8
Kilisitoꞌ Aza Nene Lelita Lihime Monovo Do Hulo-ledavo Sikalahuliꞌmo Lemeni Dameni Gosohoꞌ Lehize-lididoꞌ Nene Eꞌmetelonidoꞌ O None Lo Pauloꞌ Lineꞌ Gamazi
1 Nemuꞌ nene Izesuꞌ Kilisitoda giꞌmize minuniveti okodela nene lihime gohi ma nomivo Oꞌmosoꞌmo lihime lemelidoꞌ minamune.
2 Nene nanitekumuꞌ ve. Naza Izesuꞌ Kilisitoda giꞌmizosa minevoꞌ minevoꞌ minaaꞌ do sotoꞌ o-ledaaꞌ ive Oꞌmosoꞌmi Sikalahuliꞌmi anauꞌ ogo nouvoniꞌ neꞌmo nene helaatoꞌ leleꞌmize molaaꞌ neineꞌ monovo lihime daaliꞌmi anauꞌ minuvongutiꞌ nene mo kuluhize-nedave.
3 Ee, eveneꞌ leliꞌ lemeni dameni nene amuzo molamineꞌ nenako neꞌmo nene louꞌ gamaziloꞌ ngelo eꞌmetamoloneꞌ ogavo louꞌ gamazi neꞌmo lihimeꞌmi anauꞌ minuningutiꞌ nene ngelo ma kuluhize-ledamineꞌ ve. Ne neiha louꞌ gamazi neꞌmo ngelo mo loloꞌ amineꞌ initeꞌ nene Oꞌmosoꞌmo nene mo ha ineꞌ ve. Aꞌmine initeꞌ ineꞌ nene eiꞌ gipele nene leliꞌ lihime daaꞌ univeti okode neꞌminesi nene leliꞌ lihimete apase-ledelingumuꞌ ve lo imiselineꞌ ve. Neꞌmine ogavosa leliꞌ lihimete mukiꞌ nene aꞌmine okoꞌno hamotoꞌ nene dizavo Oꞌmosoꞌmo lihime imineꞌ ve.
4 Idoꞌ neꞌmine ineꞌ nene lemeni dameni liteheꞌmo lidoꞌ eꞌmetamosa asi Oꞌmosoꞌmi Sikalahuꞌ neꞌmo lidoꞌ eꞌmeto ogo molo ogaꞌ nounive nene louliꞌmo lidiꞌmine igi eveneꞌ lisiheꞌ lamineꞌ minilizangumuꞌ ve losa neꞌmine ineꞌ ve.
5 Ee, eveneꞌ ma ingine ngemeni dameni liteheloꞌ eꞌmetaaꞌ ave nene ngemeni dameni liteheliꞌmi initekumukovoꞌ gili minaaꞌ naniꞌza Sikalahuliꞌmo lidoꞌ eꞌmetaaꞌ nave ingine nene aꞌmine Sikalahuꞌ neꞌmo gilineꞌ initekumukovoꞌ nene gili minaaꞌ nave.
6 Lemeni dameni liteheꞌmo gilidoꞌ eꞌmetaaꞌ neꞌmo nene helo vo tolovo olonidoꞌ leleꞌmize molaaꞌ neineꞌza Sikalahuliꞌmo gilidoꞌ eꞌmetaaꞌ neꞌmo nene minevoꞌ minevoꞌ ogo mino hongu lovoꞌ minelonidoꞌ leleꞌmize molaaꞌ neive.
7 Aꞌmine lemeni dameni liteheliꞌmo gilidoꞌ eꞌmetaaꞌ neꞌmo nene Oꞌmosoꞌmi louꞌ gamaziꞌmo lidoꞌ nene gele damo mino gele dalineꞌ amuzoꞌvesi nomivo mo kekeꞌ ngelo gele damoloseinako neꞌmo nene Oꞌmoso biluvaꞌ o-daaꞌ do sotoꞌ ogaꞌ neive.
8 Ee, ngemeni dameni liteheliꞌmi gelekeleꞌ ve minave nete nene Oꞌmosoꞌmo ninge lamineꞌ dalineꞌ initeꞌ hamokisi nene mo kekeꞌ ngeli ma amilisave.
9 Ne neiha lengiꞌ lutinguꞌ Oꞌmosoꞌmi Sikalahuꞌ nene ma minevoꞌ dovoꞌ ogo nolineꞌ nene lingine lengemeni dameni liteheꞌmi gelekeleꞌ ve minami asi Sikalahuꞌ neꞌmi gelekeleꞌ ve nene nizave. Idoꞌ ve ma ingine Kilisitoꞌ Sikalahuꞌve di minamave nene Kilisitoꞌ zuho minisaꞌmave.
10 Ee, okodine nene lihime monovoliꞌmo mo helelidoꞌ o neineꞌza eveneꞌ lisiheꞌ liliꞌ igi minaniꞌ neꞌmo lutine nene vele gizo neive.
11 Izesuꞌ hilingutiꞌ do ote-diveꞌmi Sikalahuꞌ neꞌmo lutinguꞌ mo minevoꞌ dovoꞌ ogo nolineꞌ nene aꞌmine Sikalahuꞌ neꞌmo lengiꞌ lutinguꞌ minevoꞌ dovoꞌ ogo neingumuꞌ nene Kilisitoꞌ hilingutiꞌ do ote-dive aza helelidoꞌ o neineꞌ okodine nesi nene gohi ha do vele gizeleseive.
12 Nemuꞌ nene neze zuhokizo, aꞌmidoꞌ nene golo hizo initeꞌ ma olonidoꞌ o neineꞌza aꞌmine initeꞌ nene lemeni dameni litehe neve eitoꞌ golo hizelonidoꞌ nene nomive. Ee, aꞌmine lemeni dameni litehe neꞌmo gilidoꞌ nene eꞌmeto ogo molo olonidoꞌ nene nomive.
13 Nene nanitekumuꞌ ve. Lingine lengemeni dameni liteheꞌmo gilidoꞌ eꞌmeti minilizaniꞌ nene mo mudise helaatoꞌ mini mili nizave. Ne neiha lingine Oꞌmosoꞌmi Sikalahuliꞌmi amuzodunuꞌ nene okodineꞌmo monovo goloso ogo molo ogaꞌ ineꞌ nene ma bili hililizaniꞌ nene mudise minevoꞌ minevoꞌ ogatoꞌ mini mili nizave.
14 Ee, Oꞌmosoꞌmi Sikalahuliꞌmo lidoꞌ eꞌmetaaꞌ ave mukiꞌ nene Oꞌmosoꞌmi izipahala nizaniꞌ nenako nemuꞌ nene mudise miniviꞌ miniviꞌ ilisave.
15 Idoꞌ Oꞌmosoꞌmi izipahala nizave luvoniꞌ nene nemuꞌ luvoniꞌ ve: Lingine di tiꞌ aniꞌ Sikalahuꞌ neꞌmo nene golise gohi giliꞌmi vi minilizave lo do gelekeleꞌ ve loloꞌ o-lingidineꞌ nevoba asi Oꞌmosoꞌmi izipahala loloꞌ o-lingidineꞌ ma neive. Idoꞌ neꞌmine o-lidineꞌ neꞌmo laza Oꞌmosomuꞌ nene meteho ve lo Ahono lo vise laaꞌ noune.
16 Oꞌmosoꞌmi Sikalahuꞌ neꞌmo nene leliꞌ luteꞌmo lo-limineꞌ gamazi hize eleꞌ ogo lelikumuꞌ nene Oꞌmosoꞌmi izipahala nizave lo lo sotoꞌ ogo lo-lemaaꞌ neive.
17 Idoꞌ Oꞌmosoꞌmi izipahala noneꞌ nenako Oꞌmosoꞌmo salani molaniꞌ initeꞌ dalonive nene none. Ee, idoꞌ Kilisitoꞌni Oꞌmosoꞌmo do naba o-delinguꞌ lezesi makatoꞌ do naba o-ledelingumuꞌ nene Kilisitoꞌ mulumo alumo niteꞌ gihineꞌ neꞌmino lazasi makatoꞌ ma gehesoꞌ nene Kilisitoꞌ salani initeꞌve nene ezesi makatoꞌ dalosune.
Idise Lelita Nene Geni Ha Neineꞌza Oꞌmosoꞌmi Sikalahuꞌ Neꞌmo Hize Eleꞌ O-ledavo Initeꞌ Maliꞌmo Do Goloso O-ledamivo Alingeꞌ Oꞌmosoꞌmo Moꞌmosiꞌ Lamineꞌ Do Sotoꞌ O-ledeleseive Lo Pauloꞌ Lineꞌ Gamazi
18 Naza idise mela nene geni mulumo alumo niteꞌ gehaaꞌ nouneꞌ nemuꞌ nene amuzo molo tiꞌ lo gele nouve: Alingeꞌ sotoꞌ o-ledelineꞌ initeꞌ adoꞌ Oꞌmosoꞌmo do naba o-lidivo lamineꞌ mineloneꞌ monovo neꞌmo nene initeꞌ naba goloso neineꞌ nenako aꞌmine genimuꞌ nene mo gele hulolonidoꞌ lisiheꞌ o neive.
19 Ne nanitekumuꞌ ve. Oꞌmosoꞌmo do sotoꞌ molaniꞌ initeꞌ mukiꞌ nete nene Oꞌmosoꞌmo izipahala zuho Okulumoꞌ lemeni damenisi do sotoꞌ o-ledelingumuꞌ nene mo sotoꞌ iliho li gizebo lekeseve igi nizave.
20-21 Neꞌmini aꞌmine gamenemuꞌ gizebo igi nizaniꞌ nene aꞌmine gamene alidoꞌ nene Oꞌmosoꞌmo aꞌmine do sotoꞌ molaniꞌ initeꞌ nene gihile izamilizadoꞌ ngeleꞌmize molavo minadotiꞌ nene kuluhizilizaniꞌ nenako nemuꞌ nene gizebo igi nizave. Idoꞌ Oꞌmosoꞌmo gihile izamilizadoꞌ ngeleꞌmize molaniꞌ nene ingine neꞌmine o-ledelive li gilangumuꞌ nevoba asi eiꞌ luloloꞌ do molosa gihile izamilizadoꞌ ngeleꞌmize molaniꞌ ve. Ee, aza gihile izamilizadoꞌ ngeleꞌmize molaniꞌ nene aza tiꞌ lo gele muꞌmusiꞌ ogo minosa nene neꞌmine ineꞌ ve: Alingeꞌ vo tolovo ogaꞌ neꞌmi anauꞌ minilizangutiꞌ nene kuluhizi Oꞌmoso neniꞌ izipahaꞌne zuho nene initeꞌ maliꞌmi anaukisi minami atoliꞌmine igi haza gehepeve nizaniꞌ neꞌmini haza minilisave lo gele muꞌmusiꞌ ogo minineꞌ ve.
22 Ee, laza tiꞌ lo gele none: Oꞌmosoꞌmo do sotoꞌ molaniꞌ initeꞌ mukiꞌ nete nene veneꞌ izipe gidilisa mulumo gilaaꞌ naniꞌ neꞌmini ganakutiꞌ mulumo gili leꞌ goloso izi mini di dizi idise gamenelasi mene ha neꞌmine igi nizave.
23 Idoꞌ inginevoꞌ nene neꞌmine igi nizavoba asi Oꞌmosoꞌmo lehize-ledelineꞌ initekutiꞌ ganaꞌ daloneꞌ initeꞌ Oꞌmosoꞌmi Sikalahuꞌ mo do nonive lazasi nene Oꞌmosoꞌmo izipahaꞌne ve lo do eita ogo okode nene helo vaaꞌ akaloꞌ minidotiꞌ do kuluhize-delingumuꞌ gizebo ogo nonida mene luteuꞌ leꞌ izo minaaꞌ noune.
24 Ee, neꞌmino hele vaaꞌ okode nene do kuluhize-delive lo aꞌminemuꞌ gele muꞌmusiꞌ ogo nonivosa nene do luꞌ izineꞌ ve. Idoꞌ initeꞌ ma sotoꞌ oloseive lo gele muꞌmusiꞌ ogo gizebo minaaꞌ nouneꞌ initeꞌ ma sotoꞌ ilineꞌ nene laza gele muꞌmusiꞌ o mineloneꞌ ma nene gohi gele muꞌmusiꞌ ve lamolosune. Idoꞌ mo ningikeniꞌ initekumuꞌ nene gili muꞌmusiꞌ igi mini gizebo aꞌminemuꞌ nene ma isaꞌmave.
25 Ne neiha olihe ma ningamuneꞌ initekumuꞌ gele muꞌmusiꞌ ogo mineloneꞌ nene mo aꞌminemuꞌ gizebo o do dizo minelesune.
26 Idoꞌ gele muꞌmusiꞌ ogaꞌ nouneꞌ neꞌmo hize eleꞌ o-ledaaꞌ neineꞌ neꞌmino Oꞌmosoꞌmi Sikalahuꞌ neꞌmosi nene monokuꞌ gilizevo ogo minaaꞌ nouningutiꞌ nene hize eleꞌ o-ledaaꞌ neive. Idoꞌ hize eleꞌ o-ledaaꞌ neineꞌ nene laza Oꞌmosola loloneꞌ o neineꞌ monovo nene gele guno amuneꞌ nenako nemuꞌ nene asiꞌve nene lelitoꞌ medelo laza gamazi viseꞌ ogo leꞌ izo luteuꞌ gelaaꞌ nouneꞌ monovo nene hize eleꞌ o-ledo Oꞌmosola lo-ledaaꞌ neive.
27 Neꞌmine ogaꞌ neineꞌ nene Sikalahuꞌ neꞌmo gala gilineꞌ nene luteuꞌ minineꞌ initeꞌ viseꞌ ogo do sotoꞌ ogaꞌ ive Oꞌmoso neꞌmo nene mo ningo gelaaꞌ neive. Nene nanitekumuꞌ ve. Aꞌmine Sikalahuꞌ neꞌmo nene Oꞌmosoꞌmi luloloꞌ do molosa Oꞌmosoꞌmi eveneleloꞌ medelo lelikumuꞌ Oꞌmosola laaꞌ neineꞌ nemuꞌ ve.
28 Idoꞌ laza tiꞌ lo gele none: Lute Oꞌmoso eme nonive adoꞌ eiꞌ gala gilidoꞌ ogo eiꞌ ve lo leleꞌmize molavo nonivemuꞌ nene aza lelita sotoꞌ iliza initeꞌ mukiꞌ nene di laminekovoꞌ i-lidilizadoꞌ nene do molaaꞌ neive.
29 Idoꞌ neꞌmine ineꞌ nene aza ganakutiꞌ ninge lamineꞌ daniꞌ aleve nene eiꞌ gipeleꞌmi emeni dameni neꞌminesi liliꞌ igi minikevo aꞌmine gipele nene nakunolo vaiꞌ neti uvoꞌnibo naba minelive losa engiꞌ nene do kegeso ngeleꞌmize molaniꞌ ve.
30 Ee, aꞌmine do kegeso ngeleꞌmize molaniꞌ aleve nene elesesi molo-ngedo do eita ineꞌ ve. Idoꞌ aꞌmine elese molo-ngedo do eita ineꞌ aleve nene ve lisiheꞌ ve losasi nene lo-ngidineꞌ ve. Idoꞌ aꞌmine ve lisiheꞌ ve lo-ngidineꞌ aleve nene eitatiꞌ monovo lamineꞌ atoliꞌmine ogo minineꞌ nesi nene lehize-ngidineꞌ ve.
Oꞌmosoꞌmo Lulo Atoliꞌmine Ogo Leme Neineꞌ Nene Kilisitoꞌ Do Sotoꞌ Ogavo Ningunidotiꞌ Nene Initeꞌ Hamoliꞌmosi Mudise nGelo Ma Do Goloso O-ledamoloseive Lo Gele Nouve Lo Pauloꞌ Lineꞌ Gamazi
31 Oꞌmosoꞌmo neꞌmino do luꞌ ize neineꞌ nenako nemuꞌ nene tiꞌ lo gelelesune: Oꞌmoso nene lelita molo hize eleꞌ noo-lidineꞌ nenako initeꞌ malitesi nene ngeli livileꞌ gehepeve amilisave.
32 Oꞌmosoꞌmo eiꞌ gipele gehepeve nene do aꞌmanapa amo leliꞌ mukikumuꞌ nene lehize-lidineꞌ ve. Idoꞌ neꞌmine ineꞌ nenako initeꞌ mukiꞌ nene lehize-ledamilivoba mo ezesi do lehize-ledeleseive.
33 Idoꞌ eiꞌ ve lo do kegese-lede neivemuꞌ nene Oꞌmosoꞌmo asiꞌve ve lisiheꞌ ve lo-lede neineꞌ nenako zaho goniꞌ o-ledelive. Mo ma nizamave.
34 Lelikumuꞌ hilive adoꞌ gohi hilingutiꞌ otive Izesuꞌ Kilisitoꞌ Oꞌmosolatiꞌ leme mino ana zamela mino lelitoꞌ medelo gamazite hize eleꞌ o-ledo neineꞌ nenako zaho lihime lemelidoꞌ o neive. Mo ma nizamave.
35 Idoꞌ Kilisitoꞌ lulo leme neivo noneꞌ neꞌmi luloutiꞌ nene initeꞌ maliꞌmosi nene geleleheꞌ ogo hulo heta ma o-ledamoloseive. Adoꞌ geni initeꞌ neꞌmo nehe, lihitehe initeliꞌmi lulouꞌ mineloneꞌ neꞌmo nehe, goboni malaꞌ malaliꞌmi lulouꞌ minelonidiꞌmo nehe, gaꞌna naba helelonidiꞌmo nehe, okodeloꞌ initekumuꞌ viseꞌ olonidiꞌmo nehe, ganala daatoꞌ mine molo minelonidiꞌmo nehe, idoꞌ evenelite libililisa navo luno miteꞌ veleloꞌ ningelonidiꞌmo nehe, nene ma geleleheꞌ ogo ma hulo heta o-ledamoloseive.
36 Idoꞌ mene noluvoniꞌ initeꞌ nevoꞌmine nene laminetoꞌ mo sotoꞌ i-lidaaꞌ naniꞌ nene monoꞌ godolouꞌ tiꞌ li gizadoꞌ nene vo dave:
Guvekasi ve, geita giꞌmizo minuningumuꞌ nene
gamene gamene evenelite nene libili hili hiliꞌ igaꞌ nave.
Neꞌmine naniꞌ nene lelikumuꞌ eveneꞌ ingine gilavo
laza nene sipisipi ize neꞌmine nene nizave li giliisa libilaaꞌ nave.
37 Ne neiha aꞌmine mene luvoniꞌ initeꞌ nete nene mo kekeꞌ livileꞌ amavo aꞌmine lulo leme neive Kilisitoꞌ neꞌmo hize eleꞌ o-ledaaꞌ neineꞌ neꞌmo nene ngivileꞌ gehepeve okune.
38-39 Naza ngivileꞌ gehepeve okune luvoniꞌ nene nanitekumuꞌ ve. Naza nene tiꞌ lo gele eleꞌvoleꞌ o nouve: Oꞌmosoꞌmo lulo leme neineꞌ Guvetesi ve Izesuꞌ Kilisitoꞌ do sotoꞌ o-lidineꞌ neꞌmi lulouꞌ noningutiꞌ nene initeꞌ maliꞌmosi ngelo hulo heta o-ledamoloseive. Adoꞌ heleloneꞌ neꞌmo nehe, minevoꞌ alevoꞌ neꞌmo nehe, angelolitesi nehe, guveꞌinesi ve ato atolite nehe, idise sotoꞌ o-lede neineꞌ initeꞌ nehe, alingeꞌ sotoꞌ o-ledelineꞌ initeꞌ nehe, amuzo malehe initeꞌ ato atolite nehe, veleta nizaniꞌ initelite nehe, galaꞌmuda nizaniꞌ initelite nehe, idoꞌ Oꞌmosoꞌmo do sotoꞌ molaniꞌ initeꞌ gohi ma nilizaniꞌ netesi nehe, nene mo ngelo nomive.