24
Dam Isrel sivisuwona da Yawe God sinabigeni
1 Wasina bi muriye na Josuwa, Isrel dogadogara tupadi damvedamve iwonedi da Sikem kwanatune siyitaghomidi. Raghanina name sivitaghomidi na Josuwa, dogadogara, wiinaghowana, wiitupawamiwamira da babada ikwatuvedi sipiika da God naghone siyamiiri.
2 Bi Josuwa, wawaya tupadi iwonedi bo, “Yawe God, dam Isrel yadi God iwona bo, ‘Naghove waghata kayekikimi Tera da natunatuna Abraham da Naho, Euprate rarimina nawane siyamakamake, bi god mududi siyapeepetedi.
3 Bi gegha da nosiminaki Abraham noko kuburinama akabi da avinaghokedari da Kenen kuburina tupana kaverarughuwoneni. Bi natuna Aisik gwabinama na nosinosina korotodi avereni.
13 Kubura ere kwabudi averemi, meme getami koyawawana bi kate kwanatu getami koyayoghana na averemi, kwanatudi meme kata komakamakena. Bi greip da oliv uwadi kokamkam, bi nokodi uravidi da kiidi getami koyawawana.’ ”
14 Wasina bi Josuwa, Isrel damdi iwonena mayedi bo, “Noko biidi Yawe God kokabisisireni da nuwanuwami tupanama kobagibagiyeni. Tarabiibiisaka mekodi kayekikimi siyapeepetedina, raghanina Euprate rarimina nawane siyamakamake da kate Ijiptne na kovitavetaveyana, bi Yawe God kawagha konabagibagiyeni.
15 Bi memeda Yawe God bigenina konasinighiiyeni, na kata konivinevinegha da meko godna konabigeni, nokodi Eupratene kayekikimi sibigedina bo nokodi god, Amori damdi sibigedina, bi kata yadi kubure komakamakena. Bi tagu da yagu rakaraka yawata, na Yawe God kana bagibagiyeni.”
16 Wasina bi wawaya siwona bo, “Toumii gemeyani Yawe God kanakuyoveni bi god mududi kanabigedina.
17 Kiiravine Yawe yada God, na touna kayekikida iviyawiidi da kate touda teya, raghanine Ijipt kubure tayibagubaguranana. Bi berakayowiiwiiyaka maragasidi matadaye ibera, bi kate raghanina mayabe kada aviya kamodiye tayapeepewana ikoyayida.
18 Bi dam Amori da dam mududi mmko kuburine siyamakamake bi kiiravidaye na irukwavina sikanibu. Noko biidi na toumii teya, Yawe God kanabigeni, kiiravine touna kawagha na yada God.”