29
Aza a Filisitiya a iwain Dawuda
1 Ɗa aza a Filisitiya o ɓolongi ovonshi e le a Afeku, aza a Isaraila tamkpamu a̱ shikpa̱i a̱pa̱m e le a̱ ka̱kina̱ ke meyenike me Jezirelu.
2 Ana ngono ma aza a Filisitiya a̱ uta̱i n ka̱tsura̱ ko ovonshi ele aza a yoku amangatawun a tawun aza a yoku a̱kpa̱n-a̱kpa̱n, Dawuda n uma a̱ ni tamkpamu a o kutono ka̱ca̱pa̱ koɓolo Akishu mogono.
3 Ɗa ovonshi aza a Filisitiya ecei Akishu, a danai, <<Yiɗa̱i tamkpamu aza a Ibirahi a nampa i a kuya'an na?>>
Ɗa Akishu wu ushuki u danai, <<Nava Dawuda kagbashi ka Shawulu mogono mi Isaraila ma'a. U la'a ta̱ ka̱ya̱ o kuyongo nu mpa. Kpamu ali ayin ana u ka̱sukpa̱i Shawulu u ta̱wa̱i wa̱ a̱ va̱ n ciya̱ unushi wa̱ ni ba.>>
4 Ama ovonshi aza a Filisitiya a ya'in wupa n Akishu, ɗa a danai ni,<<Loko vuma va u bono a̱ ubuta̱ u na vu zagbakai ni u da̱sa̱ngu, wi o kutono tsu a kubana a̱ ubuta̱ u kuvon ba. Wi ta̱ a kufuɗa kuya'an ulinga n kofon ka nampa wu una tsu, ciya̱ vuzagbayin vi ni u pana uyo'o.
5 Dawuda vu nampa va a̱yi ɗa vuza na a ci ya'ansaka ishipa n e je'i va ba? Ka̱ta̱ a ka̱na̱ kudana,
<Shawulu wu una ta̱ uma a̱kpa̱n,
ama Dawuda wu una ta̱ a̱kpa̱n-a̱kpa̱n babu uteku.> >>
6 Ɗa Akishu u ɗekei Dawuda u danai ni, <<N kucina ta̱ n Vuzavaguɗu vu wuma avu vuza vu usuɓi ɗa, mi ishi ta̱ n ciga vu bana vu ya'an kuvon n osoji a̱ va̱. Adama a na n sa'wa kuciya̱ wu n unushi ba ili i na i ɗikai a kanna ka na vu ta̱wa̱i wa̱ va̱ ali a̱ kuta̱wa̱ gogo na, ama ngono n na m buwai mu ushuku n avu ba.
7 Adama a nannai, ka̱na̱ uye vu bana a kpa'a m ma̱ta̱na̱, ka̱ta̱ vu ya'an ili i yoku i na ya kula̱nga̱sa̱ a̱ɗu a ngono m aza a Filisitiya ba.>>
8 Ɗa Dawuda u danai Akishu, <<Ama yiɗa̱i n ya'in? Unushi wene u ɗai vu remei mu n u ɗa, ali a kanna ka na n ta̱wa̱i wa̱ a̱nu? Yiɗa̱i ya kusa̱nka̱ mu kubana kuya'an kuvon n irala i vuzagbayin vu va̱ mogono?>>
9 Ama ɗa Akishu wu ushuki, u danai, <<N yeve ta̱ vi ta̱ n usuɓi ka̱u an kalingata ka̱ Ka̱shile a̱ a̱shi a̱ va̱. N nannai dem, aza a e kelime ovonshi aza a Filisitiya a dana ta̱, <Vi a kubana a̱ ubuta̱ u kuvon ku nampa n a̱tsu ba.>
10 Gogo na vu ɗa̱nga̱ n kpasani, koɓolo n agbashi a vuzagbayin vu nu a na a̱ ta̱wa̱i koɓolo n avu. Ka̱ta̱ i ka̱na̱ uye n usana.>>
11 Ɗa Dawuda koɓolo n uma a̱ ni a̱ ɗa̱nga̱i m kpasani a̱ ka̱na̱i uye o kubono a iɗika ya aza a Filisitiya, ele aza a Filisitiya tamkpamu a̱ ka̱na̱i uye a kubana a Jezirelu.