22
Vishipa vu Dawuda adama a kucikpa Vuzavaguɗu
(Ishp 18:1-50)
1 A kanna ka na Vuzavaguɗu wu isai Dawuda e kukiye ku Shawulu n irala i na i buwai dem, ɗa Dawuda u ya'in vishipa vu nampa u Vuzavaguɗu. U danai,
2 <<Vuzavaguɗu, katali ke kusheɗeku ka̱ va̱,
mashilya ma̱ va̱ n kishi ka̱ va̱,
3 Ka̱shile ka̱ va̱, ubuta̱ Kusheɗeku ka̱ va̱,
wa̱ a̱ nu ɗa n tsu sheɗeku.
Ma̱ra̱ga̱ ma̱ va̱, n utsura u wishi u va̱,
mashilya ma̱ va̱, n ubuta̱ u kusheɗeku u va̱,
kishi ka̱ va̱, vu isai mu a̱ ubuta̱ u vishili.
4 N tsu ɗeke ta̱ Vuzavaguɗu,
a̱yi na u yotsoi kucikpa,
kpamu u tsu wawa mu ta̱ ekiye a irala i va̱.
5 <<Mayu a aɓau a munuka a pala mu ta̱,
wayi u mala u la'a ta̱ utsura u va̱.
6 Kasaun ka shiya mu ta̱ n awin a̱ ni,
ukpa̱ u zuwaka mu ta̱ maza.
7 <<A makyan ma na mi a una̱mgbi u ka̱tsuma̱ n tsu ɗekushe ta̱ Vuzavaguɗu,
ɗa kpamu n ɗekushi Ka̱shile ka̱ va̱.
Ɗe a̱'isa̱ a̱ ni u panai ka̱la̱ka̱tsu ka̱ va̱,
ɗa kpamu ma̱shi ma̱ va̱ ma yawai atsuvu a̱ ni.
8 <<Aduniyan a̱ gba̱ɗa̱i,
ɗa kumi'i ku zuva ku je'i,
adama a na wi ta̱ a wupa.
9 Ka̱nga̱ ka̱ ka̱na̱i ku uta̱ a̱ vunu vi ni,
melentsu ma akina, n a̱ga̱ruwa̱shi a̱ ku uta̱ a̱ una̱ u ni.
10 Ɗa u ɓa̱yuwa̱i gaɗi u cipa̱i a iɗika,
eleshu a̱ lima̱ ka̱u a ɗaka vu ene a̱ ni.
11 Ɗa u kumbai Corobi ɗa u imkpai zuva,
a gaɗi ve evelyu a ɗa enei ni tsu manunu.
12 U bonokoi ka̱yimbi ko okpoi kapalatsu ka̱ ni,
n eleshu a̱ lima̱ ka̱u a na a̱ tsu tuka̱ m mini.
13 Ɗa ulaɗi u gbayin wu akanai ni,
ɗa kpamu a̱ga̱ruwa̱shi uta̱i wu a̱ ni.
14 Vuzavaguɗu u lapai ɗe kakpanga gaɗi,
ɗa a panai ka̱la̱ka̱tsu ka Mala'imili.
15 U tawai aya'a a̱ ni u wacuwai irala,
ɗa u su'uki le n ulaɗi, ɗa u lokoi le.
16 Uɓarangi u Vuzavaguɗu,
n utsura wa ayinviki a̱ vunu vi ni,
ɗa a̱ ɓa̱yuwa̱i a̱shi a mala,
ɗa kumi'i ka aduniyan ku okpoi e keteshe.
17 <<Ɗe gaɗi Vuzavaguɗu u ba̱rukpa̱i kukiye ku ni ɗa u ɗikai mu,
a̱ ubuta̱ u mini mu uga̱vi ɗa wu utuka̱i mu.
18 Ɗa wi isai mu a̱ ubuta̱ wi irala i va̱ aza a utsura,
a̱ ubuta̱ wa aza na a iwain mu, adama a na a la'a mu ta̱ utsura.
19 A̱ gba̱nga̱ra̱ngi mu a kanna ka atakaci ka̱ va̱,
ama ɗa Vuzavaguɗu u ɓa̱nka̱i mu.
20 Ɗa u tuka̱i mu a̱ ubuta̱ u na wi isai mu,
ɗa kpamu wu isai mu adama a na wi ta̱ a kupana uyo'o uva̱.
21 <<Vuzavaguɗu u tsupa mu ta̱ adama a usuɓi u va̱,
ɗa u zuwakai mu una̱singai adama a na mi n unushi ba.
22 Adama a na n tono ta̱ uye u Vuzavaguɗu,
n ka̱sukpa̱ uye u Ka̱shile ka̱ va̱ ɗa n ya'in ka gbani-gbani ba.
23 N tono ta̱ wila̱ u ni ra̱ka̱,
n kpa̱ɗa̱ kutono ili i na u dansai ba.
24 Ɗa mo okpoi vuza vu babu unushi a̱ ubuta̱ ni.
Ɗa kpamu me erei ka̱ci ka̱ va̱ a̱ ubuta̱ u kuya'an unushi.
25 Vuzavaguɗu u neke mu ta̱ katsupa mu ta̱ adama a usuɓi u va̱,
adama a na mi nu unushi a̱ a̱shi a̱ ni ba.
26 <<Vuzavaguɗu avu vuza vu uneki u ka̱ɗu ɗa, wa aza a na e nekei u a̱ɗu,
vuza vu ma̱riki ɗa kpamu wa aza a̱ ma̱riki,
27 Wa aza a ciɗa, vu tsu yotsongu ta̱ ka̱ci ka̱ nu vi ta̱ ciɗa,
ama wa aza a gbani-gbani vu tsu yotsongu ta̱ ka̱ci ka̱ nu an vu la'i le.
28 Vu ci isa ta̱ aza a na o goyoi ka̱ci ka le,
ama vu tsu goyo ta̱ aza a̱ra̱ɗi.
29 Vuzavaguɗu, avu ɗa kutashi ku va̱,
avu ɗa vu lokoi ka̱yimbi ka̱ va̱.
30 N utsura u nu mi ta̱ a ku una ka̱tsura̱ ko osoji,
n utsura u Ka̱shile ka̱ va̱ mi ta̱ a kupasa mashilya dem.
31 Uye u Ka̱shile wi ta̱ derere!
Kadanshi ka Vuzavaguɗu mayun ɗa.
Wi ta̱ tsu ma̱ra̱ga̱,
a u vuza na dem u la̱nsa̱i ubuta̱ u kusheɗeku wa̱ a̱ ni.
32 <<Vuzavaguɗu a̱yi ɗa Ka̱shile koci,
Ka̱shile ka'a koci ubuta̱ u kusheɗeku u tsu.
33 Ka̱shile ka'a vuza na u tsu neke mu utsura,
u tsu zuwa ta̱ kpamu uye u va̱ wo okpo derere.
34 Ana n walai a gaɗi vu n sansan,
ɗa n walai mayin babu ma̱ta̱ɗa̱ tsu na mesheun ma tsu suma.
35 Ɗa kpamu u gbarai e kiye a̱ va̱ adama a kuvon,
ciya̱ n fuɗa n ka̱nza̱ utan u vuyum vishili.
36 Vuzavaguɗu vu ere mu ta̱, ɗa vu isai mu,
uɓa̱nki u nu u zuwa mu ta̱ mo okpoi vuzagbayin.
37 Ɗa vu zuwai mu a uye u singai,
n sa'wa kpamu kuyikpa̱ ba.
38 Ɗa n guvai irala i va̱ n lya'i le,
n shamgba ba sai na mu unai le ra̱ka̱.
39 Ɗa n lapai le ali a iɗika, a fuɗa a̱ ɗa̱nga̱ ba,
a̱ yikpa̱i a ɗaka vu ene a̱ va̱.
40 Vu neke mu ta̱ utsura adama o kuvon,
ɗa vu zuwai irala i va̱ a ɗaka vu ene a̱ va̱.
41 Vu zuwai irala i va̱ a kpatalai a sumai,
ɗa mu unai aza a na a iwain mu.
42 Ɗa a̱ la̱nsa̱i uɓa̱nki, ama babu vuza na wa ku isa le,
ɗa e ɗekushei Vuzavaguɗu, ama ɗa u iwain ku ushuku le.
43 Ɗa n lapai le luɓa̱ luɓa̱ ali okpoi tsu kubuta̱,
n dasai le uteku tsu kolyo'o ka uye.
44 <<Vu isai mu e ekiye a uma a̱ va̱ aza a ugbamukaci,
ɗa vu zuwai mu mo okpoi vuza kelime ku uduniyan,
aza a na n yevei ba, ɗa okpoi aza a ulinga a̱ va̱.
45 Ɗa omoci a̱ ka̱na̱i kuta̱wa̱ n a̱ kuɗa̱nki mu,
ɗa baci de a panai ukuna u va̱ o tsu tono mu ta̱.
46 A̱ɗu e le a̱ gusa̱i
ɗa uta̱i a̱ ubuta̱ u na ishi usheɗeki a̱ ta̱wa̱i n kuje'e ki ikyamba.
47 <<Vuzavaguɗu wi ta̱ n wuma. Ucikpi a kubana a katali ke kusheɗeku ka̱ va̱.
Ucikpi a kubana u Ka̱shile ka̱ va̱, katali ka wishi ka̱ va̱.
48 A̱yi ɗa Ka̱shile ka na ka kutsupaka mu,
vuza na u zuwai kumaci ku uduniyan ɗaka vu va̱,
49 u tsu isa mu ta̱ a̱ ubuta̱ wa aza a na i a ku'iwan mu.
U tsu neke mu ta̱ tsugbayin wa aza a na i a tsurala nu mpa,
u tsu isa mu ta̱ a̱ ubuta̱ wa aza a a̱ɗu a̱ vishili.
50 <<Adama a nannai Vuzavaguɗu, mi ta̱ a kucikpa wu a̱ ka̱tsuma̱ ku uduniyan,
mi ta̱ a kuya'an ishipa i kucikpa kula ku nu.
51 U neke ta̱ ulya'i u gbayin u mogono ma na u zagbai,
ɗa kpamu u yotsongi ucigi u na u tsu saba'a ba u mazagbi ma̱ ni,
u Dawuda nu ntsukaya n ni ali ayin babu uteku.>>