6
A̱ tuka̱i n akpati vu uzuwakpani a Urushelima
(1 Ar 13:1-14; 15:1--16:3, 43)
1 Ɗa Dawuda u doku u ɓolongi osoji a Isaraila aza a na a fuɗai o kuvon uma a̱kpa̱n kamangankupa (30,000).
2 Ɗa u ɗa̱nga̱i a Ba'ala vu Yahuda ɗaɗa Kiriyatu-jerimu u banai koɓolo n uma ra̱ka̱ a na i koɓolo n a̱yi, adama a na a̱ tuka̱ n akpati vu uzuwakpani vu Ka̱shile, vu na e ci ɗeke n kula ku Vuzavaguɗu Mala'imili, a̱yi na wi ida̱shi e mere mi icorobi.
3 Ɗa a ɗikai akpati vu uzuwakpani vu Ka̱shile a kpa'a ku Abinadabu ku na ki a gaɗi vu kusan, ɗa a kiyangi vu ɗa e keke va anaka vu savu. Uza koɓolo n Ahiyo olobo a Abinadabu, ele ɗa o kutono n keke va anaka a.
4 Ahiyo ɗa wi a nwalu e kelime ka akpati vu uzuwakpani vu Ka̱shile va.
5 Ɗa Dawuda koɓolo n aza kpa'a ki Isaraila ra̱ka̱ a̱ ka̱na̱i tsuwa'i n e je'i, n utsura u le ra̱ka̱ e kelime ka Vuzavaguɗu, n ishipa n a wa'i umolu n ishari m medele n agundari koɓolo n ugogi.
6 Ana a yawai a ulanga u kulapu ku Nakon, anaka a na i o kurono keke va a̱ ta̱ɗa̱tsa̱i, ɗa Uza u ba̱rukpa̱i kukiye ku ni ɗa u ka̱na̱i akpati vu uzuwakpani vu Ka̱shile va.
7 Ɗa Vuzavaguɗu u ya'in wupa n Uza, adama a ugbamukaci u na u ya'in a na u sa'wai akpati vu uzuwakpani va, ɗa Ka̱shile ku unai ni, ɗa u kuwa̱i lo ɗevu n akpati vu uzuwakpani vu Ka̱shile va.
8 Ɗa Dawuda u na̱mgba̱i ka̱tsuma̱ adama a wupa u na Vuzavaguɗu u ya'in n Uza. Ɗa tana e ɗekei ubuta̱ wa kula Pereza-uza, ɗaɗa atakaci a Uza, ta tana ku ɗa ki ɗe nannai ali n anana.
9 Ɗa Dawuda u panai wovon u Vuzavaguɗu a kanna ka nanlo, u danai, <<Nini ɗai n kutuka̱ n akpati vu Vuzavaguɗu wa̱ va̱?>>
10 Adama a nannai Dawuda wu ushuku kuɗika akpati vu Vuzavaguɗu va a kubanka a Urushelima Likuci i Dawuda ba. Ɗa kucikpa u bankai n vu ɗa a kpa'a ku Obedu-edom vuza vu Gatu.
11 Ɗa Akpati vu Vuzavaguɗu vu yongoi a kpa'a ku Obedu-edom vuza vu Gatu ali wotoi u tatsu, ɗa ta na Vuzavaguɗu u zuwakai Obedu-edom koɓolo n aza a kpa'a a̱ ni ra̱ka̱ una̱singai.
12 Ɗa o tonokoi mogono Dawuda, a danai, <<Vuzavaguɗu u zuwaka ta̱ kpa'a ku Obedu-edom una̱singai koɓolo n ili i kpa'a i ni dem, adama a akpati vu Ka̱shile va.>> Ɗa Dawuda u banai u ɗikai akpati vu Ka̱shile va a kpa'a ku Obedu-edom ɗa u bankai n vu ɗa a̱ likuci i Dawuda m ma̱za̱nga̱.
13 Ana aza na a ɗikai akpati vu Vuzavaguɗu va a dasai adanga a̱ ta̱li, ɗa u ya'in alyuka o kobomburon koɓolo m medendem mi ikyamba.
14 Dawuda u uki n motogu mu uca'i ma efodu n tsuzogu, ɗa u ya'in kuje'e n utsura u ni ra̱ka̱ adama a na u cikpa Vuzavaguɗu.
15 Ɗa Dawuda n aza a Isaraila ra̱ka̱ a̱ tuka̱i n akpati vu Vuzavaguɗu n yoroli i ma̱za̱nga̱ koɓolo n ciliki ci kavana.
16 Ana a ukai n akpati vu Vuzavaguɗu asuvu a̱ likuci i Dawuda, ɗa Makelu mekere ma Shawulu, u la̱na̱i n katusu ɗa we enei mogono Dawuda e kuje'e n u ɗikpangi e kelime ka Vuzavaguɗu, ɗa u goyoi ni a̱ ka̱ɗu ka̱ ni.
17 Ɗa a ukai n akpati vu Vuzavaguɗu asuvu ɗa a zuwai vu ɗa a̱ ubuta̱ wi ida̱shi u ni punu asuvu a̱ Ma̱va̱li ma Vuzavaguɗu, ma na Dawuda u foɓusokoi ni. Ɗa Dawuda u ya'in kune'e ku kusongu n ku ma̱ta̱na̱ e kelime ka Vuzavaguɗu.
18 Ana Dawuda u kotsoi kuya'an alyuka e kune'e ku kusongu koɓolo n kune'e ku ma̱ta̱na̱, ɗa u zuwakai uma una̱singai n kula ku Vuzavaguɗu Mala'imili.
19 Ɗa u pecekei le ili kulya'a, aza a Isaraila ra̱ka̱ a̱ma̱ci n ali, yaba dem ka̱kutsu ko boroji, n inyama yi uzungi, n ka̱kutsu ka umaci u mambulu u ɗekpu. Ɗa yaba dem vu le u bonoi a kpa'a ku ni.
20 Ana Dawuda u bonoi a kpa'a ku ni adama a na u zuwaka kpa'a ku ni una̱singai. Ɗa Makelu mekere ma Shawulu wu uta̱i u gasai n Dawuda, ɗa u danai, <<Nini ɗai mogono mi Isaraila ma ɗikai ka̱ci ka̱ ni anana? U palukpai ikyamba i ni e kelime ka agbashi a̱ma̱ci a̱ ni, tsu na uma a wasasa a ci ya'an.>>
21 Ɗa Dawuda u danai Makelu, <<N ya'an ta̱ kuje'e e kelime ka Vuzavaguɗu adama a na n cikpa yi, a̱yi na u zagbai mu a̱ una̱ we esheku a̱ nu n aza a kpa'a ku ni ra̱ka̱, u zagba mu ta̱ mo okpo mogono mi Isaraila, uma a Vuzavaguɗu. Mi ta̱ a kuya'an kuje'e adama a na n cikpa Vuzavaguɗu.
22 Mi ta̱ a kufuɗa kugoyo ka̱ci ka̱ va̱ u la'a tsu nampa, ali mo okpo ili i kugoyi wa̱ nu. Ama wa agbashi a̱ a̱ma̱ci a na vi a kadanshi i ta̱ e kuneke mu tsugbayin.>>
23 Adama a ili i nampa, Makelu mekere ma Shawulu u matsa maku ba, ali a ukpisa̱ u ni.