7
Erengi A̱'isa̱ a gbayin
(1 Ng 8:62-66)
1 Ana Sulemanu u kotsoi kuya'an avasa ɗa akina uta̱i gaɗi o songi alyuka ku kusongu n alyuka o yoku, ɗa tsugbayin tsu Vuzavaguɗu tsu shanai punu A̱'isa̱ a gbayin a.
2 Anan ganu a fuɗa a uwa punu a kpa'a ku Vuzavaguɗu ka ba, adama a na tsugbayin tsu Vuzavaguɗu tsu shana ta̱ kpa'a ka.
3 Ana aza a Isaraila ra̱ka̱ enei akina a̱ cipa̱i n tsugbayin tsu Vuzavaguɗu A̱'isa̱ a gbayin a, ɗa a̱ za̱lika̱i n aci e le a iɗika, a lya'i kayala ɗa a cikpai Vuzavaguɗu, a danai, <<Vuzavaguɗu vuza kasingai ɗa, ucigi u ni u tsu saba'a ba ko wannai.>>
4 Ɗa mogono koɓolo n uma ra̱ka̱ aya'in alyuka u Vuzavaguɗu.
5 Mogono Sulemanu u ya'in alyuka n obomburon a̱kpa̱n kamanga n ere (22,000) nu nkyon nu nraɗika a̱kpa̱n amangatawun n kamanga (120,000). Ɗa mogono n uma ra̱ka̱ erengi A̱'isa̱ a gbayin a̱ Ka̱shile.
6 Anan ganu a shamgbai a̱ ubuta̱ u na a zuwai le, aza e Levi feu a shamgbai n ucanuku u tsuwa'i n ili yi ilikushi i na mogono Dawuda u ya'in adama a ishipa i kucikpa Vuzavaguɗu, n a danai, ucigi u Vuzavaguɗu u na u tsu saba'a ba ko wannai. A ya'in ishipa i kucikpa Vuzavaguɗu n ucanuku wu iwashi tsu na Dawuda u danai le, aza a na i a kinda aza e Levi a shamgbai a̱ lika̱i ishari, a makyan ma na aza a Isaraila i kashani.
7 Ɗa Sulemanu wu erengi mere mu ulanga mu ma̱ A̱'isa̱ a gbayin a Vuzavaguɗu, ta ɗe u ya'in kune'e ku kusongu n ushuma u kune'e ku ma̱ta̱na̱, u ya'an ta̱ nannai adama a na katalikalyuka ka iyum ishili ya ka̱ gusa̱ ta̱, ka'a ka ɗika kune'e ku kusongu n kune'e ki ishina n ku ushuma wu nnama ba.
8 Ɗa Sulemanu u zuwai a ya'in ka̱ɗiva̱ ka ayin e cindere, aza a Isaraila o ɓolongi ra̱ka̱, adama a na ka̱ɗiva̱ ka gbangam ka'a, uma uta̱i da'in ili i na i ɗikai ku'uwatai ku Hamatu n uɓon u kasana a kubana a̱ ka̱ra̱'a̱ e kure'e ka aza a Masar n uɓon u ɗakai.
9 A kanna ka̱ kunla̱i a ya'an koɓolo kagbayin, adama a na a ya'an ta̱ ɗe ayin e cindere a̱ ka̱ɗiva̱ ke kerengu ku katalikalyuka. Ɗa kpamu o doku a ya'in ka̱ɗiva̱ ka ayin e cindere.
10 A kanna ka kamanga n ka tatsu ko wotoi u cindere, ɗa Sulemanu u ka̱sukpa̱i uma o bono a i'uwa i le, n ma̱ta̱na̱ m ma̱za̱nga̱ adama a kasingai ka na Vuzavaguɗu u nekei Dawuda n Sulemanu koɓolo n uma a̱ ni aza a Isaraila.
Vuzavaguɗu u doku u yotsongi ka̱ci ka̱ ni u Sulemanu
(1 Ng 9:1-9)
11 Ta Sulemanu u kotsoi kuma'a A̱'isa̱ a gbayin a Vuzavaguɗu n kefeku ko tsugono ka nannai, u ciya̱i ulya'i a ili i na u sheshei kuya'an a̱ ka̱ɗu ka̱ ni A̱'isa̱ a gbayin a Vuzavaguɗu n kefeku ko tsugono ka̱ ni.
12 Ɗa Vuzavaguɗu u doku u yotsongi ka̱ci ka̱ ni u Sulemanu n kayin u danai ni. <<M Pana ta̱ avasa a̱ nu kpamu n zagba ta̱ ubuta̱ u nampa wa adama a̱ ka̱ci ka̱ va̱, wo okpo A̱'isa̱ a kuya'an alyuka.
13 Ɗa baci n kpanduki gaɗi ali ɗa a̱ kpa̱ɗa̱i kuyo'o mini, ko ɗa baci n suki akyun a takuma ica̱'a̱shi yi iɗika, ko n suku baci m ma̱dukpa̱ a̱ ubuta̱ u uma a̱ va̱,
14 ɗa baci uma a na e ci ɗeke n kula ku va̱, o goyoi ka̱ci ke le, a vasai, a̱ la̱nsa̱i a̱shi a̱ va̱, a̱ ka̱sa̱kpa̱i ukuna u gbani-gbani u le, mi ta̱ a kupanaka le ɗe gaɗi, ka̱ta̱ n cinukpaka le unushi u le, m potsokpo iɗika i le.
15 Gogo na a̱shi a̱ va̱ i ta̱ a̱ kuyongo upaɗukpi, ka̱ta̱ n zuwa atsuvu m pana avasa a na a kuya'an a̱ ubuta̱ u nampa.
16 Adama a na n zagba ta̱ ɗe A̱'isa̱ a nampa ɗa kpamu merengi aɗa, adama a na a cikpa kula ku va̱ a̱ ubuta̱ u nampa ko wannai. A̱shi a̱ va̱ n ka̱ɗu ka̱ va̱ i ta̱ o yongo ɗe ko wannai.
17 Ama avu, ɗa baci vu tonoi mu tsu na esheku a̱ nu Dawuda u ya'in, ɗa kpamu vu ya'in ili i na n danai nu vu ya'an, vu tonoi wila̱ u va̱ n ili i kutono,
18 mi ta̱ a kuzuwa ntsukaya n nu n lya'a kelime n kulya'a tsugono ko wannai tsu na n ya'ankai n esheku a̱ nu Dawuda uzuwakpani n danai, <I a kunamba vuza vu na u kulya'a tsugono a Isaraila ba a kpa'a ku nu.>
19 <<Ama ɗa baci ntsukaya n nu n kpatalai a iwain kutono wila̱ u va̱ n ili i kutono i va̱ i na n tonokoi ɗa̱, ɗa i bonoi i tonoi a̱ ma̱li o yoku ali i cikpai le,
20 mi ta̱ a kutakpa ɗa̱ uma a̱ va̱ aza a Isaraila a iɗika i na n nekei ɗa̱. A̱'isa̱ a gbayin a na merengi adama a na a cikpa kula ku va̱ mi ta̱ a kutakpa a ɗa, n bonoko a ɗa okpo ili i ma̱ka̱n n ili i kadanshi a̱ ubuta̱ u uma ra̱ka̱.
21 Ko a na wo okpoi A̱'isa̱ a gbayin a̱ ciya̱ ta̱ tsugbayin gogo na, makyan ke nu vuza na baci u walai ɗa wu enei wi ta̱ a kunamba ili i kudansa ka̱ta̱ u taɗa ka̱curu u dana, <Yiɗa̱i i zuwai ɗa Vuzavaguɗu u ya'ankai A̱'isa̱ a gbayin a nampa n iɗika i nampa nannai?>
22 Uma i ta̱ a̱ ku ushuku a dana, <Adama a na a iwan ta̱ Vuzavaguɗu, Ka̱shile ke le ka na ka̱ utukai le a iɗika i Masar, ɗa o bonoi o tonoi a̱ma̱li o yoku a kucikpa le. Ɗaɗa i zuwai ɗa Vuzavaguɗu u tuka̱i le n atakaci a nampa ra̱ka̱.> >>