19
1 Yoobu u seewɑ u win bɔrɔbɑ sɔ̃ɔwɑ u nɛɛ,
2 sere sɑɑ yerɑ̀ i ko i n wɑ̃ɑ i n mɑn nuki sɑnkumɔ,
kpɑ i n mɑn tɔ̃yɑ mɔ̀ kɑ bɛɛn ɡɑri sɑɑrinu.
3 Wee yen nɔn dɑbinɑ mi,
i kɑsu i mɑn wɔmɛ.
I ǹ sekuru mɔwɑ i kɑ mɑn burisinɑmɔ mɛsum?
4 Nɑ̀ n torɑn nɑ kɑ ɡem, nɛn ɡɑriyɑ.
5 I tɑmɑɑ i mɑn dɛɛrɑm kerewɑ,
kpɑ i mɑn nɛn durum sɔ̃ɔsi?
6 I de i n yɛ̃ mɑ Gusunɔwɑ u kɑ mɑn mɔ̀.
Mɑ u mɑn suremɔ win yinɑ sɔɔ.
7 Wee, nɑ nɔɔɡiru suɑ nɑ nɛɛ,
win kookoo si, su ǹ wɑ̃.
Adɑmɑ ɡoo sɑri wi u mɑn wisɑ.
Nɑ ɡbɑ̃rɑmɔ bu mɑn fɑɑbɑ ko,
ɑdɑmɑ nɑ ǹ fɑɑbɑ wɑ.
8 Gusunɔ u nɛn swɛɛ kpuro kɛnuɑ bɑɑmɑ.
Mɑ u derɑ yɑm wɔ̃kurɑ yi wukiri sere nɑ ǹ kpɛ̃ n ɡɑm dɑ.
9 U nɛn wirun furɔ wukɑ
u nɛn bɛɛrɛ wunɑ.
10 U mɑn kɔsukɑ bɑɑmɑ kpuro.
Mɑ u nɛn yĩiyɔbu wunɑ nɡe dɑ̃ɑ te bɑ wukɑ.
11 U kɑ mɑn mɔru bɑrɑ.
Mɑ u mɑn kuɑ nɡe win yibɛrɛ.
12 Win tɑbu kowobu bɑ nɔɔ tiɑ kuɑ mɑ bɑ seewɑ bɑ mɑn wɔrim wee.
Bɑ swɑɑ yɑbɑ sere bɑ kɑ mɑn ɡirɑri.
Mɑ bɑ nɑ bɑ ben sɑnsɑni ɡirɑ bɑ kɑ mɑn sikerenɛ.
13 U derɑ nɛn mɛro bisibu bɑ mɑn deri,
mɑ nɛn bɔrɔbɑ bɑ yɑrinɑ.
14 Nɛn berusebu bɑ mɑn biru kisi,
mɑ nɛn kĩnɑsibu bɑ mɑn duɑri.
15 Wee nɛn sɔbu kɑ nɛn sɔm kowobu bɑ mɑn mɛɛrɑ nɡe sɔɔ wi bɑ ǹ yɛ̃.
16 Nɑ̀ n nɛn sɔm kowo sokɑ, u ku rɑ wure.
Nɑ̀ n nùn suuru kɑnɑmɔ,
u rɑ n mɑn ɑtɑfiiru sɑ̃ɑwɑ.
17 Nɛn kurɔ u ku rɑ nɛn nuburu kɑ̃.
Mɛyɑ mɑɑ nɛn bibu bɑ mɑn ɡɛmɑ.
18 Kɑ mɑm bibɔ kpuro bɑ mɑn ɡɛmɑwɑ.
Nɑ̀ n ɡɑri ɡeruɑ, bɑ rɑ mɑn wɔmɛwɑ.
19 Be nɑ rɑ kɑ ɡerunɛn tii bɑ mɑn tusɑ.
Be nɑ mɑɑ kĩ bɑ mɑn seesi.
20 Nɛn wɑsin yɑɑ yɑ nɛn kukunu mɑni.
Wee wɛ̃siɑru tɔnɑwɑ tɑ mɑn tie.
21 Nɛn bɔrɔbɑ, i nɛn wɔnwɔndu wɑɑwo.
Domi Yinni Gusunɔwɑ u mɑn sɛɛyɑsiɑmɔ.
22 Mbɑn sɔ̃nɑ i mɑn nɑɑ swĩi nɡe mɛ Gusunɔn tii u mɑn nɑɑ swĩi.
Nɔni swɑ̃ɑ te i derɑ nɑ wɑ, tɑ ǹ bɛɛ turɑ?
23 Nɑ kĩ bu nɛn ɡɑri yore tireru sɔɔ.
24 Kpɑ bu mɑɑ yi yore kperu sɔɔ kɑ sisu
yi n wɑ̃ɑ mi, sere kɑ bɑɑdommɑɔ.
25 Adɑmɑ nɑ yɛ̃ mɑ nɛn yɑkio u wɑsi
wi u koo rɑ se u kɑ mɑn yinɑ.
26 Nɛn wɑsi yì n kɔ̃sɑ yi kpɑ,
sɑɑ ye sɔɔrɑ kon Gusunɔ wɑ.
27 Wiyɑ ko nɑ n mɛɛrɑ.
Nɛn tiin nɔniyɑ yi koo nùn wɑ, n ǹ mɔ ɡooɡii.
Nɛn ɡɔ̃ru ɡɑ tɛmɑnɑbu kpɑnɑmɔ yèn sɔ̃ n tɛɛmɔ.
28 Sɑɑ ye sɔɔ, i ko ɡere i nɛɛ,
mbɑn sɔ̃nɑ i mɑn nɑɑ ɡire.
Domi nɛn ɡem mu koo sɔ̃ɔsirɑ.
29 Adɑmɑ i n yɛ̃ mɑ Gusunɔ u koo bɛɛ siri.
Yen sɔ̃, i win tɑkobi nɑsio.
Domi yen sɛɛyɑsiɑbu sɛ̃.
Kɔ̃sɑ ye yɑ koo tɔn kɔ̃so deemɑ