5
Oꞌmosomuꞌ Gilive Nene Misubouꞌ Monovo Mehene nGemaaꞌ Neive Lo Gizineꞌ Gamazi
Ve malite Izesuꞌnimuꞌ nene aza do luꞌ izelive lo Oꞌmosoꞌmo imiselelesa live neive li gili eleꞌvoleꞌ ilizaniꞌ nene Oꞌmosolatiꞌ sotoꞌ igi izipahala zuho liliꞌ igi nizave. Idoꞌ ve ma ingine luꞌine meꞌnibine imi ma izipahala zuhosi ngimilisave. Idoꞌ lute Oꞌmosoꞌmi izipahala zuho ngemaaꞌ noube ngemamaaꞌ noube. Lute Oꞌmoso emo lo huko lineꞌ gamazi gele do mino ma nene mo laminetoꞌ lute ngemaaꞌ noune lo ningo gelelesune. Lute Oꞌmoso emaliꞌmi monovo tiꞌ ogo neive: Lo huko lineꞌ gamazi gele daloneꞌ nene mo laminetoꞌ lute emaaꞌ olosune. Idoꞌ Oꞌmosoꞌmo lo huko lineꞌ gamazi nene geniꞌvesi nominako ngelo livizamoloseive. Oꞌmosolatiꞌ sotoꞌ unive laza nene Oꞌmoso gelekeleꞌ i-damaniꞌ misubouꞌ aleveti monovo nene damo aꞌmine monovo nene amuzo molo do lemeꞌmo ogo minunako Oꞌmosoꞌmo lo huko lineꞌ gamazi nene livizesaꞌmive. Idoꞌ aꞌmine misubouꞌ minineꞌ monovo nene gele damo amuzo moloꞌmo ogo minaaꞌ nouneꞌ nene naniteliꞌmo ve. Izesuꞌnimuꞌ gele eleꞌvoleꞌ ogo noneꞌ neꞌmo ve. Idoꞌ zamote aꞌmine misubouko minineꞌ monovo di limiꞌmi igi amuzo mili minilizave. Ingine Izesuꞌnimuꞌ aza lamineꞌ Oꞌmosoꞌmi gipele neive li gili eleꞌvoleꞌ i nizavetevoꞌ neꞌmine ilisave.
Oꞌmoso Aza Gipeleꞌmi Gamazi Hize Eleꞌ O-dineꞌ Gamazi
Aꞌmine ve Izesuꞌ Kilisitoꞌ aza nene nososi vanisesi sotoꞌ ineꞌ ve. Nosovoꞌ nomive. Sotoꞌ ineꞌ nene monoꞌ noso holanikisi vanise lepo hilinekisi ne neive. Idoꞌ Sikalahuꞌ neꞌmo aza aꞌmine gamazi nene hize eleꞌ o-daaꞌ neive. Sikalahuꞌ aza gamazi gihileꞌmi meleho neinako aꞌmine gamazi laaꞌ neivo gihile izaaꞌ neive. 7-8 Nemuꞌ nene Sikalahuꞌ neꞌmo idoꞌ monoꞌ noso holaniꞌ neꞌmo idoꞌ vanise lepo hilineꞌ neꞌmo Izesuꞌ monovo hize eleꞌ i-di gono daaꞌ nave. Sikalahuꞌ idoꞌ noso holaniꞌ idoꞌ vaniseꞌve ingine setohamo nete gamazi laniꞌ nene hamoꞌ gamazi neive. Haza eveneꞌ nete gamazi ma hizi eleꞌ ikevo ma nene laza aꞌmine gamazi mo laminetoꞌ neive lo gelaaꞌ noune. Ne neiha Oꞌmosoꞌmo gamazi lilineꞌ nene haza eveneliti gamazi ivileꞌ ogo gihile lamineꞌ izeleseive. Nemuꞌ nene Oꞌmosoꞌmo gipele hize eleꞌ o-do lineꞌ gamazi neineꞌ nene gele eleꞌvoleꞌ olosune. 10 Ingine Oꞌmosoꞌmi gipelemuꞌ gili eleꞌvoleꞌ igaꞌ nave nene luꞌinedunuꞌ gilikevo eleꞌvoleꞌ ogaꞌ neive. Idoꞌ ingine Oꞌmosoꞌmo lineꞌ gamazi gili eleꞌvoleꞌ ami nizave nete Oꞌmosoꞌmo gipele hize eleꞌ o-do lineꞌ gamazi nene gilikevo gihile izesaꞌminako nemuꞌ Oꞌmosomuꞌ sozaloꞌ ve ve laniꞌ gelaaꞌ neive. 11 Idoꞌ gipele hize eleꞌ o-do lineꞌ gamazi nene tiꞌ lo neive: Oꞌmosoꞌmo minevoꞌ minevoꞌ ogaꞌ lemeni dameni nene mo leme neive. Idoꞌ aꞌmine minevoꞌ minevoꞌ minaaliꞌmi meleho nene eiꞌ gipele ne neive. 12 Nemuꞌ nene ingine Oꞌmosoꞌmi gipele di giliꞌ li nizaniꞌ nete nene minevoꞌ minevoꞌ ogaꞌ ngemeni dameni nesi di nizave. Idoꞌ ingine Oꞌmosoꞌmi gipele di giliꞌ li di minamave nete minevoꞌ minevoꞌ ogaꞌ ngemeni dameni nesi mo damave.
Minevoꞌ Minevoꞌ Lemeni Damenisi Minaakumuꞌ Gizineꞌ Gamazi
13 Oꞌmosoꞌmi gipelemuꞌ gili eleꞌvoleꞌ i nizave lingine minevoꞌ minevoꞌ lengemeni dameni nene mo do none li gili eleꞌvoleꞌ igi gililizave lo mene gamazi nene nogize-lingimuve. 14 Laza tiꞌ lo Oꞌmosoꞌmi veleloꞌ gele oloboꞌ o none: Oꞌmosola initeꞌ mamuꞌ vokuꞌ lunivo eiꞌ gele neidoꞌ vo dalineꞌ nene gele lemeleseive. 15 Idoꞌ neꞌmine manaꞌmine initekumuꞌ vokuꞌ lunivo gele lemeleseive lo gele eleꞌvoleꞌ o noneꞌ nenako initeꞌ mamuꞌ vokuꞌ lo-deloneꞌ nene lemavo liteꞌ lo daaꞌ noune lo gele none.
16 Ve maliꞌmo eze zuho ma goloso niteꞌ nodavo ningivo aꞌmine neꞌmo mudise helaaꞌ akauꞌ vilidoꞌ nomivo ma nene aꞌmine vemuꞌ Oꞌmosola lilive. Lavo Oꞌmosoꞌmo minevoꞌ minevoꞌ emeni damenisi mine do dizo minelineꞌ akaloꞌ eleꞌmize molaloseive. Mudise hilaaꞌ akauꞌ vilizadoꞌ nomineꞌ goloso niteꞌ davemukovoꞌ noluve. Goloso niteꞌ ma neineꞌ nene aꞌmine dalizaniꞌ nene mudise hilaaꞌ akauꞌ vilizadoꞌ o neive. Neꞌmine initeꞌ davemuꞌ Oꞌmosola lilizave lo lamuve. 17 Goloso niteꞌ mukiꞌ nene lihime daaꞌ nitekovoꞌ neive. Neineꞌza goloso niteꞌ ma daloneꞌ nene vo mudise helaaꞌ akauꞌ volonidoꞌ nomive. 18 Laza tiꞌ lo gelaaꞌ noune: Oꞌmosolatiꞌ sotoꞌ unidite nene goloso niteꞌ do minamolosune. Oꞌmosoꞌmi gipele neꞌmo gizebo o-ledavo golosoꞌmi meleho aza geleleheꞌ o-ledo do goloso o-ledamoloseive. 19 Laza nene Oꞌmosolatiꞌ sotoꞌ ogo none lo gele none. Idoꞌ me misubouꞌ ve Oꞌmoso gelekeleꞌ i-damaniꞌ mukiꞌ nete goloso melehida vi giꞌmizi gelekeleꞌ i-di nizaniꞌ nesi gele none. 20 Idoꞌ tiꞌ lo gele none: Oꞌmosoꞌmi gipele aza misubouko lemo ogave. Ogo gate do ngoloꞌ lo-lidineꞌ nenako Oꞌmoso gihile nene ningo gelaaꞌ nouneꞌ. Ee, Oꞌmoso gihile nesi bizo none. Gipele Izesuꞌ Kilisitokisi bizo none. Me ve nene Oꞌmoso gihile idoꞌ minevoꞌ minevoꞌ ogo minaaliꞌmi meleho neive. 21 Izipahaꞌne zuho mate, lingine avazaha oꞌmoso niteꞌ Oꞌmoso gihile minamaniꞌ nene gelekeleꞌ i-ngidikelizaze. Monovotidoꞌ gizebo lamineꞌ igi minilo.
Moda ve.