10
1 Wɑ̃ɑrɑ mɑn tusɑ.
Nɑ ǹ nɛn weeweenu yɔ̃rɑsiɑmɔ.
Kon ɡerewɑ wɑhɑlɑ ye nɑ mɔ̀.
2 Kpɑ n Gusunɔ sɔ̃ n nɛɛ, ɑ ku mɑn tɑɑrɛ wɛ̃.
A de n ɡiɑ yèn sɔ̃ ɑ mɑn nɔni swɑ̃ɑru kpɛ̃ɛ.
3 Yinni Gusunɔ, n nun wɛ̃re ɑ kɑ mɑn kɔ̃sɑ kuɑ,
nɛ wi nɑ sɑ̃ɑ wunɛn nɔmɑn tɑkɑ koorɑ,
kpɑ ɑ sere de ɡɑri yi tɔn kɔ̃sobɑ bɔkuɑ yi koorɑ?
4 Tɔnun nɔniyɑ ɑ mɔ?
A rɑ yɑm wɑwɑ nɡe tɔnu?
5 Wunɛn wɑ̃ɑrun tɔ̃nu nu ko n sɑ̃ɑwɑ nɡe tɔnuɡinu?
Wunɛn wɑ̃ɑrun wɔ̃su, su nɔru mɔwɑ nɡe tɔnuɡisu?
6 Mbɑn sɔ̃nɑ ɑ kɑsu ɑ kɑ nɛn kɔ̃sɑ ɡiɑ.
Mbɑn sɔ̃nɑ ɑ hɑniɑ mɔ̀ ɑ kɑ nɛn torɑru wɑ.
7 A yɛ̃ mɑ nɑ ǹ sɑ̃ɑ tɔn kɔ̃so.
Goo kun mɑɑ kpɛ̃ u mɑn wɔrɑ wunɛn nɔmɑn di.
8 Wunɛn nɔmɑ yɑ mɑn mɔmɑ yɑ tɑkɑ kuɑ mɑm mɑm.
Yerɑ kɑɑ mɑn kpeerɑsiɑ?
9 A yɑɑyo mɑ wunɑ ɑ mɑn mɔmɑ nɡe mɛ bɑ rɑ ɡɑ̃ɑnu mɔm kɑ sɔndu.
Yerɑ ɑ kĩ ɑ mɑn kpeerɑsiɑ, n ɡɔsiɑ tuɑ?
10 Wunɑ ɑ mɑn mɔmɑ nɛn mɛron nukurɔ
nɡe mɛ bom mu rɑ sinum ko ɡbɛ̃ɛru sɔɔ mu ɡɔsiɑ ɡɑsɑru.
11 Wunɑ ɑ nɛn wɑsin kukunu kɑ yin sĩinu kuɑ,
mɑ ɑ nu yɑɑ bɑɑsi kɑ ɡɔnɑ wukiri.
12 A mɑn wɑ̃ɑru wɛ̃ wunɛn durom sɔ̃.
Mɑ ɑ tu nɛnusi ɑ kɔ̃su.
13 Adɑmɑ ye ɑ rɑɑ mɑn beruɑmmɛ wunɛn ɡɔ̃ruɔ,
nɑ ye ɡiɑ.
14 Nɑ̀ n torɑ, ɑ rɑ n mɑn mɛɛrɑ,
ɑ ku rɑ mɑn yen suuru kue.
15 Nɑ̀ n sɑ̃ɑn nɑ tɔn kɔ̃so, nɑ kuɑ bɔ̃ruro.
Nɑ̀ n mɑɑ dɛɛren nɑ, nɑ ǹ mɑɑ wiru seeyɑmɔ, domi sekurɑ mɑn mɔ̀,
mɑ nɑ nɔni swɑ̃ɑru nɔɔrɑmɔ.
16 Nɑ̀ n wiru seeyɑ, ɑ rɑ mɑn nɑɑ ɡire nɡe ɡbee sunɔ,
kpɑ ɑ mɑn so ɑ surɑ kɑ wunɛn sɔm mɑɑmɑɑkiɡiɑ.
17 A mɑɑ mɑn nɔni swɑ̃ɑru suremɔ ɑ sɔnnɑmɔ,
mɑ ɑ wunɛn mɔru sosimɔ.
A derɑ yibɛrɛbɑ bɑ nɑ bɑ mɑn tɑbu wɔri.
18 Mbɑn sɔ̃nɑ ɑ mɑn yɑrɑ nɛn mɛron nukurun di.
N dɑɑ burɑm bo n ɡbi mi, kpɑ ɡoo u kun mɑn wɑ.
19 Kpɑ nɑ n sɑ̃ɑ nɡe wi u kun dɑɑ wɑ̃ɑ,
domi nɑ kon dɑɑ duɑwɑ siki wɔruɔ
sɑnɑm mɛ nɑ yɑrɑ nɛn mɛron nukurun di.
20 Wɑ̃ɑ te tɑ mɑn tie, tɑ ǹ mɑɑ kpɑ̃.
Yen sɔ̃, ɑ mɑn derio
n nuku dobu ko sɑɑ fiiko ye sɔɔ,
21 n sere dɑ ɡɔriɔ mi yɑm wɔ̃ku bɑkɑrɑ wɑ̃ɑ,
mi nɑ̀ n dɑ, nɑ ǹ mɑɑ wee.
22 Tem mi, yɑm wɔ̃ku bɑkɑrɑ tɑ wɑ̃ɑ kɑ mɑɑ burisinɑɑ.
Yɑm bururɑm mɛ mu wɑ̃ɑ mi,
mu sɑ̃ɑwɑ yɑm wɔ̃ku bɑkɑru.
Sofɑɑ u Yoobu wisɑ u nɛɛ, u wurɑmɑ Gusunɔn mi