30
1 Tɛ̃ wee bibu bɑ mɑn yɛ̃ɛmɔ,
bɑ ǹ mɑm nɛn tɔkɔru ɡɑrɑ,
be, bèn bɑɑbɑbɑ bɑ ǹ turɑ
bu nɛn bɔ̃nu somi bu kɑ nɛn yɑ̃ɑ ɡɔ̃ɔ kpɑrɑ.
2 Mbɑ bɑ koo rɑɑ kpĩ bu mɑn kuɑ,
be, be bɑ sɑ̃ɑre bɑ ɡɔɔ dɔɔ.
3 Wee bɑ sɑ̃ɑru kɑ ɡɔ̃ɔru soore.
Bɑ dɑ ɡbɑburɔ bu kɑ dĩɑnu kɑsu bu di.
Adɑmɑ ɡɑ̃ɑnu sɑri mi.
4 Bɑ rɑ dewɑ dɑ̃ɑ kikun bɔkuɔ bu yɑkɔ burɑ ɡe ɡɑ bɔru mɔ ɡɑ n sɑ̃ɑ ben dĩɑnu,
kpɑ bɑ n kiku ɡɑɡun ɡbini dimɔ.
5 Bɑ rɑ bu ɡirewɑ tɔmbun suunu sɔɔn di,
bɑ n bu nɑɑ swĩi nɡe ɡbɛnɔbu.
6 Kpɑ bu dɑ bɑ n wɑ̃ɑ kpee wɔrusɔ kɑ wɔwi sɔɔ,
7 bɑ n wɑ̃ɑ bɑ n tɑɑsinɛ sɑ̃kin suunu sɔɔ,
kpɑ bɑ n kuuki mɔ̀ kikisɔ,
8 bɑ n sɑ̃ɑre nɡe wiirobu,
ǹ kun mɛ nɡe be bɑ ɡɛmɑ bɑ ɡirɑ wuun di.
9 Tɛ̃ wee, ben bibɑ bɑ mɑn yɛ̃ɛmɔ,
bɑ mɑn womusu dokemɔ.
10 Bɑ rɑ mɑn biru kisi yèn sɔ̃ bɑ ǹ kĩ bu mɑn wɑ.
Kpɑ bu mɑn yɑ̃ɑtɑm sie.
11 Domi Gusunɔ u mɑn funɛ wunɑ, u sekuru doke.
Yen sɔ̃nɑ ben ɡoo kun nɛn bɛɛrɛ yɛ̃ bɑɑ fiiko.
12 Tɔn kɔ̃so be, bɑ mɑn seesimɔ.
Bɑ kɑsu bu mɑn tɛ̃kɑ di bu surɑ.
Bɑ swɑɑ kɑsuwɑ bu kɑ mɑn kɑm koosiɑ.
13 Bɑ nɛn swɛɛ bɔɔrɑ.
Bɑ kookɑri mɔ̀ bu kɑ mɑn kɑm koosiɑ,
be, be ɡoo kun somiru wee.
14 Be wee bɑ yɑbɑ mi nɑ kukuɑ.
Mɑ bɑ dumɔ min di bɑ mɑn wɔrimɔ.
15 Mɑ bɛrum mɑn mwɑ,
nɛn bɛɛrɛ yɑ doonɑ nɡe woo.
Nɛn bɔri yɛndɑ doonɑ nɡe ɡuru wiru.
16 Tɛ̃, nɑ wɑ̃ɑwɑ ɡɔɔ sɔɔ.
Nɑ wɑhɑlɑ wɔri nɑ kpɑ.
17 Nɛn kukunu kpuro rɑ n tennɑmɔwɑ wɔ̃kuru.
Nɑ ku rɑ wɛ̃re wɑhɑlɑ yen sɔ̃.
18 Yɑ mɑn sɛ̃ke bɑɑmɑ kɑ dɑm nɡe yɑberun wĩiru.
19 Wee Gusunɔ u mɑn kpɛ̃ɛ pɔtɔkɔ sɔɔ.
Torom kɑ tuɑ nɑ kɑ weenɛ.
20 Gusunɔ nɛn Yinni, nɑ nun somiru kɑnɑmɔ,
ɑdɑmɑ ɑ ǹ mɑn wisɑ.
Nɑ seewɑ nɑ yɔ̃rɑ wunɛn wuswɑɑɔ ɑdɑmɑ ɑ ǹ nɛn lɑɑkɑri kue.
21 A sɛ̃siɑwɑ,
mɑ ɑ mɑn sɛ̃re kɑ wunɛn dɑm bɑkɑm.
22 Wee ɑ derɑ woo ɡunɑ yɑ mɑn suɑ yɑ toorimɔ.
23 Domi nɑ yɛ̃ mɑ ɑ kɑ mɑn dɔɔwɑ ɡɔribun wɑ̃ɑ yerɔ
mi tɔmbu kpuro bɑ koo dɑ.
24 Adɑmɑ kɑ mɛ, bɑɑ tɔnu ù n ɡɔɔ dɔɔ,
u ǹ nɔmɑ suɑmɔ u fɑɑbɑ kɑnɑ?
Wi u wɑ̃ɑ wɑhɑlɑ sɔɔ u ǹ somiru kɑnɑmɔ?
25 Nɑ ǹ bu swĩiyɛ be wɑ̃ɑrɑ sɛ̃sie?
Nɑ ǹ nuki sɑnkire sɑ̃ɑrobun sɔ̃?
26 Wee nuku dobɑ nɑ rɑ n yĩiyɔ,
ɑdɑmɑ nɔni swɑ̃ɑrɑ nɑ wɑɑmɔ.
Yɑm bururɑmɑ nɑ rɑ n yĩiyɔ,
ɑdɑmɑ yɑm wɔ̃kurɑ nɑ wɑɑmɔ.
27 Nɛn bwɛ̃rɑ ku rɑ kpunɛ
yèn sɔ̃ nɑ kɑ wɑhɑlɑ ɡɑbirinɑmɔ.
28 Nɑ rɑ n sĩimɔwɑ nuku sɑnkirɑru sɔɔ.
N sɑ̃ɑre sɔ̃ɔ ku rɑ yɑri nɛn mi.
Bɑɑ nɑ̀ n wɑ̃ɑ tɔn wɔru sɔɔ,
nɑ rɑ n somiru kɑnɑmɔwɑ.
29 Nɛn ɡɔɔ wuri yin sɔ̃,
nɑ kuɑ nɡe ɡbeeku bɔ̃ɔ,
ǹ kun mɛ nɡe tɑɑtɑɑru.
30 Nɛn ɡɔnɑ tĩrɑ, nɛn wɑsi ɡberɑmɔ.
31 Tɛ̃ nɛn mɔrɔku ɡɑ wɑ̃ɑwɑ n kɑ ɡɔɔ wuri ko.
Kpɑ n nɛn ɡuuru so kɑ be bɑ ɡɔɔ wuri mɔ̀ sɑnnu.
Yoobu u tii tusiɑmɔ Gusunɔn wuswɑɑɔ kɑ toro sindu