8
Lelitoꞌ Medelo Mino Oꞌmoso Initeꞌ Lehize-daaꞌ Ivete Naba Izesuꞌ Aza Nene Oꞌmosoꞌmo Lo huko-lidineꞌ Gamazi Gosohoꞌ Nene Do Sotoꞌ O-ledave. Idoꞌ Aꞌmine Gamazi Neꞌmo Gomuꞌ Lo huko Lineꞌ Gamazi Nene Ivileꞌ Ogosa Gamazi Lamineꞌ Neingumuꞌ Lineꞌ Gamazi
Gamazi noluvoniꞌ neꞌmi monovo neꞌmino neingumuꞌ nene gelelesune: Evenetoꞌ medelo mino Oꞌmoso initeꞌ lehize-daaꞌ ivete naba eiꞌ monovoꞌve nene neꞌmino neive lo lo-lingimuvoniꞌ maꞌmine monovo laminekisi minive nene lelikumuꞌ sotoꞌ ogo neive. Aza nene Oꞌmosolotiꞌ lemo minive nenako Okulumokuko Guvelesi ve naba minive Oꞌmosoꞌmo gizebo ogo minaaꞌ neineꞌ moꞌmosiꞌveuko nene ana hulaaꞌ ida neive. Idoꞌ aꞌmida nene evenelite gizamaniꞌ numuno Guvelesi veꞌmo do sotoꞌ molaniꞌ monoꞌ numuno neꞌmi avazahaloꞌ seli numuno gele vineꞌ monoꞌ numuno avotemote gizi di monaniꞌ neꞌmine monoꞌ numuno lulouꞌ gehepeve Oꞌmosoꞌmi moꞌmosiꞌve neinguꞌ nene mino initeꞌ Oꞌmoso lehize-daaꞌ gonoꞌve nene do neive. Idoꞌ neꞌmine gono do minaaꞌ neineꞌ nene evenetoꞌ medeli mini Oꞌmoso initeꞌ lehizi-daaꞌ ave naba mukiꞌ di oti-ngidaaꞌ naniꞌ nene eveneꞌ Oꞌmoso imilisa di igaꞌ naniꞌ initekisi idoꞌ lihimemuꞌ sipisipi nevoꞌmine initeꞌ ngibili olokuꞌ gizi imilizave li di igaꞌ naniꞌ initekisi nene Oꞌmoso lehizi-dilizave li eveneꞌ di oti-ngidaaꞌ naniꞌ nenako nemuꞌ nene azasi neꞌmine gono do minaaꞌ neive. Idoꞌ neꞌmine gono do neineꞌ nenako nemuꞌ nene azasi nene initeꞌ Oꞌmoso ma lehize-delidoꞌ o minineꞌ nenako mo nene lehize-daniꞌ ve. Idoꞌ aza nene misubouko mene minidini Moseꞌ gizineꞌ louꞌ gamaziloꞌ eꞌmeti evenetoꞌ medeli mini Oꞌmoso initeꞌ lehizi-daaꞌ ave nene mo minaniꞌ nenako aza nene evenetoꞌ medelo mino Oꞌmoso initeꞌ lehize-daaꞌ ive loloꞌ ilidoꞌ lisiheꞌ amivo loloꞌ amidine. Ingine misubouko evenetoꞌ medeli mini Oꞌmoso initeꞌ lehizi-daaꞌ aveti monoꞌ numunoꞌine idoꞌ gono daaꞌ naniꞌ nene Okulumokuko minaniꞌ initeliti avazaha idoꞌ mumunoꞌinevoꞌ nene minaaꞌ nave. Aꞌmine nene monoꞌ numuno seli numuno gele vineꞌ nene Moseꞌ gizelesa neivo Oꞌmosoꞌmo Moseꞌni tiꞌ lo lo-imineꞌ maꞌmino nene neive: Gaza nene gololoꞌ minusidoꞌ seli numuno gele vineꞌ monoꞌ numuno idoꞌ aꞌminguꞌ miniliza initeꞌ mukiꞌ neti avazaha gelebizuvoniꞌ maloꞌ nene eꞌmeto eheꞌ ogo minosa do lamino loloꞌ ogo gizezo. Idoꞌ evenetoꞌ medeli mini Oꞌmoso initeꞌ lehizi-daaꞌ ave ingine gomuꞌ gono daaꞌ aniꞌ nene Okulumokuko gono gihile minineꞌ neꞌmi avazahaloꞌ nene daaꞌ aniꞌza Izesuꞌ nene aꞌmine gono gihile nene nodavo neꞌmo gomuꞌ daaꞌ aniꞌ gono nene ngivileꞌ ogo hozila neive. Idoꞌ gomuꞌ aleve lo huko-ngidineꞌ gamazi neuꞌ nene Oꞌmosoꞌmo initeꞌ lamineꞌ o-ledelesa lo huko-lidineꞌza leliꞌ lo huko-lidineꞌ gamazi gosohokuꞌ nene ivileꞌ ogosa initeꞌ lamineꞌ goloso o-ledelesa lo huko-lidineꞌ nenako Izesuꞌ aza lelikisi Oꞌmososi kuku holo-ledo gamazi hulo eza ema ogo leliꞌ gele daloneꞌ gamazi ve lo Oꞌmosoꞌmo lo huko-lidineꞌ gamazi lo do ogo limineꞌ neꞌmo Oꞌmosoꞌmo gomuꞌ aleve lo huko-ngidineꞌ gamazi nene ivileꞌ ogo neineꞌ nene gele none. Idoꞌ aꞌmine votigileloꞌ aꞌmineꞌmine ogo Izesuꞌ gono do neineꞌ neꞌmo misubouko evenetoꞌ medeli mini Oꞌmoso initeꞌ lehizi-daaꞌ avete gono di minaaꞌ aniꞌ nene ivileꞌ ogosa lamineꞌ neive.
Avotemote gili dalizaniꞌ gamazi ve lo lo huko-ngidineꞌ gamazi neꞌmo gono davo vo gihile ma izidiniko aꞌmidotiꞌ nene leliꞌ gili dalizaniꞌ gamazi ve lo gosohoꞌ ma do sotoꞌ ogo lo huko-ledamidine. Neꞌmine amidineꞌza avotemote igi mili igaꞌ aniꞌ monovoꞌine goloso nene do sotoꞌ o-ngedosa Guvelesi veꞌmo lineꞌ gamazi ma monoꞌ godolouꞌ tiꞌ li gizi nizaniꞌ ma neive:
Guvelesi veꞌmo tiꞌ lo lave:
Gililo. Isilaeleꞌ zuhoti muliseukisi Zudaꞌ zuhoti muliseukisi nene
gili dalizaniꞌ gamazi gosohoꞌ ma lo huko-ngedo do sotoꞌ oloniꞌ gamene nene
alingeꞌ ma sotoꞌ oloseive.
Aꞌmine gili dalizaniꞌ gamazi gosohoꞌ ma lo huko-ngedeloniꞌ nene
avoꞌningine Aigita misuboutiꞌ ngeleꞌmizo novosa gili dalizave lo
lo huko-ngiduvoniꞌ gamaziloꞌ nene eꞌmetamadiꞌmo ingine nene
ninge mate-ngedo minuvoniꞌ nenako neꞌmo nene gomuꞌ
lo huko-ngiduvoniꞌ gamazi maꞌminosa lo huko-ngedamo
atoliꞌmine ogo lo huko-ngedelesuve lo
10 Guvelesi veꞌmo gohi tiꞌ lo lineꞌ:
Alingeꞌ aꞌmine noluvoniꞌ gamene nene ogavo nelotiꞌ
alingeꞌ nene Isilaeleꞌ aꞌvopilemoꞌ zuho mukilite gili dalizaniꞌ gamazi
atoꞌ gohi ma lo huko do sotoꞌ o-ngedelesuve.
Aꞌmine lo huko-ngedeloniꞌ gamazi nene neꞌmino neive:
Neniꞌ lo huko loloniꞌ gamazi mukiꞌ nene engiꞌ gaꞌninguꞌ molo-ngedo
luꞌninguꞌ nene luhuvo gizekelesuve. Neꞌmine ogo engiꞌ Oꞌmosoꞌine loloꞌ ogo nouvo ingine nene
neniꞌ eveneꞌne zuho liliꞌ igi minilisave.
11 Neꞌmine igi eveneꞌ dizi minaniꞌ limi minaniꞌ mukiꞌ nene
nenikumuꞌ gili osuꞌ li gili nilizaniꞌ nenako ve malite ingine zuho gaꞌine di
Guvelesi vemuꞌ gili minilo li ma li-ngidamilisave.
12 Idoꞌ neꞌmino lo huko-ngedeloniꞌ nene goloso initeꞌ dangumuꞌ nene
iseꞌine ize-ngedosa aꞌmine lihimeꞌinemuꞌ nene
gohi gaꞌne gelamolosuvonako nemuꞌ Isilaeleꞌ aleve nene
aꞌmine luvoniꞌ gamazi nene lo huko-ngedelesuve lo Guvelesi veꞌmo lineꞌ.
13 Idoꞌ gili dalizaniꞌ gamazi nene gosohoꞌ lo huko-ngedelesuve lineꞌ nenako neꞌmo gomuꞌ lo huko-ngidineꞌ gamazi nene mo litehe ilineꞌ neꞌmo nene mo geto vo haleke gehepeve ilidoꞌ ogave.