2
Ofoɓuso adama kuma ka̱ A̱'isa̱ a gbayin
1 Sulemanu u nekei kadanshi adama na a ma'a A̱'isa̱ a gbayin adama a kula ku Vuzavaguɗu n kefeku ko tsugono tsu ni.
2 Ɗa u zagbai uma a̱ kupura̱ ucanuku uma a̱kpa̱n amangatawencindere, (70,000) n aza a kuɓoso atali a nsansa uma a̱kpa̱n amangatawunkunla̱i, (80,000) n aza a̱ kula̱na̱ ulinga uma a̱kpa̱n a tatsu n amangatawa̱nta̱li, (3, 600).
3 Ɗa Sulemanu u suki n akaka a nampa u Hiram mogono ma Taya, u danai,<<Su'uku mu n nɗanga n sida tsu na vu su'uki esheku a̱ va̱ Dawuda adama a na u ma'aka ka̱ci ka̱ ni kefeku kana u kuda̱sa̱ngu.
4 La̱na̱, mpa ɗa na ofoɓuso adama na n ma'a A̱'isa̱ a gbayin n kula ku Vuzavaguɗu Ka̱shile ka̱ va̱, ka̱ta̱ me erengu ku ɗa adama o kusongu ili i ma̱gula̱ni m uyo'o wa̱ a̱ ni, n adama a kuzuwa boroji vu ciɗa a makyan dem, kpamu n adama alyuka a kune'e ku kusongu kulivi n usana, a kanna ka Ashibi koɓolo n ka̱ɗiva̱ ka wotoi u savu n ka̱ɗiva̱ kakau ka Vuzavaguɗu Ka̱shile ka̱ va̱ a kanna ka na a kiwanai. Nava wila̱ u ɗa adama aza a Israila a ayin dem.
5 A̱'isa̱ a gbayin a na mi a kuciga ku ma'a a gbayin a ɗa, adama a na Vuzavaguɗu Ka̱shile ka̱ tsu ka la'a ta̱ a̱ma̱li dem.
6 Ama yayi wa kufuɗa ku ma'aka yi A̱'isa̱ a gbayin, a na wo okpoi gaɗi a̱da̱nga̱shile a yawai ni ba? Mpa ɗa ya a na ma ku ma'aka yi A̱'isa̱ a gbayin, sai de m ma'a ubuta̱ u kusongu ili i ma̱gula̱ni.
7 Gogo na su'uku mu vuza na u keyevi ku ulinga wa azanariya n azurufa n iyim ishili n ilima̱ u yevei kpamu kutsungu usuni m ma̱ɗiya̱ n garula, ka̱ta̱ kpamu u fuɗa kuya'an iɗani, adama a na a̱ ta̱wa̱ a ya'an ulinga a uɓon u Yahuda a Urushelima koɓolo n eyevi a ulinga a̱ va̱, a na esheku a̱ va̱ Dawuda u la̱nsa̱i.
8 Ka̱ta̱ kpamu vu su'uku mu nu nɗanga n sida nu n Firi nu nɗanga m mandai ma aza a Lebano, adama a na n yeve ta̱ a na agbashi a̱ nu a fuɗa ta̱ kukiɗa ogboli mayin. N ciga ta̱ agbashi a̱ va̱ a ya'an ulinga koɓolo n agbashi a̱ nu,
9 adama na a̱ la̱nsa̱ka̱ mu ogboli n a̱bunda̱i, adama a na kpa'a ku na n cigai ku ma'a va, ki ta̱ o kugbonguro n ili i mereve.
10 Mpa n ku tsupa ta̱ agbashi a̱ nu a na a kiɗai ogboli a agisamkpatsu a̱kpa̱n kamanga (20,000) a ishina i usoyi n agisamkpatsu a bali a̱kpa̱n kamanga (20,000) n edele a̱ ma̱kya̱n a̱kpa̱n kamanga (20,000) n edele a mani'in ma zaitu a̱kpa̱n kamanga (20,000).>>
11 Ɗa Hiram mogono ma Taya wu ushuki Sulemanu punu a katagarda ka akaka ka, u danai, <<Adama a na Vuzavaguɗu u ciga ta̱ uma a̱ ni, ɗaɗa i zuwai ɗa u zuwai nu vo okpo mogono me le.>>
12 Ɗa Hiram u danai, <<N cikpa ta̱ Vuzavaguɗu Ka̱shile ki Isaraila, vuza na u ya'in gaɗi n iɗika, a̱yi vu na u nekei mogono Dawuda maku mu ugboji n cico'o n kuyeve, a̱yi na u kuma'aka Vuzavaguɗu A̱'isa̱ a gbayin n kefeku ko tsugono ci ni.
13 <<Gogo na mi ta̱ a̱ kusu'uku wu n Huram-abi, keyevi ka ulinga n a̱bunda̱i,>>
14 vuza na a̱na̱ku a̱ ni uta̱i a Dan, esheku a̱ ni kpamu vuza vu Taya. U fuɗa ta̱ ulinga ka̱u wa azanariya n azurufa n iyim ishili n iyim n atali n ogboli, n ku sura ku usuni n ku ma̱ɗiya̱ n garula, n kuyeve ku ulinga u tsugbere tsu singai. Wi ta̱ n kuyeve ki iɗani n a̱bunda̱i, u ya'an ta̱ iyoci yi igani i na e nekei ni dem, wi ta̱ a kuya'an ulinga n eyevi a ulinga a̱ nu koɓolo n aza a vuzagbayin va̱ Dawuda esheku a̱ nu.
15 <<Gogo na vuzagbayin vu su'uku agbashi a̱ nu n alkama m bali m mani'in m ma̱kya̱n tsu na vu ya'in uzuwukpani.
16 A̱tsu ci ta̱ a kukiɗa ka wu ogboli a Lebano a na vu cigai, ka̱ta̱ tsu gida̱la̱kpa̱ a ɗa a̱ kuta̱wa̱ a mala yeve tsu zorukpo a ɗa a̱ mini a kubana Jopa. Ka̱ta̱ a vu tankpamu vu ɗika a ɗa a kubana a Urushelima.>>
17 Ɗa Sulemanu u kecei ka̱bunda̱i ko omoci a na i punu a̱ ida̱shi a iɗika yi Isaraila, tsu na esheku a̱ ni Dawuda e kecei, ɗa u ciya̱i uma a̱kpa̱n amangatawun n amangerenkupa n a tatsu n amangatawun a̱ta̱li (153, 600.)
18 Ɗa u zagbai uma a̱kpa̱n amangatatsunkupa (70,000) okpoi aɗiki a ucanuku, uma a̱kpa̱n amanga̱na̱shi (80,000) tankpamu eshe'wi atali a nsansa, n aza a na a̱ kula̱na̱ ulinga wa uma a̱kpa̱n a tatsu n amangatawa̱nta̱li, (3,600).