23
Jowashi wo okpoi mogono
(2 Ng 11:4-16)
1 Ama a̱ ka̱ya̱ ke cindere ko tsugono tsu Ataliya, ɗa Jehoyida ganu u gbamai asuvu. Ɗa u ya'in uzuwakpani n kovonshi va amangatawun-amangatawun. Azariya kolobo ka Jeroham, n Ishima'ilu kolobo ka Jehohanan, n Azariya kolobo ka Obedu, n Ma'aseya kolobo ka Adayiya, n Elishafatu kolobo ka Zikiri.
2 Ɗa a̱ ka̱ra̱'i likuci i Yahuda ra̱ka̱ o ɓolongi aza e Levi a na i a̱ likuci i Yahuda, n aza e kelime ka i'uwa yi ikaya yi Isaraila a̱ ta̱wa̱i a Urushelima.
3 ɗa ra̱ka̱ vi le o ɓolongi A̱'isa̱ a gbayin a̱ Ka̱shile a ya'in uzuwakpani n mogono. Ɗa Jehoyida ganu u danai, <<Maku mo mogono ma'a na, ya'an wu okpo mogono, tsu na Vuzavaguɗu u ya'in uzuwukpani u danai, ntsukaya n Dawuda n ɗa koci a kulya'a tsugono.
4 Ili i na ya kuya'an i ɗanna, ayin a na baci anan ganu n aza e Levi a̱ ta̱wa̱i kuya'an ulinga a kanna ka kuvuka, ka̱tsura̱ ke te a̱ ka̱tsuma̱ ka tatsu inda utsutsu wa̱ A̱'isa̱ a gbayin a̱ Ka̱shile.
5 Ka̱tsura̱ ke te a̱ ka̱tsuma̱ ka tatsu a̱ ka̱tsuma̱ ka̱ ɗa̱, a bana e kefeku ko mogono, ka̱ta̱ ka̱tsura̱ ke te ka na ka buwai a̱ ka̱tsuma̱ ka tatsu a shamgba a utsutsu u na e ci ɗeke ugiti. Uma na a buwai tamkpamu o ɓolongu a ulanga wa̱ A̱'isa̱ a gbayin a Vuzavaguɗu.
6 Ka̱ta̱ i ka̱sukpa̱ vuza u uwa A̱'isa̱ a gbayin a Vuzavaguɗu ba, anan ganu a ɗa n aza e Levi a na i a kuya'an ulinga koci a ku'uwa, adama a na erengu le ta̱, ama aza n a buwai ra̱ka̱ o tono wila̱ u na Vuzavaguɗu u zuwakai le.
7 Aza e Levi i ta̱ a̱ ku ka̱ra̱'a̱ mogono ma, yaba dem wi ta̱ a̱ kuɓa̱na̱ kotokobi e kukiye ku ni, i ta̱ o kuyongo ɗevu n mogono wi baci a ku'uwa n ku uta̱. Vuza na baci u ta̱wa̱i ku'uwa a kpa'a ka, ka̱ta̱ una yi.>>
8 Ɗa aza e Levi koɓolo n aza Yahuda ra̱ka̱ a ya'in tsu na Jehoyida ganu u danai. Ɗa aza e kelime aza a kindi a, a shamgbatangi aza a na a̱ ɗa̱nga̱i ulinga n aza a na a̱ ta̱wa̱i kuka̱na̱ ulinga a kanna ka Ashibi. Adama a na Jehoyida ganu u ka̱sukpa̱ vuza u bana a kpa'a ba.
9 Jehoyida u nekei ovonshi nsara nu nra̱ga̱ n na mogono Dawuda ma ya'in ulinga nu n ɗa, n na a zuwai a kpa'a ku Ka̱shile.
10 Ɗa u zuwai uma ra̱ka̱ inda mogono, yaba dem n ucanuku u kuvon e kukiye ku ni, ili i na i ɗikai a kakambu ka uɓon u ɗakai a kubana a kakambu ka uɓon u gaɗi ka̱ A̱'isa̱ a gbayin a, ɗevu n katalikalyuka.
11 Ɗa Jehoyida ganu wu tuka̱i n Jowashi kolobo ko mogono, u ukai ni oroliko. Ɗa u neke ni katagarda ka uzuwakpani ka, ɗa a salai a̱yi ɗa mogono. Ɗa Jehoyida n muku n ni olobo erengi ni, ɗa a danai,<<Wuma u nu u geshe mogono.>>
12 Ana Ataliya u panai kaca'a ka uma a kubana n o bonoi n a ciɓalai mogono, ɗa u banai A̱'isa̱ a gbayin a Vuzavaguɗu a̱ ubuta̱ u uma wa.
13 U la̱na̱ki ɗa tana we enei mogono ma savu kashani a̱ ubuta̱ u na mogono ma ci shamgba ɗevu n mashilya mu utsutsu u kpa'a ka. Ovonshi n aza a̱ kulika̱ ishari uka̱ra̱'i n a̱yi, uma a̱ ubuta̱ kakau a̱ ma̱za̱nga̱ n a̱ lika̱i ishari, aza a ishipa n ucanuku u tsuwa'i u o kutono n ka̱ɗiva̱ ka. Ana Egbere Ataliya we enei nanai, ɗa u karai aminya a̱ ni ɗa u ɓosoi ka̱da̱uri n u danai, <<Ugbamukaci! ugbamukaci!>>
14 Ɗa Jehoyida u zuwai kovonshi ka̱ ka̱tsura̱ ka amangatawun, <<Kabana ka̱ tuka̱ n Egbere Ataliya ka̱ta̱ o tono n a̱yi a̱ mere m ovonshi, ka̱ta̱ una yaba dem vu na u tonoi ni.>> Adama a na ganu u dana ta̱, <<Ka̱ta̱ yi una Egbere Ataliya a̱ ubuta̱ wa̱ A̱'isa̱ a gbayin a̱ Ka̱shile ba.>>
15 Ɗa e reme ni a̱ utsutsu wo odoku a ulanga u kefeku, ta ɗe unai ni.
Jehoyida u lapulasakai ukuna u kutoni
(2 Ng 11:17-20)
16 Ɗa ganu Jehoyida u ya'in uzuwukpani u danai, a̱yi n uma ra̱ka̱ n mogono i ta̱ o ko okpo uma a Vuzavaguɗu.
17 Ɗa uma a ra̱ka̱ a banai a kpa'a ku Balu ɗa o ɓosoi ku ɗa. Ɗa a̱ fa̱da̱i katalikalyuka n a̱ma̱li a̱ ni, ɗa a u nai Matan ganu vu ka̱ma̱li ka e kelime ka katalikalyuka ka.
18 Ɗa Jehoyida u nekei aza e Levi a na i anan ganu a̱ la̱na̱ A̱'isa̱ a gbayin a Vuzavaguɗu. Ele ɗa mogono Dawuda u zuwai ya'an kune'e ka alyuka o kusongu u Vuzavaguɗu, tsu na wi uɗani a katagarda ka̱ wila̱ u Musa, i ta̱ kpamu a kuya'an ishipa n ma̱za̱nga̱ tsu na Dawuda u danai.
19 Ɗa kpamu u zuwai aza a kindi a̱ utsutsu wa̱ A̱'isa̱ a gbayin a Vuzavaguɗu, adama a na ka̱ta̱ vuza na wi nu nshinda̱ u uwa ba.
20 Ɗa ganu Jehoyida u zuwai ovonshi osoji amangatawun, n aza gbagbain n aza e kelime a̱ likuci n uma a iɗika ya ra̱ka̱, utuka̱i mogono A̱'isa̱ a gbayin a Vuzavaguɗu o tonoi n utsutsu u na wi a̱ ubuta̱ u na u la'i n ugaɗi ɗa a uwai a kpa'a ku mogono, ɗa a zuwai mogono ma̱ da̱sa̱ngi a kakuba ko tsugono.
21 Ɗa uma a iɗika ra̱ka̱ a ya'in ma̱za̱nga̱. Likuci i Urushelima kpamu i ciya̱i ida̱shi i ma̱ta̱na̱, adama a na una ta̱ Ataliya n kotokobi.