5
1 Ioxe, ta vivixe. Nexi umomomo sou takaukavu mo tavikalangengixu voxo noxou Tila Iesu lexe Anu ulivu uneꞌe talu uasi,
2 xo ngingi ngelavu laixe lexe voxo ane ne uxali ukulukengengi loxo itema sou pakali uxali no ꞌolovoxo lixinu.
3 Xe no mine ta mitema ivikala lexe, “Nenge texolu laixesi mo taꞌumolu mii vile uasi,” la mii sou uꞌoxo masuaneꞌi ne uxali ukulukeneꞌi loxo navunavu uxali noxie sema sou ivoꞌonu ꞌilie. Ia aneꞌi imomomo sou imaxalexu mii ane ne uasi.
4 Io, ta vivixe. Ngingi ngaxolu no isivoxo uasi, la sou voxo ane ne uxali ukulukengengi loxo itema sou pakali uxali no anu uasi.
5 Ngingi latala ne, ngexali loxo aso xe lamana ta ꞌolu, ia nenge no anu ꞌolovoxo xe isivoxo la uasi.
6 La sou nenge taxolu loxo ta mitema sou iai uasi, ia ienge lamanasi mo tautitiiou xe nenge menge tasaxilaꞌinge no anu.
7 Xo aneꞌi ane iai ne, iai no ꞌolovoxosi xe aneꞌi ane iiexu lexa pekiaꞌu mo ixovulaulau ne, iiexu no ꞌolovoxosi.
8 Ia nenge ta mitema ane texolu no anu lamana, la sou nenge menge tasaxilaꞌinge laixe mo nenge tamuxamuxaxu tanenge noxou Lataua mo tamasaxau manina aloxo itema sou ꞌotoꞌoto utaanu tokolomo pekiaꞌu sou utaluxu lutunu xe tamolo tanenge mo taloopala Lataua sou upamaulinenge aloxo itema sou ꞌotoꞌoto utaanu kisivalu e pekiaꞌu sou utaluxu kisou.
9 Xo Lataua musosovosinge sou lexe taxolu no anu laꞌia noxou uasi, ia upamaulinenge noxou Tilasinge Iesu Kalisito.
10 Anu musolisinge sou lexe nenge nengeꞌa anu Iesu taxolu tapita no voxo ane Anu ulivu uneꞌe. Ia lexe nenge tamauli uasi ia tasoli, la anu mii vile uasi, nenge nengeꞌa tamauli mo taxolu tapitasi.
11 La sou ngingi ngapeletotosinge ngatongatoꞌo mo ngasuꞌulingengi ngatongatoꞌo aloxo ngingi ngaꞌoxoꞌoxo vaimomo ꞌo.
Vaikala Kaluxusou
12 Ta vivixe, nexi talingainge aloxo ꞌo. Ngingi ngatoxoneꞌi aneꞌi ane ixaxai pekiaꞌu no taiingengi. Xo Tila musosovosiꞌa lexe aneꞌi iulaxungengi mo imomosou xavutalamengi.
13 Iꞌoxonu xaixai aloxo ne, la sou ngingi ngatoxoneꞌi xe tanengixaꞌa mo ngamasaxaiꞌa manina. Mo ngingi ngongiꞌa ngaxolu, la opongengi uai seꞌisisi.
14 Mo ta vivixe. Nexi tapeletotosinge lexe ngingi ngamomosiꞌa aneꞌi ane itotosa mo ixaxai uasi. Mo ngingi ngaꞌoxo pekiaꞌa aneꞌi ane imamaꞌu mo ngasuꞌulineꞌi aneꞌi ane uao mamalaxaꞌa. Xe ngingi ngaꞌoxo seꞌisisi noxiꞌa ta mitema.
15 Ia mamu sou ngakolinu ꞌiliꞌilixo masumasua e ta mitema iꞌoxo uneꞌe noxinge. Ia no voxovoxo utotomu ne, ngatovo sou ngaꞌoxonu ꞌiliꞌilixo laixe noxinge ngatongatoꞌo mo ulai noxiꞌa ta mitema ukalusi.
16 Utotomu ne, ngaꞌosaꞌosa,
17 mo ngakilaka no voxovoxo utotomu.
18 Mo ngalemo laixe musuku ulai noxou Lataua no anu mimii tavuꞌalo ukalusi. Xo ngingi ta mitema ane noxou Kalisito Iesu, la sou Lataua mumasaxainge lexe ngaꞌoxonu ꞌiliꞌilixo ane ne.
19 Ia mamu sou ngasitanoxu ulee noxou Lataua loxo nenge tasitanoxu navu.
20 Mo mamu sou ngaxiu tumalingeu vaikala palomatana noxou Lataua.
21 Ia ngatilovosou laixe vaikala tavuꞌalo ukalusi, mo sou ngalavu lexe ane laixe manina la ngatetelisou,
22 xe ane masua la ngaxiu tumalingeusi.
23 Nexi talinga lexe Lataua ane itema sou opo seꞌisisi uꞌoxongengi ngaxali loxo ngingi ta naꞌu. Mo talinga lexe Anu molu usaxilaꞌu tanenge ilou uleenenge mo vasimenge, mo sou Tila Iesu Kalisito ulivu uneꞌe la uvikala masua uneꞌe noxinge uasi.
24 Lataua ane muꞌavalinge ne, nenge telavu lexe Anu umulinu vaikala noxou, la uꞌoxonu loxo Anu mulemolu.
25 Ta vivixe. Ngalingasixe kalumo.
26 Xe ngasexelaxaꞌa ta vivinge ukalusi loxo ngingi ta mitema noxou Lataua.
27 Mo eni avikalangengi loxo Tila uvikalangengi lexe ngingi ngaitisou kaukavu ane ꞌo ulai noxiꞌa ta vivixe ukalusi.
28 Nexi talinga lexe alauna noxou Tila noxinge Iesu Kalisito uxolu noxinge.