u Edom
10 Adama o kuyongo ku wuya ku na vu ya'ankai vuza nu Yakubu,
vi ta̱ o ku okpo n wono,
i ta̱ a ku una wu ra̱ka̱-ra̱ka̱.
11 A kanna ka nanlo vu shamgbai a kakambu a kinda,
a makyan ma na irala a̱ pura̱i u uciyi u ni,
omoci kpamu o ɓosoi a̱ utsutsu u ni,
ɗa a taɗuki kazagba adama a Urushelima,
avu feu vu okpoi tsu vuza te a̱ ka̱tsuma̱ ke le.
12 U ga'an vu ya'an ma̱za̱nga̱ adama atakaci a na vuza nu u uwai ba.
U ga'an vu ya'an ma̱za̱nga̱ adama atakaci aza a Yahuda a kanna ka na i a ku una le ba.
U ga'an vu zo'oso le a kanna ka a atakaci e le ba.
13 U ga'an vu uwa a̱ likuci i uma a̱ va̱,
a kanna ka na i atakaci ba,
u ga'an vu ya'an ma̱za̱nga̱ adama a̱ ma̱dukpa̱ ma na ma̱ ciya̱i vuza nu ba.
14 U ga'an vu shamgba a nsanji mu uye vu una aza a na a cigai a la'aka ba.
u ga'an vu neke aza a na a sumai a la'akai ekiye a irala i le,
a kanna ka na atakaci ke le ba.
Kanna ka Vuzavaguɗu ki ta̱ ɗevu
15 Kanna ka na mpa Vuzavaguɗu n kuya'anka, uduniya ra̱ka̱ afada ka yawa ta̱ ɗevu.
Avu Edom ili i na vu ya'in, i ta̱ feu a kuya'anka wu i ɗa.
Ili i na vu ya'in, yi ta̱ o kubono a ka̱ci ka̱ nu.
16 Tsu na i so'i atakaci,
a kusan ku ciɗa ku va̱,
ta feu uduniya u na u buwai a kutakacika nannai,
i ta̱ o ku so'o atakaci,
ali okpo adanshi ka̱ta̱ a ya'an le ba.
Ulya'i wa aza Isaraila a ukocishi
17 Ama i ta̱ a̱ kuciya̱ aza a na a la'akai a kusan ku Sihiyona,
wi ta̱ o ko okpo ubuta̱ wu ida̱shi i ciɗa.
Ka̱ta̱ kumaci ku Yakubu ku doku ku ciya̱ ili yi uka̱ni i le.
18 Kumaci ku Yakubu ki ta̱ kokpo tsa akina,
kpa'a ku Isufu tsu melentsu ma akina,
kpa'a ku Isuwa ko okpo ci'iwa̱,
i ta̱ o kusongu le una le.
Ko vuza u kula'aka ba,
mpa Vuzavaguɗu n dansai.
19 Aza a Isaraila a na i a Negebu,
i ta̱ a̱ kuka̱na̱ kusan ku Isuwa,
aza a na i a idashi aginda aza a Yahuda,
i ta̱ a ku isa iɗika ya aza a Filisitiya,
aza a Isaraila i ta̱ a kulya'a uka̱ni,
wu uɓon wi iɗika ya aza a Ifirayimu n Samariya.
kumaci ku Bayami kpamu ku lya'a Giliyadu.
20 Kabunda̱i ko osoji ka Isaraila a na a bankai ugbashi,
i ta̱ o kubono a̱ ka̱na̱ iɗika ya aza Kana'ana, ali a kubana a zarefatu.
Agbashi a na i a Urushelima a uɓon u Sefaradu
i ta̱ a ku isa likuci i Negebu.
21 Aza na a la'akai n wuma i ta̱ a ku gaɗukpa,
a kubana a kusan ku Sihiyona a Urushelima,
a̱ ka̱na̱ kusan ku Isuwa,
Vuzavaguɗu n ka̱ci ka̱ ni ɗa u kulya'a tsugono ɗe.