6
1 Idoꞌ laza Oꞌmososi makaꞌ bize mino gono daaꞌ unive nete nene gatine do tiꞌ lo nolo-lingimune: Oꞌmosoꞌmi nasahiliꞌve lengemavo di minaaꞌ naniꞌ nene ningi hulikevo vo labuluvo ogalive losa nolune.
2 Idoꞌ neꞌmine noluvoniꞌ nene Oꞌmosoꞌmo tiꞌ lo lingumuꞌ nene noluve:
Naza gamene lamineꞌ muluvonguꞌ nenita laaꞌ naniꞌ ma nene
mo giluve.
Ee, eveneꞌ do nguꞌ izelove lo gamene muluvonguꞌ nene
hize eleꞌ o-lingiduvoniꞌ ve.
Gililo. Aꞌmine gamene lamineꞌ molaniꞌ nene idise mene gamene nene neive. Eveneꞌ do luꞌ izelineꞌ gamene molaniꞌ nene idise mene gamene nene neive.
Lingine Leliꞌ Monovote Lamineꞌ Nene Ningilizave Losa Aposolo Laza Geni Ato Atoꞌ Gehaaꞌ Noune Lo Pauloꞌ Lineꞌ Gamazi
3 Laza nene goloso gidini gelelineꞌ monovo ngomosi nene ma okunivo aꞌmine monoꞌ gono noduneꞌ nene eveneꞌ nete divi ledivika li monoꞌ goloso ve likelizave lo eveneꞌ hamolitesi olovoꞌ ilizadoꞌ o minelineꞌ initeꞌ nene mo kekeꞌ amoovoꞌ minaaꞌ noune.
4 Asi laza nene Oꞌmosoꞌmi gonoloꞌ ve neꞌmine noneꞌ nene eveneꞌ do sotoꞌ ogo ngelebizelesa nene adoꞌ neꞌmine monovo lamineꞌ nene ogo minaaꞌ noune: Laza nene geni initeꞌ ato atoꞌ neꞌmi lulouꞌ minaaꞌ noube, idoꞌ lihiteheꞌ initeꞌ gehepeveliꞌmi lulouꞌ minaaꞌ noube, idoꞌ do goloso o-ledaaꞌ initeliꞌmo nene akate gize osuꞌ lavo minaaꞌ noube, neꞌmine ogo minaaꞌ nouninguꞌ nene lemo ongamo amuzo molovoꞌ minaaꞌ noune.
5 Idoꞌ di goloso igisasi nene libilaaꞌ nave. Idoꞌ nalaꞌ numunguꞌ nesi nene huli-lidaaꞌ nave. Idoꞌ eveneꞌ gulugulunga li lovo di sotoꞌ i-lidilisasi nene igaꞌ nave. Idoꞌ gonosi nene amuzo molo daaꞌ noune. Idoꞌ okisete nesi nene do guno ma ongosaꞌmune. Idoꞌ nosoꞌ niteꞌ nesi nene do lamino nosaꞌmo gaꞌnasi nene helo minaaꞌ noune.
6 Neꞌmino minoosa monovo lamineꞌ golosovoꞌ nesi nene ha ogo mino gele nge lo minaaꞌ monovo nesi nene do minaaꞌ noune. Idoꞌ laza nene hongu loovoꞌ mino eveneꞌ nasahiliꞌ o-ngedo mino Oꞌmosoꞌmi Sikalahuꞌve nesi nene lelita minevo dovoꞌ ogo neivo mino eveneꞌ lute ngemo minaaꞌ nouneꞌ nesi nene abeleni amo mino
7 Idoꞌ gamazi gihile laminekovoꞌ nesi nene lo mino Oꞌmosoꞌmi amuzo lelita minineꞌ nesi nene do sotoꞌ oꞌmo vo mino monovo lisiheꞌ lamineꞌ gehepeve neꞌmo nene lovouꞌ initete neꞌmine loloꞌ ogavo ade hela adavala nene lepesete neꞌmine ne neivo idoꞌ ade hela zamela nene bainati mitete neꞌmine ne neivo minaaꞌ noune.
8 Eveneꞌ linge ma nete nene di naba i-lidaaꞌ naavo idoꞌ linge ma nete nene di limi-lidaaꞌ naavo monaaꞌ noune. Idoꞌ eveneꞌ linge ma nete lelikumuꞌ nene lemenga laaꞌ naavo linge ma nete nene lopoꞌni laaꞌ naavo monaaꞌ noune. Ee, eveneꞌ linge ma nete lelikumuꞌ nene eveneꞌ goꞌine izaaꞌ ave ve li laaꞌ naaha laza nene neꞌmine amo soza niteꞌ osaꞌmune.
9 Idoꞌ eveneꞌ ma nete lelikumuꞌ nene gililisa ma gilisaꞌmaha eveneꞌ mukiꞌ nete lelikumuꞌ nene ningi gili lamineꞌ goloso i nizave. Idoꞌ lelikumuꞌ nene mo hililisaave li gili minaaꞌ naaha idoꞌ mene vetesi ha noneꞌ nene mo haza ne none. Idoꞌ lihimetemuꞌ ve lo mulumo gono nene neꞌmino daaꞌ nouba aꞌmine neꞌmo nene lebele helesaꞌmive.
10 Idoꞌ mulumo gele minuningukisi nene gamene gamene lolize izovoꞌ minaaꞌ noune. Laza nene ve gohoꞌ gahaliꞌ neꞌmine noneꞌza monokuꞌ eveneꞌ mukiꞌ nene heneni ve neꞌmine loloꞌ o-ngedaaꞌ noune. Henenite nomineꞌ minaaꞌ nouneꞌza initeꞌ mataꞌ nene lelita ha neivosa minaaꞌ noune. Idoꞌ neꞌmine ogo mine do vaaꞌ nounidotiꞌ nene laza Oꞌmosoꞌmi gonouꞌ ve minaaꞌ nouneꞌ nene sotoꞌ o minivo ningilizave lo neꞌmine ogaꞌ noune.
11 Agae, lingine Kolidi alevekizo, gamazi nene ma do halekamo mo lo ngolokovoꞌ lo lo-lengeme osuꞌ lokune. Laza lute lengeme noneꞌ nene mo nabaloꞌ goloso lengeme none.
12 Ee, leliꞌ nene lute lengemaatoꞌ do aꞌmanapa ma amuneꞌza langisetine lengiꞌ lutine nene di aꞌmanapa igi leliꞌ nene lutine limi lamineꞌ amave.
13 Idoꞌ lingine neniꞌ izipahaꞌne neꞌmine gili nizavo tiꞌ lo nolo-lingimune: Laza lute neꞌmino lingimuneꞌ maloꞌ nene golo hizi lutine di giliꞌ lami limi lamineꞌ ilo.
Eveneꞌ Nene Oꞌmosoꞌmi Numuꞌve Neꞌmine Nounako Oꞌmosomuꞌ Gilamave Nesi Nene Bizi Monikelizave Lo Pauloꞌ Lineꞌ Gamazi
14-15 Adoꞌ monovo lamineꞌ ogaꞌ monovosi idoꞌ monovo golosoloꞌ vaaꞌ monovosi nene gono di hamoꞌ mili dikesivo monovoꞌine nene lisihetokovoꞌ vilihe vamilive. Aꞌmine noluvoniꞌ initeꞌ labanakisi litiꞌmusosi engiꞌ monovoꞌine nene hamoliꞌmine monovo igi mili isaꞌmasive. Idoꞌ aꞌmineꞌmine ogo Kilisitoꞌnimuꞌ gili eleꞌvoleꞌ ave nesi idoꞌ ezemuꞌ gili hulaaꞌ ave nesi nene hamoꞌ akaloꞌ ngeli ma eꞌmetamilisaanako nemuꞌ nene lingine Kilisitoꞌnimuꞌ gili hulaaꞌ ave engikisi nene makaꞌ moni engiꞌ igaꞌ aniꞌ monovo nene lingine igi mili ikelizaze. Engikisi bize lamineꞌ igi minamilo.
16 Oꞌmosoꞌmi kekeize numuꞌve nesi idoꞌ soza oꞌmososi di hamoꞌ ilisidoꞌ nene ma vo damive. Idoꞌ neꞌmine noluvoniꞌ nene minevoꞌ minevoꞌ Oꞌmosoliꞌmi numuꞌve nene leliꞌ noneꞌ nenako nemuꞌ noluve. Aꞌminemuꞌ nene Oꞌmosoꞌmo tiꞌ lo lo neineꞌ ma neive:
Naza nene engiꞌ vovoꞌninguꞌ ogo minevoꞌ alevoꞌ ogo mino
mono minelesuve.
Idoꞌ Oꞌmosoꞌinesi nene loloꞌ ogo minelesuve.
Idoꞌ ingine neve nene neniꞌ eveneꞌne zuho minilisave lo neineꞌ ma neive.
17 Nemuꞌ nene Guvelesi veꞌmo tiꞌ lo nolive:
Aꞌmine nenikumuꞌ gili eleꞌvoleꞌ amaveti vovoꞌninguꞌ minangutiꞌ nene
lingine huli mine abazaꞌ igi mini
goloso niteꞌ nene damilo.
Neꞌmine ikevo naza lengiꞌ nene do nenita ogo
18 metibo loloꞌ okuvo
lingine nene neniꞌ gipe alu minilisave lo
amuzoꞌve atoliꞌminesi minive Guvelesi veꞌmo nene lineꞌ ve.