3
1 Nnaut oh; Allah tait yawyan marak anu toni syok re yawe anu fo ku wAit! Ae, anu fo ku wAit ro wotur fea! Tna raa ro tabam refo mhar Allah yhaf mato rAit kaket fee. Ana weto wase Bja ranu tibyo ana mhaf rana mnan msya anu bhaf ranu to fee. Feto to ana mhar anu, ku wAit weto fee ye.
2 Taja, tme, tao, tano na ro jõ tksoh; mfo wefo fo anu bhar oh bwe anu ku ro Allah wAit. Menohe anu hre bnaut bwe bmos ranu fo meen mnan fyi? Anu wase fares. Menohe anu bhar bwe meen Yesus yama tabam refo mun ro ewok to, kbe anu beta bmat bi Ait. Bmat tibyo haberek bnan bi Ait ye.
3 Tna awya ro yinaut tna ywof ti ro Ait yama reto to, ja yisoh ait kaket re yno iro fee. Yawe yhau yhaf mato moof ynan bi Ait ro yhaf moof sai.
4 Awya ro yiwana watum ro Allah to, Ait retait yno iro meto. Tibyo awya ro yno iro to, ait retait yiwer watum ro Allah.
5 Anu nhar nwe Yesus yama mkah bo yyon iro wanu. Tna bi Ait yno iro aro fee.
6 Tibyo awya ro yhau yhaf sau su ysya bi Ait to, ja hawe yno iro aro u. Awya ro ja yno iro yoyo to, ait retait yamo yo kʼbi Ait fefares, tna wase bi Ait fares.
7 Kukek wojõ ro jõ ksoh; raa mama mkyas bo mawe moo nhaf wanu to, nri ma! Nnaut oh; awya ro ja yno bo moof to, ait retait raa ro yoof yfi bi Ait ro yoof.
8 Tna awya ro ja yno iro to, ait retait raa ro kabes yabi (Iblis) rait. Mbam tiwya tinyi snok ttis rau to kabes yabi yno iro bait. Tna Ku ro Allah yare yama mkah bo yitrah bo ro kabes yabi yno mkair weto.
9 Kukek ro Allah wAit to, ja mno iro yoyo fee. Har rAit mhau matam ana tibyo ana ja wase mno iro. Ana mnan fi Maja rana ro ja wase yno iro.
10 Feto to, fyi re anu bhar bwe Ku ro Allah wAit weto miyo? Tna fyi re anu bhar bwe raa ro kabes yabi wait weto miyo? Tawe kʼanu tawe; awya ro ja yno bo ro mkair to ait retait ku ro Allah fee. Tna awya ro ja yatmof raa anya kaket to fee, ait retait ku ro Allah fee ye.
Raa matmof anya kaket to merif mawe ana to ku ro Allah wAit
11 Tiwya tinyi raa mkyas watum reto kʼanu mawe, “Nko hawe sai, natmof raa anya kaket.”
12 Feto to knait raa nnan fi Kain tiwya knait yao to ma! Tiwya Kain tait kabes yabi (Iblis) ybo ait. Ait yno bo ro mkair tna ymat he yao rait yno bo ro moof. Ymat feto tibyo yhaf sarok yame yao yajat.
13 Taja, tme, tao, tano na; raa ro mimara mboh to, kbe knait anu tu oh. Ana knait anu feto, nrok ktak ma!
14 Anu batmof raa anya ro Kristen to, feto oh mi anu bhar bwe anu bwyan wanu ro tiwya mhai weto to, mfo refo mrok maam oh. Tna awya ro yatmof raa anya to fee, yawyan rait to mhai fares.
15 Allah yawe, “Awya ro knait raa anya ro Kristen to, ait retait yber safo ynan raa ro yame raa yajat.” Tna anu nhar nwe raa ro yame ajat retait tait meen ykai roon ro hame fee.
16 Anu bno fyi re batmof raa anya kaket? Kristus yerif iso ro moof kʼanu: Ait ysan yetsu rAit, yawe yno bo re anu meen bhau hame wajin. Rau ro moof to, anu ye bno bo bawya sai afo re riof kʼraa Kristen anya ye.
17 Soh raa sait yse bombra msis oh tna ymat raa Kristen anya ro mse bo marak to fyi? Soh ait yatmof raa weto ait retait ynan Allah ro ja yatmof raa ye. Soh ait yatmof raa weto fee, ait retait wase boatmof ro Allah.
18 Kukek wojõ; mfo refo anu bmo raa ro Kristen, tibyo anu bhar bo ro ati. Tna anu bbo bno bo ro ati ye. Anu ja nkyas nwe, “Ja amu natmof raa anya kaket.” Nkyas feto nkah nsoh wanu sai ma. Rau ro moof to, anu natmof raa anya tna nno bo ro moof kʼana ye. Nkyas nsoh sai ma.
19 Fyi re anu bhar bwe anu kro Allah mam iso rAit ro ati to? Raa ro ja yatmof raa anya mnan fi feto to, ait retait yhar yawe ait kro iso ro ati tu. Tibyo ait yamo yo kʼAllah to waa fee.
20 Menohe soh anu sait yno bo ro mkair. Rau ro moof to, ait hah ye yamo yo kʼAllah fooh. Tna yisoh yhaf moof u. Nnaut kaket oh: “Allah yhar bombra beta tna Ait yatak yisoh anu nhaf wanu u.”
21 Taja, tme, tao, tano na ro jõ ksoh; soh Allah yisoh anu bhaf wanu oh to, anu waa fee. Anu bmo bo kʼbi Ait sai. Anu tetet fee.
22 Soh anu ja bri bo ro Allah ybis kʼanu tna bbo bno, kbe Ait yhaf mnan ysya anu. Soh feto to, bo bawya ro anu byoh kʼAit to, kbe Ait yoo yee kʼanu.
23 Tna bo ro Ait ysi kʼanu to, au oh mefo: Smot Ku rAit Yesus Kristus kaket. Tna bko hawe sai anu batmof raa anya kaket, mnan fi tiwya Ait ysi kʼanu oh.
24 Awya sai ro yari bo ro Allah yawe tna ybo yno to, ait oh mi raa ro yhaf sau su ysya Allah. Tna bi Ait yhaf sau su ysya ait retait ye. Allah yse Har rAit mjin kʼanu bhaf wanu afo re anu bhar kaket bwe Ait yhaf sau su ysya anu.