1 Ɗa uma a Kiriyatu-jerimu a banai a ɗikai akpati vu uzuwakpani u Vuzavaguɗu, ɗa a bankai vu ɗa a kpa'a ku Abinadabu gaɗi vu kusan. Ɗa e erengi Eliyaza kolobo ka̱ ni wi inda akpati vu uzuwakpani vu Vuzavaguɗu va. 2 Akpati vu uzuwakpani va vu geshe ta̱ ɗe a Kiriyatu-jerimu ali a̱ya̱ kamanga. A ayin a nampa dem aza a Isaraila a̱ ka̱na̱i ma̱shi a̱ kula̱nsa̱ Vuzavaguɗu, adama a na u ɓa̱nka̱ le. 3 Ɗa Samaila u danai aza a Isaraila ra̱ka̱, <<Mayu ɗa baci yi a kuciga kubono u Vuzavaguɗu n ka̱ɗu ke te, i jebeke ka̱ci ka̱ ɗa̱ n omoci a̱ma̱li koɓolo n ka̱ma̱li ka Ashitoretu. I neke a̱ɗu a̱ ɗa̱ u Vuzavaguɗu, a̱yi ɗa koci i kutono, wi ta̱ ta na a kisa ɗa̱ e ekiye aza a Filisitiya.>> 4 Ɗa aza a Isaraila a vakangi a̱ma̱li a Balu n a̱ma̱li a Ashitoretu ɗa o bonoi o tonoi Vuzavaguɗu koci.

5 Ɗa Samaila u danai, <<Ɓolongi aza a Isaraila dem a Mizipa, mpa kpamu mi ta̱ a kuya'an kavasa a̱ ubuta̱ u Vuzavaguɗu adama a̱ ɗa̱.>> 6 Ana o ɓolongi ɗe a Mizipa, ɗa e keneki mini a̱ va̱ma̱i ma'a e kelime ka Vuzavaguɗu, a ya'in kakuli a kanna ka nanlo ka, a danai, <<Ci ya'anka ta̱ Vuzavaguɗu unushi.>> Samaila kpamu u da̱sa̱ngi a Mizipa u lya'i tsugono tsa aza a Isaraila. 7 Ana aza a Filisitiya a panai aza a Isaraila o ɓolongu ta̱ a Mizipa, ɗa ngono ma aza a Filisitiya o foɓusoi adama a na a ya'an vishili n ele. Ana aza a Isaraila a panai ka'a, ɗa panai wovon wa aza a Filisitiya. 8 Ɗa aza a Isaraila a danai Samaila,<<Ka̱ta̱ vu ka̱sukpa̱ ku folonoko tsu Vuzavaguɗu Ka̱shile ka̱ tsu ba, adama a na wu isa tsu e ekiye aza a Filisitiya.>> 9 Ɗa Samaila u ɗikai ma̱giri ma na ma buwai a kapa mani ɗa u kiɗai ma'a tsu kune'e ku kusongu a kubana u Vuzavaguɗu, u ya'in ufolu u Vuzavaguɗu a̱ una̱ wa aza a Isaraila, ɗa ta na wu ushuki ni. 10 A ayin a na Samaila wi e kuneke kune'e ku kusongu, ɗa aza a Filisitiya a yawai ɗevu adama a na a̱ shilika̱ n aza a Isaraila. Ama ɗa Vuzavaguɗu u lapai kakpanga ka gbangam ali ɗa aza a Filisitiya a̱ ripula̱i ɗa a kpatalai a sumai adama aza a Isaraila. 11 Ɗa uma a Isaraila a̱ uta̱i a Mizipa ɗa a kiyangi aza a Filisitiya a kuna le ali a kubana a Betika.

12 Ɗa Samaila u ɗikai katali ɗa u shikpa̱i ka'a e mere ma Mizipa n Shan, ɗa u ɗekei kula ku ni Ibiniza, adama a na u dana ta̱, <<Ali n gogo na Vuzavaguɗu u buwa ta̱ a̱ kuɓa̱nka̱ tsu.>> 13 Ɗa a lya'i aza a kuvon Filisitiya. Ili i na i ɗikai a ayin a nanlo o doku a uwa uɓon wi iɗika ya aza a Isaraila ba, adama a na Vuzavaguɗu u ka̱na̱ ta̱ tsurala n aza a Filisitiya a ayin a wuma u Samaila ra̱ka̱. 14 O bonokoi aza a Isaraila likuci i na aza a Filisitiya isai le i ɗa, ili i na i ɗikai a Ekoron ali a kubana a Gatu. Aza a Isaraila kpamu a isai uteku u likuci u le ra̱ka̱ ekiye aza a Filisitiya. Ɗa a̱ ciya̱i ida̱shi i ma̱ta̱na̱ a̱ ka̱tsuma̱ ka aza a Isaraila n aza a Amoriya.

15 Ɗa Samaila wo okpoi kaya'inkafada ka aza a Isaraila ali ayin a wuma u ni dem. 16 Ka̱ya̱ dem u tsu ka̱ra̱'a̱ ta̱ ubuta̱ dem adama a na u ya'anka aza a Isaraila afada, u gita̱ a Betelu a kubana a Giliga m Mizipa. 17 U kotso baci ka̱ta̱ u bono a̱ kpa'a ku ni a Rama, u ya'an ɗe ulinga wa afada a̱ ubuta̱ wa aza a Isaraila. Ɗa Samaila u ma'in katalikalyuka ɗe adama a Vuzavaguɗu.