14
Abusalom u bonoi a Urushelima
1 Jowabu vuza na e ci ɗeke a̱na̱ku a̱ ni Zeruya u yevei an ka̱ɗu ko mogono Dawuda ko bonoi u Abusalom.
2 Ɗa Jowabu u suki a ɗikaka yi vuka vu ugboji ɗe a̱ likuci i Tekowa. Ana u yawai ɗa Jowabu u danai vuka va. <<Ya'an adanshi vi ta̱ a̱ una̱mgbuka̱tsuma̱, vu uka akashi a kpalu, ka̱ta̱ kpamu vu sukuya̱ mani'in ba. Ya'an adanshi vi geshe ta̱ ɗe a una̱mgbuka̱tsuma̱ tsu vuza na vuza u kuwa̱i ni.
3 Ka̱ta̱ vu bana a̱ ubuta̱ u mogono vu ya'an kadanshi tsu nampa.>> Ɗa Jowabu u danai vuka va ili i na wa kudana mogono ma.
4 Ana vuka va aza a Tekowa u yawai a̱ ubuta̱ u mogono, ɗa u vaki ma̱kpa̱ɓa̱ a iɗika ɗa u danai, <<Wuma u nu u geshe mogono, ɓa̱nka̱ mu!>>
5 Ɗa mogono me ecei ni u danai, <<Yiɗa̱i mɓa̱la̱ n nu?>>
Ɗa wu ushuki, <<Mpa kagapa ka'a, vali vu va̱ vu kuwa̱ ta̱.
6 Mpa kagbashi ka̱ nu mi ta̱ m muku mo olobo n re, ɗa a ya'in vishili ɗe a kashina, babu vuza lo vu na we pece le. Ɗa vuza te wu unai vuza ni.
7 Gogo na nahannai, aza a̱ va̱ a̱ ta̱wa̱ ta̱ adama a na n neke le vuza na wu unai vuza ni va, adama a na una yi feu a̱ una̱ vuza ni na wu unai, ama a ya'an baci nannai mi ta̱ a ku namba maku ma na ma ku lya'a ili yi uka̱ni i vali vu va̱. Maku ma̱ va̱ ma ɗaɗa mu koci ili i na mi a kinda, una yi baci i ta̱ a̱ ku ka̱sukpa̱ mu babu ili. Ka̱ta̱ kpamu kula ku vali vu va̱ ku puwa̱nka̱ aduniyan a nampa.>>
8 Ɗa Mogono ma danai vuka va, <<Bono a kpa'a kunu, mi ta̱ e kuneke kadanshi adama ukuna u nu wa.>>
9 Ɗa vuka vuza vu Tekowa va u doku u danai, <<Vuzagbayin vu va̱ mogono, ya'an unushi u nampa wu okpo a kaci ka̱ va̱ koɓolo m kpa'a ke esheku a̱ va̱. Ya'an mogono n kakuba ko tsugono tsu nu tsu okpo babu unushi.>>
10 Ɗa mogono ma danai ni, <<Vuza yoku u keɓece wu baci ukuna, ka̱ta̱ vu tuka̱i na a̱ va̱, wi o kudoku ko'uso wu ba.>>
11 Ɗa u danai, <<Ya'an mogono ma kucina n Vuzavaguɗu Ka̱shile ka̱ nu, ka̱ta̱ vu ka̱sukpa̱ aza a na a kuciga kutsupa kutan a ya'an munuka ba adama a na una maku ma̱ va̱ ba.>>
Ɗa mogono ma danai vuka va, <<N kucuna ta̱ n Vuzavaguɗu vu wuma n danai ko ka̱nji ka̱ ni ke te ki o kutoɗo ka̱ yikpa̱ a iɗika ba.>>
12 Ɗa vuka va vu doku vu danai, <<Mi ta̱ ufolu u nu vuzagbayin, ya'an n doku n dansa koyoku ke nu.>>
Ɗa mogono ma̱ ushuki ma danai, <<Dansa.>>
13 Ɗa vuka va vu danai, <<Yiɗa̱i i zuwai ɗa vu ya'ankai uma a̱ Ka̱shile kusheshe ku gbani-gbani tsu nampa? Adama a kadanshi ka na ka̱ uta̱i una̱ u nu mogono, vu kiɗaka ta̱ ka̱ci ka̱ nu afada a na vu kpa̱ɗa̱i kuka̱sukpa̱ maku ma̱ nu ma na o lokoi mo bono a kpa'a.
14 Mayun ɗa ra̱ka̱ vu tsu tsu kuwa̱. Adama a na ci ta̱ uteku tsu mini ma na a̱ va̱ma̱i a iɗika, ma na babu vuza na wa kufuɗa kupura̱ ma'a. Ama Ka̱shile ka tsu ɗika wuma u vuza nannai bini ba. Adama a nannai u tsu la̱nsa̱ ta̱ uye u na aza a na a sumai o bono.
15 Wuma u nu u geshe mogono, gogo na n ta̱wa̱ ta̱ kudana wu ka nampa, adama a na uma a zuwa mu ta̱ m panai wovon. Ɗa mpa kagbashi ka̱ nu n sheshei n danai, <Mi ta̱ a kuya'an kadanshi m mogono, yoku ba wi ta̱ a kuya'an ili i na kagbashi ka̱ nu ko folonoi.
16 U ga'an ba mogono mi ta̱ a̱ kushuku ku isa kagbashi ka̱ ni a ekiye a vuza a na wi a kuciga ku una tsu mpa n maku ma̱ va̱, ka̱ta̱ feu e pece tsu n ili yi uka̱ni i na Ka̱shile ke nekei tsu.>
17 Vuzagbayin, n sheshe ta̱ n danai, <Kadanshi ko mogono ma̱ va̱ ki ta̱ zuwa ka̱ɗu ka̱ va̱ ka̱ da̱sa̱ngu, adama a na wi ta̱ tsu kalingata ka̱ Ka̱shile, u tsu pece ta̱ kasingai n kagbanigbani.> Ya'an Vuzavaguɗu Ka̱shile ka̱ nu ko yongo n avu.>>
18 Ɗa mogono ma danai vuka va,<<Ka̱ta̱ vu sokongu mu ko i te a̱ ka̱tsuma̱ ki ili i na mi a ku ece wu ba.>>
Ɗa vuka va vu danai, <<Vuzagbayin mogono ya'an keci ku nu.>>
19 Ɗa mogono me ecei ni, <<Jowabu wi ta̱ punu n kukiye a̱ ka̱tsuma̱ ka kadanshi ka nampa ko?>>
Ɗa vuka vu ushuki, <<Wuma u nu u geshe, vuzagbayin va̱ mogono, babu vuza na wa kukpatala u gula̱ ko u singai a̱ ka̱tsuma̱ ke keci kana vu ya'in. Kagbashi ka̱ nu Jowabu ɗa u danai mu n ya'an ka wu keci ka ra̱ka̱, a̱yi ɗa kpamu vuza na u danai mu ili i na ma kudansa.
20 Kagbashi ka̱ nu Jowabu va u ya'an ta̱ nannai, adama a na u saba'a ukuna u na wi an nwalu gogo na. Vuzagbayin vu va̱ wi ta̱ n kuyeve tsa alingata a̱ Ka̱shile, u yeve ta̱ i na yi punu a iɗika ya.>>
21 Ɗa mogono ma danai Jowabu, <<U ga'an ta̱ mi ta̱ a kuya'an i ɗa. Bana vu bono n kolobo ka Abusalom.>>
22 Ɗa Jowabu u kuɗa̱ngi u lya'akai ni kayala, ɗa u zuwakai mogono una̱singai. Jowabu u danai, <<Anana n ciya̱ ta̱ mapasa ma singai wa̱ nu, vuzagbayin vu va̱ mogono, adama a na vu ushuku ta̱ n ufolu u va̱.>>
23 Ɗa Jowabu u banai a̱ likuci i Geshuru u bonoi n Abusalom a Urushelima.
24 Ɗa mogono ma danai, <<Danai ni u wala o kubono a kpa'a ku ni, ka̱ta̱ u ta̱wa̱ wa̱ va̱ ba.>> Ɗa Abusalom u da̱sa̱ngi kpa'a ku ni, u bana a̱ ubuta̱ u mogono ba.
25 A̱ ka̱tsuma̱ ka aza a Isaraila ra̱ka̱ babu vuza na i a kucikpa tsuloboi tsu Abusalom. Ili i na i ɗikai a kaci ali a kubana e ene a̱ ni wi n u'iwi u Ka̱shile ba.
26 A̱ ka̱ya̱ dem u tsu puna ta̱ ka̱nji ka̱ ni adama a na ka ci ya'an yi ta̱ a̱miki. U puna baci ka̱ta̱ u gisanku ka'a, a̱miki a̱ ka̱nji ka a ci yawa ta̱ kilo vu re.
27 A matsaka ta̱ Abusalom muku mo olobo n tatsu n mekere me te, kula kuni ku ɗa Tamaru. Mekere ma tana mi ta̱ n tsuloboi.
28 Abusalom u da̱sa̱ngi a Urushelima a̱ya̱ e re tana we ne o mogono ba.
29 Ɗa Abusalom u suki e ɗekusheke yi Jowabu adama a na u suku yi u mogono, ama ɗa Jowabu u iwain kubana. Ɗa u doki u suki ire, ama ɗa u iwain kubana.
30 Ɗa u danai agbashi a̱ ni, <<Banai, a kashina ka Jowabu ka na ki ɗevu n ka̱ va̱, ka na ki m bali. I songu ka'a.>> Ɗa agbashi a Abusalom a banai o songi ka'a.
31 Ɗa Jowabu u banai a kpa'a ku Abusalom we ecei ni, <<Yiɗa̱i i zuwai ɗa vu suki agbashi a̱ nu a bana o songi kashina ka̱ va̱?>>
32 Ɗa Abusalom wu ushuki u danai ni, <<Vu iwan ta̱ kuta̱wa̱ a makyan ma na n ɗekushi nu. Mi ishi n ciga kusuku vu bana vu eceke mu mogono ili i na i zuwai ɗa u danai mu n ka̱sukpa̱ Geshuru m bono. Mpa n la'a ta̱ n kuciga n da̱sa̱ngu ɗe. Gogo na n ciga ta̱ tsu gasa a̱shi m mogono, n ya'anka yi baci unushi, ya'an wu una mu.>>
33 Ɗa Jowabu u banai u danai mogono ili i na Abusalom u danai, ɗa mogono ma̱ u suki e ɗekushe Abusalom ɗa u banai. Ana u yawai ɗa u vaki a iɗika u lya'i kayala e kelime ko mogono. Ɗa mogono mo oɓongi Abusalom va.