27
Jotam wo okpoi mogono ma Yahuda.
(2 Ng 15:35-38)
1 Jotam wi ta̱ n a̱ya̱ kamanga n a tawun a na wo okpoi mogono, ɗa u lyai tsugono a Urushelima a̱ya̱ kupa n a̱ta̱li. Kula ka̱ a̱na̱ku a̱ ni Jerusha mekere ma Zadoku.
2 Ɗa Jotam u ya'in ili i na i ga'in u Vuzavaguɗu, tsu na esheku a̱ ni Uziya u ya'in, ama a̱yi u uwa A̱'isa̱ a gbayin a Vuzavaguɗu adama a na u songu ili i ma̱gula̱ni tsu a̱ ni ba. Ama ɗa uma a lya'i kelime n ka gbani-gbani ke le.
3 A̱yi ɗa u ma'asakai utsutsu u gaɗi wa̱ A̱'isa̱ a gbayin a vuzavaguɗu u na wi a̱ ubuta̱ u na u la'i n ugaɗi ɗa kpamu u ya'in kuma'a ka̱ a̱bunda̱i a mashilya ma na mo tonoi n tsu kaginda ka Ofelu.
4 Ɗa u ma'asai likuci yi uɓon wa aginda a Yahuda, ɗa kpamu u ma'in nshilya mu gaɗi a̱ ubuta̱ u na wi kutsun.
5 Jotam kpamu u ya'an ta̱ kuvon n aza a Amona ɗa u ciya̱i ulya'i. A̱ ka̱ya̱ ka nanlo ka, ɗa u zuwai aza a Amona a tsupai utafu wa azurufa kilo a̱kpa̱n a tatsu n amangatawa̱na̱shi, (3,400) n aburuma a alkama ka̱kpa̱n, n aburuma a Bale feu ka̱kpa̱n (1,000). Ta aza Amona a̱ ka̱na̱i kutsupa nanai a̱ ka̱ya̱ ka̱ i re n ka̱ya̱ ka tatsu.
6 Ɗa Jotam u ka̱na̱i kutsurukpa adama na u ya'an ta̱ ili i na i ga'in a̱ a̱shi a Vuzavaguɗu Ka̱shile ka̱ ni.
7 Ulinga u na u buwai u Jotam n kuvon ku na u ya'in n tsu na u ya'in tsugono ci ni, yi ta̱ uɗani a katagarda ka arabali ko ngono mi Isaraila n Yahuda.
8 Jotam wi ta̱ n a̱ya̱ kamanga n a tawun a na wo okpoi mogono, ɗa u lya'i tsugono a Urushelima a̱ya̱ kupa n a̱ta̱li.
9 Jotam u bankai ukpisa̱ ɗa a̱ ciɗa̱ngi ni a̱ likuci i Dawuda. Ɗa Ahazu kolobo ka̱ ni ko okpoi mogono a una̱ u ni.