17
Yawe God kovitumaghaneni
5 Yawe God mma naboni iwona,
“Tagu nokodi iiyawogha wawaya yadi maragata kawagha situmaghanedi na anawonaimimagidi.
Bi sanoghosi da maragata na wawaya gwabidima yapiika,
na nuwanuwadiye Tagu Yawe God samiiri kubutegu.
6 Wawayidi na ware kii pokidi mayabe samiimiirina naboni.
Toudi gawara kanakanane meme kii gesiyagoogo na name sinamakae,
tanavina rariyegayegiina bi getana iiyabo nama iyamakamakena.
Getana awaki sawaridi miisedi sinakita bagune raghanina sinatubughana.
7 Bi iiyawogha Tagu Yawe God situmaghanegu na animiiseyedi,
toudi parapa yadi tumagha Tagu biidi sitore.
8 Toudi ware kii rarima kawabarane sagoogo na naboni,
ramramdi sayowogha sanagho rarima ririne.
Toudi gabudara muyamuyana gesiyinuwapoyenina,
bi raghanina kiyara gegha na
naghara gesiyakovina,
basuna toudi rugurugudi na nonowa matayidi samakamake;
bi nonowa suwuwagha.
9 Getana iiyabo rubana da wawaya nuwanuwana inakita wiimasiyeni,
touna wiiyabaworaworana, ware gubaga tarabu naboni,
gerubana iiyabo inabunamina.
10 Bi gegha da Tagu, Yawe God na wawaya nuwanuwadi akitakita,
Tagu yadi noghota da wiina aruruwiitete yapoyaporidi,
bi yadi bera rubane iimiisanena mayedi,
bi awaki sabera kiiravinena yadi miisana waghata averedi.”