3
Sulemanu u gita̱i kuma'a A̱'isa̱ a gbayin
1 Ɗa Sulemanu u gita̱i kuma'a A̱'isa̱ a gbayin a Vuzavaguɗu a Urushelima a gaɗi vu kusan ku Moriya. A̱ ubuta̱ u na Vuzavaguɗu u gasai n esheku a̱ ni Dawuda. U ma'in ɗe A̱'isa̱ a gbayin, a ulanga u kulapu ku Oruna vuza vu Jebusiya.
2 U gita̱i kuma'a ka a kanna ka ire ko wotoi u ire a̱ ka̱ya̱ ka̱ na̱shi ko tsugono ci ni.
3 Tsu na Sulemanu u gisanki kuma'a ka A̱'isa̱ a gbayin. Uɗa̱ngi u ni udashi amanga̱na̱shinkupa, wanshi tankpamu udashi kamangankupa n mekecu ma cau.
4 Kefeku ka na ki e kelime ka̱ A̱'isa̱ a gbayin a, wanshi u ni derere ɗa wi n wanshi u kpa'a ka udashi kamangankupa, uɗa̱ngi u ni udashi amangatawun n amanga̱na̱shi (180). Ɗa a surai asuvu e kefeku ka n azanariya koci.
5 Ɗa u gerei nɗanga n Firi punu a̱ kunu ku gbayin ka, ɗa u surai n ɗa n azanariya koci, ɗa u ka̱ra̱i ɗe ululu a nshuwa gaɗi va n ikani.
6 Ɗa u kalai A̱'isa̱ a gbayin a n atali a singai azanariya a na a̱ tuka̱i a iɗika i Paravayim.
7 Ɗa u surai kasaka ka̱ A̱'isa̱ a gbayin ka n aburakpatsu, iga̱'in yi utsutsu, n utsutsu wa̱ A̱'isa̱ a gbayin a n azanariya, ɗa a̱ ka̱ra̱i ɗe i corobi a kasaka ka.
8 Ɗa u ma'i mololo ma ciɗa, ugaɗi u ni derere n wanshi wa̱ A̱'isa̱ a gbayin a, ugaɗi u ni udashi kamangankupa, wanshi feu udashi kamangankupa. Ɗa u surai asuvu a kasaka a n azanariya koci a na a yawai ngura amangatawa̱nta̱li, (600).
9 A̱miki a ikusa ya azanariya a yawa ta̱ kilo amangatawantawun n amangatatsunkupa, (570). Ɗa u surai kunu ku gaɗi ka n azanariya.
10 Ɗa Sulemanu u she'wei i Corobi ɗa u surai le n azanariya u zuwai punu asuvu o mololo ma ciɗa ma.
11 Ubapi we evelyu i Corobi ya, ɗa baci a̱ ba̱ra̱kpa̱i le a yawa ta̱ udashi kamangankupa. Adama a na ugaɗi u kuvelyu kute ku yawa ta̱ udashi u cindere n kagimi. Ɗa Corobin vu te u bapai kuvelyu ku ni ɗa sa'wai kasaka ka̱ A̱'isa̱ a gbayin a, ɗa u bapai kuvelyu kute ku ni kpamu ɗa ku sa'wai ku vu toku vu ni.
12 Ta feu Corobin vu i re va u bapai kuvelyu ku te ku ni u sa'wai kuvelyu ku vu toku vu ni, ɗa kpamu u bapai kuvelyu ku te ɗa u sa'wai kasaka ka̱ A̱'isa̱ a gbayin a, kuvelyu ka feu udashi u cindere u ɗa n kagimi.
13 Wanshi we evelyu i Corobin i re ya ɗa baci a bapai le a yawa ta̱ udashi kamangankupa. Icorobi ya i ta̱ kashani a kinda utsutsu u kunu ku gbayin ka.
14 Ɗa Sulemanu u ya'in kakashi ku utsutsu ko mololo ma ciɗa n arikinla a̱ mini mu usuni n mini ma̱ ma̱ɗiya̱ n garula, n tsugbere tsu singai. Ɗa kpamu u ka̱ra̱i ɗe i Corobi ya a kakashi ka.
Ashamkpatsu e re a iyim ishili.
(1 Ng 7:15-22)
15 Sulemanu u ya'in ashamkpatsu e re a iyim ishili e kelime ka̱ A̱'isa̱ a gbayin a, uɗa̱ngi u kashamkpatsu dem u yawa ta̱ udashi kamanga n u cindere. Kashamkpatsu dem ki ta̱ n kobisho ka na uɗa̱ngi u ni u yawai udashi u cindere n kagimi.
16 Ɗa u kalai kobisho ka kashamkpatsu dem n igani yi ikani i na a ca'i i na i ka̱ra̱'a̱ ka̱ kobisho ashamkpatsu a. Ɗa kpamu u ka̱ra̱i ɗe umaci u ruman amangatawun (100) paki n ikani ya.
17 Ɗa a̱ shikpa̱i ashamkpatsu a, e kelime ka A̱'isa̱ a agbayin. Kashamkpatsu ka na ki a uɓon u ɗakai, u ɗekei ka'a Jakin, ka na ki uɓon u gaɗi, u ne'i ka'a kula Bowazu.