Katagarda ka̱
RUTI
Kuɓa̱yuwa̱
Arabali a nampa a a̱ ta̱wa̱ ta̱ a ayin e te n arabali a na i uɗani a Katagarda ka Afada, ayin a na aza a Isaraila a̱ shirikpa̱ka̱i Ka̱shile kucina̱. Ushirikpi u kucina̱ u le u nampa wa, u ronoko le ta̱ atakaci. Katagarda ka̱ Ruti ko yotsongu tsu ta̱ ci yeve an Ka̱shile ka'a ka tsu zuwaka aza a na e nekei ka̱ci ke le wa̱ ni una̱singai. Ruti va aza a Mowabu feu u ciya̱ ta̱ una̱singai u nampa wa ali ɗa u ciya̱i ku'uwa a kumaci ka aza a Isaraila.
Uka̱ni u kpa'a ku Elimeleki tsu na Buwazu u ɗikai Ruti wo okpoi ni vuka, u yotsongu tsu ta̱ a na ukuna wu uka̱ni wa, u ɗaɗa kaci ka kadanshi punu a katagarda ka nampa (Indanai 4:2-10). Uka̱ni u vuka vu nampa u ɗaɗa u tuka̱i n kumatsa Obedu, a kaya a Dawuda, mogono ma gbayin mi Isaraila, vuza na kpamu wo okpoi koko vi Yesu Kishi.
Ili i na yi punu a katagarda ka nampa:
Nomi u bonoi a Batalami koɓolo n Ruti 1:1-22
Ruti u gasai m Buwazu 2:1 3:18
Buwazu u zuwai Ruti 4:1-17
Kumaci ku Buwazu n Dawuda 4:18-22
1
Elimeleki n aza a kpa'a a̱ ni a lazai a kubana a Mowabu
1 M megeshe, a ayin a na aya'in afada i o tsugono ci Isaraila, a ya'an ta̱ kambulu a iɗika yi Isaraila. Ɗa vuma vi yoku, vuza va aza Batalami a Yahuda, u ɗikai vuka vu ni m muku n re n ni, adama a na a bana a da̱sa̱ngu a ya'an makyan kenu a iɗika i Mowabu.
2 Kula ku vuma ka ku ɗaɗa Elimeleki n kula ku vuka vi ni feu Nomi, ula a̱ muku n re e le a ɗaɗa Malonu n Kiliyonu, ele aza a Efarata a ɗa a na a̱ uta̱i a Batalami vi Yahuda. Ɗa a banai a iɗika i Mowabu adama a na a̱ da̱sa̱ngu ɗe.
3 Ɗa Elimeleki vali vu Nomi u kuwa̱i, u ka̱sukpa̱i ni m muku n re n ni.
4 Ɗa muku ma, a zuwai nkere ma aza a Mowabu, Orufa n Ruti. Ana a yawai ɗevu n a̱ya̱ kupa n ida̱shi ubuta̱ wa,
5 ɗa Malonu koɓolo Kiliyonu feu a̱ kuwa̱i, ɗa a̱ ka̱sukpa̱i Nomi ende'en ni, babu vali kpamu babu muku.
Nomi n Ruti o bonoi a iɗika i Batalami
6 Megeshe kenu ɗa Nomi u panai a danai, Vuzavaguɗu u ɓa̱nka̱ ta̱ aza ni n ilikulya ba̱ri, ɗa u sheshei an wa ka̱sukpa̱ likuci i Mowabu. Ɗa o foɓusoi adama a na o bono a kpa'a n ejene a̱ ni.
7 N ejene a̱ ni ere u ka̱sukpa̱i ubuta̱ u na wi ishi a̱ ida̱shi, ɗa a̱ ka̱na̱i uye o kubono a Yahuda.
8 Ɗa Nomi u danai le, <<Bonoi a i'uwa yi mmaci n ɗa̱. Ka̱sukpa̱ Vuzavaguɗu u ya'an ka ɗa̱ kasingai uteku tsu na i ya'ankai mu kasingai n ali a̱ ɗa̱ a na a̱ kuwa̱i ɗe.
9 Ka̱sukpa̱ Vuzavaguɗu u ɓa̱nka̱ ɗa̱ i ciya̱ ali o kolo o yoku, adama a na i ciya̱ kpa'a ku ka̱ci ka̱ ɗa̱ kpamu.>> Ɗa Nomi wo oɓongi le ɗa e pecemgbenei. Ama ɗa a̱ ka̱na̱i ma̱shi.
10 Ɗa a danai ni, <<A̱'a̱, a̱ tsu ci ta̱ o kutono wu tsu bana a̱ ubuta̱ u uma a̱ nu.>>
11 Ɗa Nomi u danai, <<Walai i bono a kpa'a, ejene a̱ va̱. Adama a̱ yiɗa̱i ɗa yi o kutono mu? A̱ɗa̱ ye ene ta̱ mpa m buwa o kudoku kumatsa muku n na yo kolo?
12 Walai i bono a kpa'a ku ɗa̱, adama a na mpa n kutsa ɗe ana mo kudoku ma ya'an yolo kpamu. Ko ɗa baci n ciya̱i vali vu na mo kudoku mo kolo, ko anana ɗa baci n ciya̱i vali vu na mo kolo, ka̱ta̱ m matsa muku mo olobo,
13 yi ta̱ a kuvana le ali o gbonguro? Nannai va u kusa̱nka̱ ɗa̱ ta̱ kuya'an yolo i yoku? A̱'a̱ ejene a̱ va̱, una̱mgbuka̱tsuma̱ u va̱ u la'a ta̱ u ɗa̱, adama a na Vuzavaguɗu ɗa u sheshei kuya'an tsurala nu mpa, ɗa u zuwai mu n takacika.>>
14 Ɗa kpamu o doku a̱ gita̱ngi ma̱shi ka̱u. Ɗa yeve Orufa wo oɓongi a̱na̱ku e le, ɗa e pecemgbenei u lazai, ama ɗa Ruti u iwain, ɗa u tonoi ni.
15 Ɗa Nomi u danai ni, <<Ruti toku nu kejene u kpatala ta̱ o kubono a̱ ubuta̱ wa̱ aza ni n a̱ma̱li a̱ ni. Avu feu kpatala vu tono yi.>>
16 Ama ɗa Ruti wu ushuki, <<Ɗa u danai ka̱ta̱ vu folono mu n ka̱sukpa̱ wu ba, ko vu sa̱nka̱ mu kutono wu ba. Ubuta̱ u na de dem vu dasai mpa feu mi ta̱ a kudasa. Ubuta̱ u na de dem vu da̱sa̱ngi, mpa feu mi ta̱ a̱ kuda̱sa̱ngu. Uma a̱ nu i ta̱ o kokpo uma a̱ va̱, ka̱ta̱ Ka̱shile ka̱ nu kpamu kokpo Ka̱shile ka̱ va̱.
17 Ubuta̱ u na de dem vu kuwa̱i, mpa feu ta lo ma̱ kukuwa̱, ta lo feu a̱ kuciɗa̱ngu mu. Ka̱sukpa̱ Vuzavaguɗu u takacika mu ka̱u, ɗa baci n ka̱sukpa̱i ili i yoku i pecei mu n avu sai ukpa̱'a̱ koci.>>
18 Ana Nomi u zukai an Ruti u sheshe ta̱ an wa tono yi, ɗa u kpa̱ɗa̱i kudoku kudana yi u kpatala.
19 Ɗa a lyai kelime nu nwalu ali a yawai a Batalami. Ana a yawai ɗa likuci ra̱ka̱ i ya'in ma̱za̱nga̱, ɗa a̱ma̱ci a̱ likuci a danai, <<Na va Nomi ɗa gaji?>>
20 Ɗa wu ushiki u danai le, <<Ka̱ta̱ i doku i ɗeke mu Nomi ba, ama ɗekei mu Mara, adama a na Mala'imili ma zuwa ta̱ wuma u va̱ wo okpoi n okono.
21 A ayin a na n ka̱sukpa̱i na, mi ta̱ n uciyi wa̱ a̱bunda̱i, ama Mala'imili u bono ta̱ nu mpa lekeɗi. Adama a̱ yiɗa̱i i kuɗeke mu Nomi? A na wo okpoi Vuzavaguɗu wu uta̱ka̱ mu ta̱ ɗe e keteshe, ɗa u su'uki mu n atakaci?>>
22 Nannai ɗa Nomi wu uta̱i a̱ likuci i Mowabu n Ruti kejene ka̱ ni, vuza va aza a Mowabu. Ayin a na a yawai Batalami ele a̱ kugita̱ vikya'a vi itabi.