24
1 Yoobu u mɑɑ nɛɛ,
mbɑn sɔ̃nɑ Gusunɔ Dɑm kpuroɡii ku rɑ sɑɑ yi u kɑ tɔmbu siri.
Mbɑn sɔ̃nɑ be bɑ nùn mɛm nɔɔwɑmmɛ bɑ ku rɑ sɑɑ ye wɑ.
2 Domi wee, ɡɑbu bɑ ɡɑbun tem ɡbɛnimɔ bɑ kɑ beɡim mɛnnɑmɔ.
Mɑ ɡɑbu bɑ yɑ̃ɑnu kpɑre ni bɑ ɡbɛnɑ.
3 Gɑbɑ mɑɑ ɡobekubɑn kɛtɛkunu mwɛɛrimɔ.
Mɑ bɑ ɡɔminibun nɛɛ tɔrubɑ mwɑɑmɔ.
4 Bɑ wɔnwɔndobu dɑm dɔremɔ bɑ ɡirɑmɔ swɑɑn di.
Mɑ sɑ̃ɑrobu bɑ swɑɑ kɑsu bu kuke.
5 Sɑ̃ɑro be, bɑ yɑɑyɑɑre mɔ̀ ɡbɑburɔ nɡe ɡbeeku kɛtɛku,
bɑ dĩɑnu kɑsu bu ben bibu wɛ̃.
6 Be wee bɑ yɑkɑsu ɡɛ̃ɛmɔ ben yɑɑ sɑbenun sɔ̃,
mɑ bɑ dĩɑnu kunɔnu mɔ̀ tɔn kɔ̃son ɡberɔ.
7 Adɑmɑ bɑ ǹ bekuru mɔ te bɑ koo wukiri wɔ̃kuru purɑn sɔ̃.
8 Be wee bɑ dɑ bɑ bɑkɑ kpee bɑɑbɑ sɔɔ
yèn sɔ̃ bɑ ǹ wɑ̃ɑ yeru mɔ.
Miyɑ ɡurɑ bu wɑɑyɑmɔ.
9 Tɔn kɔ̃so wi, u rɑ ɡobeku mwɛwɑ kɑ dɑm.
Kpɑ u sɑ̃ɑron yɑbe tee te u mɔ tɔrubɑ mwɑ.
10-11 Be wee, bɑ yɔ̃su bɑsi tɔn kɔ̃son kɑrɑ sɔɔ.
Bɑ doo bɔkɑ sɔɔwɑ, mɑ ɡɔ̃ɔrɑ bu mɔ̀.
Bɑ nùn ɡum kuɑmmɛ, bɑ resɛm ɡɑmɑmɔ.
Adɑmɑ bɑ ǹ kɑ̃kɔ bu ye nɔ,
bɑɑ mɛ nim nɔru ɡɑ bu mɔ̀.
12 Wuu mɑrosɔ ɡɑbɑ ɡɔɔ dɔɔ, bɑ wuri mɔ̀.
Be bɑ mɛɛrɑ kuɑ bɑ weeweenu mɔ̀.
Adɑmɑ Gusunɔ kun yen ɡɑɑ ɡɑrɑ.
13 Gɑbu bɑ yɑm bururɑm tusɑ.
Bɑ ku rɑ n wɑ̃ɑ mɛ sɔɔ.
Domi bɑ ǹ yɛ̃ mi mu kɑ bu dɔɔ.
14 Tɔn ɡowo u rɑ sewɑ buru buru yellu
kpɑ u sɑ̃ɑrobu ɡo.
Wɔ̃kuru kpɑ u ɡbɛni.
15 Yɑm wɔ̃ku bere bererɑ sɑkɑrɑ kowo u rɑ n kɑsu.
U rɑ nɛɛwɑ, ɡoo kun nùn wɑsi.
Kpɑ u win wuswɑɑ sɔnditiɑ wukiri.
16 Yɑm wɔ̃kuru sɔɔrɑ ɡbɛnɔ u rɑ diɑ kɔsuku.
Sɔ̃ɔ sɔɔ, kpɑ u tii kɛnusi win yɛnuɔ.
U ǹ yɑm bururɑm yɛ̃.
17 Ben mi, bururu tɑ sɑ̃ɑwɑ nɡe ɡɔɔn tiro.
Bɑ rɑ n nɑndewɑ.
18 Adɑmɑ bɛɛ i nɛɛ,
tɔn kɔ̃so u sɑ̃ɑ nɡe nim yɑkɑ.
Bɑ win tem bɔ̃rusi.
U ǹ mɑɑ dɔɔ win resɛm ɡbɑɑrɔ.
19 Nɡe mɛ tem mu rɑ nim nɔ ɡbeburun sɑɑ sɔɔ,
nɡe mɛyɑ ɡɔribun wɑ̃ɑ yeru tɑ rɑ durumɡii mwɛ.
20 Wi u tɔn kɔ̃so mɑrɑ u rɑ nùn duɑriwɑ.
U koo kowɑ kɔkɔnun dĩɑ ɡeenu.
Tɔmbu kpurowɑ bɑ koo nùn duɑri.
Kpɑ u wɔrumɑ u bɔɔrɑ nɡe dɑ̃ɑ.
21 Tɔnu win bweseru u rɑ kurɔ wĩron yɑ̃nu ɡurewɑ.
U ku rɑ ɡɔmini ɡeɑ ɡɑɑ kue.
22 Adɑmɑ Gusunɔwɑ u dɑm mɔ u kɑ tɔn kɔ̃so ben wɑ̃ɑru yɔ̃rɑsiɑ.
Ù n bu wɔri, bɑ ku rɑ n mɑɑ yɛ̃ nɡe bɑ ko n wɑ̃ɑ.
23 Gɑsɔ u rɑ bu yĩiyɔbu wɛ̃,
bɑ n kɑ wɑ̃ɑ bɔri yɛndu sɔɔ.
Adɑmɑ u rɑ n ben sɑnu sɑnusu mɛɛrɑwɑ.
24 Bɑ̀ n kɑ tii yinɑ kpuro, subɑru sɔɔ, bɑ kpɑwɑ.
Bɑ rɑ wɔrumɛwɑ mii mii bu ɡbi nɡe tɔn diro.
Kpɑ bɑ n sɑ̃ɑ nɡe dobi yi bɑ burɑ.
25 Ye nɑ ɡeruɑ mi, ɡeemɑ.
Wɑrɑ u koo mɑn siri,
kpɑ u nɛɛ, nɛn ɡɑri yi, yi ǹ ɑsɑnsi ɡɑɑ mɔ.
Gusunɔ u dɑm mɔ ɡɑ̃ɑnu kpuron wɔllɔ