Katagarda ka 2 Arabali
Ukuna u katagarda ka nampa
Kuɓa̱yuwa̱
Katagarda ke ire ka Arabali ka̱ gita̱ ta̱ a̱ ubuta̱ u na katagarda ka iyain ka Arabali ko kotsoi, arabali a a̱ gita̱ ta̱ o tsugono tsu Sulemanu ali a kubana ukpa̱ u ni. Katagarda ka ke neke ta̱ arabali a ugbamukaci u na kumaci ka aza Isaraila a na i a uɓon u gaɗi a ya'ankai Rehobuwam, maku ma Sulemanu mogono, ukuna u vishili vu na Jerobuwam u shilika̱i n Rehobuwam. Arabali a, a shamgbai a ukuna u tsumani tsu tsugono tsu uɓon u ɗakai n Isaraila, ɗaɗa Yahuda, ali a kubana uyikpi u Urushelima a̱ ka̱ya̱ ka 586 Bc.
Ili i na yi punu ugeri
Tsugono tsu Sulemanu 1:1--9:31
a. A̱ya̱ a̱ ugiti 1:1-17
b. A ma'i A̱'isa̱ a gbayin 2:1--7:10
c. A̱ya̱ a ukocishi 7:11--9:31
Ugbamukaci u kumaci ku uɓon u gaɗi 10:1-1
Ngono n Yahuda 11:1--36:12
Uyikpi u Urushelima 36:13-23
1
Mogono Sulemanu u folonoi ugboji.
1 Ɗa Sulemanu kolobo ka Dawuda u zuwai tsugono ci ni tsu tsurukpai mayin, adama a na Vuzavaguɗu Ka̱shile ka̱ ni ki ta̱ koɓolo n a̱yi, ɗa u bonokoi ni vuzagbayin vu utsura.
2 Ɗa Sulemanu u ɗekei aza a Isaraila ra̱ka̱, u ya'in kadanshi n ele, uma a ele ɗa ovonshi osoji a̱kpa̱n-a̱kpa̱n n ovonshi osoji amangatawantawun n aya'infada n aza e kelime a Israila n aza e kelime a i'uwa yi Isaraila dem.
3 Ɗa Sulemanu n uma a na i koɓolo n a̱yi ra̱ka̱, a gaɗukpai a kubana a̱ ubuta̱ u kucikpa ɗe a Gibiyon, adama a na Ma̱va̱li mo oɓolo ma̱ Ka̱shile mi ta̱ ɗe, ma na Musa kagbashi ka Vuzavaguɗu ka ma'in e meremune.
4 Ama ci na ɗe Dawuda u ɗika akpati vu Ka̱shile ɗe a̱ likuci i Kiriyatu-jerimu a kubana a̱ ubuta̱ u na u foɓusokoi vu ɗa, adama a na u ya'anka ta̱ vu ɗa ma̱va̱li a Urushelima.
5 Ama katalikalyuka ka̱ viyum vu shili ka na Bezale kolobo ka Uri matsukaya ma̱ Huru u ma'in, ki ta̱ a Gibiyon e kelime ka akpati vu uzuwakpani vu Vuzavaguɗu. Ɗa Sulemanu n koɓolo ka uma ra̱ka̱ a cikpai Vuzavaguɗu ɗe.
6 Ɗa Sulemanu u kumbai a kubana a gaɗi vu katalikalyuka ka viyum vu shili ka, e kelime ka Vuzavaguɗu punu a̱ Ma̱va̱li moɓolo ma, ɗa u nekei alyuka o kusongu ka̱kpa̱n ɗe.
7 N kayin ka nanlo ɗa Ka̱shile ko ta̱wa̱i yotsongi ka̱ci ka̱ ni u Sulemanu u danai ni, <<Folono ili i na vu cigai dem n neke wu.>>
8 Ɗa Sulemanu wu ushiki Ka̱shile u danai,<<Vu yotsongu ta̱ ɗe esheku a̱ va̱ Dawuda ucigi u gbayin ɗa kpamu vu zuwai mu mo okpoi mogono a̱ una̱ u ni.
9 Gogo na, Vuzavaguɗu Ka̱shile, ya'an vu shatangu uzuwukpani u na vu ya'ankai esheku a̱ va̱ Dawuda. A na vu zuwai mu mo okpoi mogono u uma a̱ nu a na ka̱bunda̱i ke le ki tsu kubuta̱ ki iɗika.
10 mi ta̱ ufolu u nu neke mu kuyeve n ugboji tsu na ma kufuɗa ku tono n uma a̱ nu, adama a na yayi u kufuɗa kuguɓa uma a̱ a̱bunda̱i a̱ nu a nampa?>>
11 Ɗa Ka̱shile ku ushiki Sulemanu, u danai, <<Ana wo okpoi ili i nampa i ɗa ka̱ɗu ka̱ nu ka cigai, kpamu ve ece uciyi ko ili kukiye m tsugbayin ba, ko tana vu ece wuma wi irala i nu ko kpamu wuma wu ugaɗi adama a̱ ka̱ci ka̱ nu ba, ama ɗa vu ecei ugboji n kuyeve adama a na vu guɓa uma a̱ va̱ a na n zuwai nu vo okpo mogono me le,
12 adama a nannai, n kuneke wu ta̱ ugboji n kuyeve. Ka̱ta̱ kpamu n neke wu uciyi, ili i kukiye n tsugbayin tsu na babu mogono a̱ ka̱tsuma̱ ko ngono n na n lazai ɗe n sa'wai kuciya̱, kpamu babu mogono ma na ma̱ kuciya̱ tsu ɗa a̱ ka̱ca̱pa̱ ka̱ nu.>>
13 Ɗa Sulemanu u ka̱sukpa̱i ubuta̱ wa A̱'isa̱ a Gibiyon, a̱ Ma̱va̱li mo oɓolo, u bonoi a Urushelima. Ɗa ulya'i tsugono tsa aza a Isaraila.
Uciyi u Sulemanu
(1 Ng 10:26-29)
14 Ɗa Sulemanu u ɓolongi ekeke o odoku n akumbi e le, ɗa u ɓolongi ekeke odoku a̱kpa̱n amangatawun n amanga̱na̱shi (1,400), n odoku a̱kpa̱n kupa n ere (12,000), ɗa u zuwai o yoku a̱ likuci i na a tsu zuwa ekeke odoku, o yoku tankpamu a Urushelima.
15 Ɗa mogono ma zuwai azurufa n azanariya okpoi tsa atali a gbani a Urushelima, ta kpamu u zuwai nɗanga n Sida n yimkpai n ka̱bunda̱i tsu nɗanga mu nda̱ci n na mi a uɓon wa aginda aza a Yahuda nannai.
16 Ɗa Sulemanu u zuwa ta̱ a̱ tuka̱i n odoku a Masar a kubana e Kuwe. Ɗa aza a tsulaga o mogono a tsulai a ɗa a Kuwe.
17 Ɗa kpamu u zuwai a̱ tuka̱i n ekeke odoku a a̱ likuci i Masar. Vu za te dem a̱ una̱ wi ikebe azurufa amangatawa̱nta̱li (600), kodoku dem amangatawun n amangerenkupa (150). Nanai ɗa feu e denke yi ngono ma aza a Hitiya n ma aza a Siriya.