Katagarda ka Ire ka
SAMAILA
Kuɓa̱yuwa̱
E yeve vuza na u ɗanai katagarda ka nampa ka ba. Ama o goɗumo o yotsongu ta̱ a ɗana ta̱ ka'a a̱ya̱'a̱ amangatawunkuci n kamangankupa (930) kafu umaci u Yesu, megeshe kenu ana Dawuda u kotsoi tsugono.
Katagarda ke ire ka Samaila ka dansa ta̱ ukuna wi ili i na a ya'in a̱ ka̱tsuma̱ ka̱ a̱ya̱'a̱ amangere ko tsugono tsu Dawuda. Ukuna wa u gbaɓa ta̱ n ukuna u kuvon koɓolo n ulya'i u na Dawuda u ciya̱i. Katagarda ka ka lya'a ta̱ kelime n kadanshi ku ukuna wu uzuwi u tsugono u Dawuda mogono ma Yahuda 1:1-4, koɓolo n ukuna u kuzuwa yi wo okpo mogono mi Isaraila ra̱ka̱ 5:1-24.
Ana Dawuda u lya'i Urushelima n kuvon, ɗa u bonokoi likuci ya yo okpoi likuci i gbayin yi iɗika yi Isaraila. Ɗa kpamu u ɗikai Akpati vu Uzuwakpani vu Ka̱shile u zuwai punu.
Katagarda ka ka shamgba adama a ukuna wu ulya'i u Dawuda koci ba, ama ɗa ka lya'i kelime n kadanshi ku ukuna wa atakaci a na a̱ ciya̱i Dawuda, a̱ ubuta̱ wu unushi u na u ya'in m Betusheba vuka vu Uriya koɓolo n ugbamukaci u na Abusalom kolobo ka̱ ni ka ya'ankai ni. 15:1--18:18.
Ili i gbangam i na katagarda ka ka ya'in kadanshi i ɗaɗa ukuna u tsumani tsu Dawuda mogono. Ko a na wo okpoi Dawuda mogono ma'a, a ayin a na baci de dem u ya'in unushi, u tsu dakaka ta̱ adama a na u shika̱ unushi u ni ka̱ta̱ kpamu wu ushuku n atakaci a̱ Ka̱shile. Katagarda ka Samaila ka i re ko yotsongu ta̱ n unushi u Dawuda dem Ka̱shile ka̱ kpa̱ɗa̱ kushatangu uzuwakpani u ni n uma a̱ ni ba.
Ili i na yi punu udari a katagarda ka nampa.
Tsugono tsu Dawuda wa aza a Yahuda 1:1--4:12.
Tsugono tsu Dawuda wa aza a Isaraila ra̱ka̱ 5:1--24:25.
a. A̱ ka̱ya̱'a̱ ku ugiti 5:1--10:19.
b. Dawuda m Betusheba 11:1--12:25.
c. Igbandarishi n atakaci a Dawuda 12:26--20:26.
b. A̱ya̱'a̱ a na a lazai o tsugono tsu Dawuda 21:1--24:25.
1
Dawuda u panai ukpa̱ u Shawulu
1 Ana shawulu u kuwa̱i, ci na ɗe Dawuda n uma a̱ ni o bono n a̱ ubuta̱ u na a lya'i aza a Ameleki n kuvon, ɗa a̱ da̱sa̱ngi a Zikilagu ali ayin ere.
2 A kanna ka tatsu ɗa vuma vu yoku, wu uta̱i ɗe a uɓon wa̱ a̱tsura̱ a shawulu, m motogu ukari, kpamu n kubuta̱ a kaci adama una̱mgbi u ka̱tsuma̱ u ni. Ana u yawai u Dawuda ɗa u kuɗa̱ngi a iɗika ɗa u nekei ni tsugbayin.
3 Ɗa Dawuda we ecei ni, <<Te ɗai vu uta̱i?>> Ɗa vuma va wu ushuki, <<N la'aka ta̱ a̱ ka̱tsura̱ ko osoji ka aza a Isaraila.>>
4 Ɗa Dawuda we ecei ni kpamu,<<Nini ɗai ka ki ɗe? Dana mu.>>
Ɗa u danai, <<Osoji a Isaraila a suma ta̱ a̱ ubuta̱ u kuvon, kpamu osoji a̱bunda̱i a̱ kuwa̱ ta̱. Shawulu feu n kolobo ka̱ ni Janata a̱ kuwa̱ ta̱.>>
5 Ɗa Dawuda we ecei kolobo ka na ka̱ tuka̱i n arabali a, <<Nini ɗai vu yevei an Shawulu n kolobo ka̱ ni Janata a̱ kuwa̱ ta̱?>>
6 Ɗa kolobo ka ka̱ ushuki ɗa u danai, <<U ga'aka ta̱ a na mi lo gaɗi vu kusan ku Gilibowa, ɗa me enei Shawulu u tsubaki a masara ma̱ ni, ɗa me enei ekeke odoku n akumbi odoku a irala dakakai kuyawa ɗevu n a̱yi.
7 Ana u vadalukpai ɗa we enei mu ɗa u ɗekei mu, ɗa mu ushuki, n danai, <Mpa ɗa na>
8 Ɗa wu ecei mu, <Avu ɗa ya?> Ɗa mu ushuki, n danai, <Mpa vuza vu Ameleki ɗa.>
9 Ɗa u danai mu, <Yawa ɗevu nu mpa vu una mu, adama a na atakaci a yawa mu ta̱, kpamu mi a kula'a ba.>
10 Ɗa n yawai ɗevu n a̱yi ɗa mu unai ni, adama a na n yeve ta̱ mayun wi a kula'a ba adama a na a ya'anki ta̱ usa̱n ka̱u. Ɗa n ɗikai oroliko a na i a kaci ka̱ ni koɓolo m mashingi ma na mi o kubolu ku ni kpamu, a ɗanna n tuka̱i nu ra̱ka̱ vuzagbayin vu va̱.>>
11 Ɗa Dawuda u remei motogu ma̱ ni u karai adama a̱ una̱mgbi u ka̱tsuma̱, ta feu uma a na i koɓolo n a̱yi a ya'in nannai
12 Ɗa a̱ na̱mgba̱i ka̱tsuma̱ a̱ shika̱i, kpamu ɗa a ya'in kakuli ali a kubana kulivi adama a Shawulu n kolobo ka̱ ni Janata, kpamu adama a uma a Vuzavaguɗu m kpa'a ka aza a Isaraila, adama a na a bana ta̱ ukpa̱ u kotokobi.
13 Ɗa Dawuda we ecei kolobo ka na ka̱ tuka̱i n arabali a, u danai, <<Teɗai vu uta̱i?>>
Ɗa wu ushuki, <<Mpa vuza vu Ameleki ɗa, ama ci ta̱ ida̱shi a iɗika yi Isaraila.>>
14 Ɗa Dawuda u danai ni, <<Yiɗa̱i i zuwai ɗa vu kpa̱ɗa̱i kupana ka̱rikpa̱ni ka̱ kuɗa̱ngusa̱ kukiye ku nu vu una Mazagbi ma Vuzavaguɗu?>>
15 Ɗa Dawuda u ɗekei kolobo ke te a̱ ka̱tsuma̱ ko olobo a, u danai, <<Bana, vu una yi.>> Ɗa u lapai ni u vakangi a iɗika.
16 Ɗa Dawuda u danai vuza vu Amaleki va, <<Mpasa n nu mi ta̱ a kaci ka̱ nu, adama a na nu una̱ u nu u ɗa vu dansai, <Vu una ta̱ Mazagbi ma Vuzavaguɗu.> >>
Dawuda u ya'in kpalu ku Shawulu n Janata
17 Ɗa Dawuda u zuɓa̱i vishipa vu kpalu ku Shawulu n kolobo ka̱ ni Janata.
18 Ɗa u danai a pi'isaka aza a Yahuda vishipa va, vu ɗa vi ta̱ uɗani a katagarda ka Jasharu.
19 <<Isaraila una ta̱ tsugbayin tsu nu,
una ta aza a tsugbayin aginda a̱ nu,
La̱na̱ bi'i osoji a utsura a̱ yikpa̱i.
20 Ka̱ta̱ a dana Gatu ba,
ka̱ta̱ feu a sala ka'a a uye kakau u Ashikelon ba,
ta lo nkere ma aza a Filisitiya n kuya'an ma̱za̱nga̱,
ta lo nkere ma aza a ofoto a kuya'an ma̱za̱nga̱.
21 <<A̱ɗa̱ Nsasan n Gilibowa,
ya'an o doku a̱ ciya̱ ciza ko mini gaɗi wa̱ a̱ɗa̱ ba,
ya'an ashina a̱ ɗa̱ a̱ kpa̱ɗa̱ kudoku kumatsa ili i makara.
Adama a na ta ɗe a̱ la̱nga̱sa̱i nra̱ga̱ mo osoji a utsura gbani,
ma̱ra̱ga̱ ma Shawulu kpamu mo doku ma̱ ciya̱ mani'in ba.
22 Utan u Janata u munuka u ɗa,
kotokobi ka Shawulu ki n asuvayali ba,
ka tsu una ta̱ osoji a utsura,
kpamu ka tsu una ta̱ irala.
23 <<Shawulu n Janata ncigi n ɗa, mu usuɓi kpamu.
A wuma i ta̱ koɓolo a̱ ukpa̱ kpamu i ta̱ koɓolo,
a la'a ta̱ mashangi o moloko,
a la'a ta̱ kawu utsura.
24 <<A̱ɗa̱ nkere mi Isaraila,
shika̱i adama a Shawulu,
a̱yi na u ya'ankai ɗa̱ ntogu mi ikebe
a̱yi na u ukai ɗa̱ ntogu n tsuzogu ma azanariya.
25 <<Osoji a utsura a̱ kuwa̱ ta̱, una le ta̱ a̱ ubuta̱ u kuvon.
Janata u vaku ta̱ ukpa̱ a nsasan.
26 N na̱mgba̱ ta̱ ka̱tsuma̱ ka̱u adama a̱ nu, vuza va̱ Janata,
macigi ma'a vi wa̱ a va̱,
ucigi u nu wa̱ va̱ u gbani u ɗa ba,
u la'a ta̱ ucigi u maku ma vuka m mavali.
27 <<Ɗanna osoji a utsura a̱ yikpa̱i,
kpamu ucanuku u kuvon u le u na̱mgba̱ ta̱.>>