16
1 Yoobu u Elifɑsi wisɑ u nɛɛ,
2 nɑ ɡɑri yin bweseru nɔɔre nɔn dɑbinu.
Bɛɛ, i sɑ̃ɑwɑ nuku yɛmiɑsio be bɑ nɛn wɑhɑlɑ sosimɔ.
3 Dommɑ kɑɑ wunɛn ɡɑri sɑɑri kɑmɡii nini kpe.
Mbɑn sɔ̃nɑ ɑ kɑ mɑn sikirinɑmɔ.
4 Ì n dɑɑ wɑ̃ɑ nɛn ɑyerɔ,
kpɑ nɑ n mɑɑ wɑ̃ɑ bɛɛɡirɔ,
kon bɛɛ ɡɑri sɑɑrisi n wii ɡimɑnu koosi.
5 Nɛn ɡɑri yi koo bɛɛ dɑm kɛ̃,
kpɑ n bɛɛ nukuru yɛmiɑsiɑ kɑ nɛn ɡɑri yi.
6 Nɑ̀ n ɡɑri mɔ̀, nɛn wɑhɑlɑ yɑ ǹ kpeemɔ.
Nɑ̀ n mɑɑ mɑɑri, yɑ ǹ doonɔ.
7 Wee tɛ̃, Gusunɔ u derɑ nɑ dɑm dwiiyɑ.
Mɑ u nɛn yɛnun yɑ̃nu kpuro ɡurɑ.
8 Nɑ woorɑ, nɛn ɡɔnɑ ɡɑwɑre.
Yɑ sɔ̃ɔsimɔ mɑ nɑ torɑ.
9 Gusunɔ u kuɑ nɛn yibɛrɛ,
u mɑɑ mɑn ɡire kɑ mɔru u nɔɔ dɔnnɛ.
Mɑ u mɑn nɔni ɡirɑri u kɑsu u nɛn wɑsi kɑsuku nɡe ɡbeeku yɑɑ.
10 U derɑ tɔmbɑ mɑn yɑɑ kɑsikimɔ kɑ ben ɡɑri sɑɑrinu.
Bɑ mɑn wɔmmɔ, bɑ mɑn bɑɑri soomɔ.
Be kpurowɑ bɑ mɑn nɑɑ swĩi.
11 Gusunɔ u mɑn be bɑ ǹ win bɛɛrɛ yɛ̃ nɔmu sɔndiɑ.
U mɑn tɔn kɔ̃sobu nɔmu bɛriɑ.
12 Nɑ rɑɑ wɑ̃ɑ bɔri yɛndu sɔɔ mɑ u mɑn burisinɑ.
U mɑn nɛnuɑ birun di, mɑ u mɑn kɔsukɑ.
U mɑn kuɑ nɡe tũburu te u tweemɔ.
13 Win sɛ̃ɛnu mɑn kooro bure.
U nɛn ɡɑbu swii yɑburɑ kɑ wɔnwɔndu sɑriru.
Mɑ u nɛn yɛ̃sɔ kɔrɑ u yɑri temɔ.
14 U mɑn wɔrimɑ nɡe tɑbu durɔ.
Mɑ u mɑn soomɔ u mɛɛrɑ mɔ̀.
15 Nɑ sɑɑki deewɑ,
mɑ nɑ nɛn wiru tuɑ wisi nuku sɑnkirɑnun sɔ̃.
16 Nɑ wuri kuɑ sere nɛn nɔni swɛ̃rɑ,
mɑ nɑ ɡɔɔ nɔnu terɑ.
17 N ǹ mɔ nɑ kɔ̃sɑ ɡɑɑ kuɑ.
Nɛn kɑnɑru tɑ rɑ n mɑɑ dɛɛrewɑ bɑɑdommɑ.
18 Wunɛ tem, ɑ ku nɛn yɛm bere.
A de nɛn kuuki yi nɔɔrɑ bɑɑmɑ kpuro.
19 Domi nɑ yɛ̃ kɑm kɑm mɑ nɑ seedɑɡii mɔ wɔllɔ.
U wɑ̃ɑ mi, u kɑ mɑn yinɑmɔ.
20 Nɛn kpɑɑsibu bɑ mɑn yɑɑkoru mɔ̀.
Adɑmɑ Yinni Gusunɔwɑ nɑ kɑnɑmɔ kɑ swĩi.
21 Nɛn seedɑɡii wi, u sun sirio nɛ kɑ Gusunɔ
nɡe mɛ bɑ rɑ tɔnu kɑ win beruse sirie hɑnduniɑ sɔɔ.
22 Domi nɛn wɑ̃ɑrun tɔ̃nu nu kpeemɑ.
Mɑ nɑ dɔɔ kɑ swɑɑ yèn min di bɑ ku rɑ mɑɑ wurɑmɛ.
Yoobu kun mɑɑ yĩiyɔbu mɔ