36
Jehowahazu wo okpoi mogono ma Yahuda
(2 Ng 23:31-35)
1 Aza a Yahuda a ɗikai Jehowahazu kolobo ko mogono ɗa a zuwai ni tsugono a̱ una̱ we esheku a̱ ni a Urushelima.
2 Jehowahazu wi ta̱ n a̱ya̱ kamanga n a tatsu a na wo okpoi mogono, Ɗa u lyai tsugono a Urushelima wotoi u tatsu.
3 Ɗa Neko mogono ma̱ Masar ma̱ cipa̱ka̱i ni, ɗa u zuwai uma iɗika i Yahuda a tsupa utafu wa azurufa kilo a̱kpa̱n a tatsu n amangatawa̱na̱shi, (3,400) n azanariya kpamu kilo kamangankupa n a̱na̱shi.
4 Ɗa mogono ma Masar u zuwai Eliyakimu vangu vu Jehowahazu, wo okpoi mogono ma Urushelima n Yahuda ɗa u saba'a ni kula, Jehoyakim. Ɗa u ɗikai Jehowahazu u bankai a Masar.
Jehoyakim wo okpoi mogono ma Yahuda
(2 Ng 23:36; 24:7)
5 Jehoyakim wi ta̱ n a̱ya̱ kamanga n a tawun a na wo okpoi mogono. Ɗa u lya'i tsugono a Urushelima a̱ya̱ kupa n kete. Ama u ya'an ta̱ ka gbani-gbani u Vuzavaguɗu Ka̱shile ka̱ ni.
6 Ɗa kpamu Nebukanezaru mogono ma Babila mo doku ma bankai Jehoyakim n kuvon, ɗa ushiyi ni n ikani yi iyum ishili u bankai ni a Babila.
7 Ɗa Nebukaneza kpamu u pura̱i ucanuku wa̱ A̱'isa̱ a gbayin a Vuzavaguɗu u bankai a Babila, u zuwai u ɗa a kpa'a ku mogono ma Babila.
8 Ulinga u na u buwai u Jehoyakim n ili yi unata ukuna u kavama u na u ya'ansai, n unushi u na a̱ remei ni n uɗa, yi ta̱ uɗani a katagarda ko ngono mi Isaraila n ma Yahuda. Yeve ɗa kolobo ka̱ ni Jehoyakini wo okpoi mogono a̱ una̱ u ni.
Jehoyakini wo okpoi mogono ma Yahuda
(2 Ng 24:8-17)
9 Jehoyakini wi ta̱ n a̱ya̱ kunla̱i a na wo okpoi mogono. Ɗa u lya'i tsugono a Urushelima wotoi u tatsu n ayin kunla̱i. A̱yi feu ɗa u ya'in ka gbani-gbani n a̱bunda̱i a̱ a̱shi a Vuzavaguɗu.
10 Ana ka̱ya̱ ko bonoi ɗa mogono Nebukanezaru u suki a bana a̱ tuka̱i ni a Babila n ucanuku u singai wa̱ A̱'isa̱ a gbayin a Vuzavaguɗu. Ɗa u zuwai Zedekiya esheku e ke'en a Jehoyakini wo okpoi mogono ma Yahuda n Urushelima.
Zedekiya wo okpoi mogono ma Yahuda
(2 Ng 24:18-20; Ir 52:1-3)
11 Zedekiya wi ta̱ n a̱ya̱ kamanga n ke te a na wo okpoi mogono. Ɗa ulya'i tsugono a Urushelima a̱ya̱ kupa n kete.
12 Ɗa u ya'in ka gbani-gbani a̱ a̱shi a Vuzavaguɗu Ka̱shile ka̱ ni, u kpa̱ɗa̱i kugoyo ka̱ci ka̱ ni e kelime ka keneki Irimiya a makyan ma na wi a kudana yi kadanshi ka na Vuzavaguɗu u dansai.
13 Ɗa kpamu u ya'ankai mogono Nebukanezaru ugbamukaci, ali ɗa u gutsai ni u kucina n kula ku Vuzavaguɗu a na wa kuya'anka yi kasingai. Ama ɗa Zedekiya u ya'in ugbamukaci, u iwain kushika̱ unushi u ni u bono u Vuzavaguɗu Ka̱shile ki Isaraila.
14 Ta feu nannai aza e kelime a anan ganu n uma okpoi aza a unambi wu usuɓi, o kutono ili yi unata wu uduniya. Ɗa a̱ natukpai A̱'isa̱ a gbayin a Vuzavaguɗu a na we erengi a Urushelima.
15 Ɗa Vuzavaguɗu Ka̱shile ki ikaya i le ka ka̱na̱i ku su'uku le n eneki, adama a na wi ta̱ a kupana asuvayali a uma a̱ ni n ubuta̱ wi ida̱shi i ni.
16 Ama ɗa a̱ ka̱na̱i ku zo'oso alingata a Vuzavaguɗu, o goyoi kadanshi ka Vuzavaguɗu, ɗa a̱ ka̱na̱i ku zo'oso eneki a̱ ni, ɗa Vuzavaguɗu u ya'in wupa n uma a̱ ni, u na babu vuza na u ka̱na̱sa̱ yi.
A bankai Yahuza tsugbashi
(2 Ng 25:8-21; Ir 39:8-10; 52:12-30)
17 Adama nannai ɗa Ka̱shile ka zuwai mogono ma Babila ma bankai le n kuvon, ɗa wu unai olobo u tsura e le n otokobi punu A̱'isa̱, u pana asuvayali o kolobo ko mekere ko mokoshi, ko aza babu utsura. Ka̱shile ke nekei le ra̱ka̱ ekiye a Nebukaneza mogono ma Babila.
18 Ɗa u pura̱i ucanuku u na wi punu A̱'isa̱ a gbayin a̱ Ka̱shile u gbagbain n kenke'en n uciyi u na wi punu A̱'isa̱ a gbayin a Vuzavaguɗu n u mogono nu nkoshi m gba̱ra̱-gba̱ra̱ ra̱ka̱ u bankai a Babila.
19 Ɗa osongi A̱'isa̱ a gbayin a Vuzavaguɗu, ɗa a̱ fa̱da̱i mashilya ma Urushelima, ɗa o songi i'uwa i mogono ra̱ka̱, n ucanuku u singai u ni ra̱ka̱.
20 Aza a na a la'akai, mogono ma̱ pura̱i le a kubanka ugbashi a Babila. Ɗa okpoi agbashi a̱ ni n agbashi a̱ muku n ni, ali a ayin a na iɗika i Pashiya i ciya̱i tsugono,
21 Ili i nampa i gita̱ ta̱ adama a na a shatangu kadanshi ka Vuzavaguɗu ka na u ya'in a̱ una̱ u keneki Irimiya. Ɗa iɗika ya i ciya̱i wuvuki wu ayin Ashibi a̱ ni, ida̱shi ya atakaci, ali a kubana a̱ya̱ amangatatsunkupa a na o kotsoi,
22 A̱ ka̱ya̱ ka iyain ko tsugono tsu Sayirus mogono ma Pashiya, Ɗa Vuzavaguɗu u zuwai ka̱ɗu ko mogono Sayiru u zuwa yi ni u usala ka a a uɓon u tsugono u ni ra̱ka̱, adama a na a shatangu kadanshi ka Vuzavaguɗu ka na u ya'in a̱ una̱ u Irimiya. ka̱ta̱ kpamu a ɗanai ka'a.
23 <<Ili i na Sayiru mogono ma Pashiya ma salai i ɗanna, u danai, <Vuzavaguɗu Ka̱shile ka zuva, ke neke mu ta̱ tsugono tsu aduniyan ra̱ka̱, ɗa u zagbai n ma'aka yi a A̱'isa̱ a gbayin a Urushelima a iɗika i Yahuda. Ka̱sukpa̱ yaba dem na wi vuma vu Ka̱shile a̱ ka̱tsuma̱ ka̱ ɗa̱, ya'an Vuzavaguɗu u yongo koɓolo n a̱yi.> >>