32
1 Elifɑsi, kɑ Sofɑɑ, kɑ Bilidɑ bɑ ǹ mɑɑ Yoobu ɡɛɛ wisɑ yèn sɔ̃ u tii ɡɑrisi tɑɑrɛ sɑriruɡii.
2 Adɑmɑ durɔ ɡoo wɑ̃ɑ Rɑmun bweseru sɔɔ wi bɑ mɔ̀ Elihu. Win tundowɑ Bɑrɑkɛli, Busin yɛnuɡii. Wiyɑ u mɔru bɑrɑ yèn sɔ̃ Yoobu u tii ɡɑrisi tɑɑrɛ sɑriruɡii Gusunɔn wuswɑɑɔ.
3 U mɑɑ kɑ Yoobun bɔrɔbɑ itɑ be, mɔru kuɑ yèn sɔ̃ bɑ kpɑnɑ bu Yoobu wisi dee dee, mɑ bɑ sere nùn tɑɑrɛ wɛ̃ɛmɔ.
4 N deemɑ Yoobun bɔrɔ be, bɑ Elihu bukurɑru kere. Yen sɔ̃nɑ u ɡinɑ sɑkɑ u ǹ kɑ Yoobu ɡɑri kue sɑnɑm mɛ bɔrɔ be, bɑ kɑ nùn ɡɑri mɔ̀.
5 Adɑmɑ ye u deemɑ bɑ ǹ mɑɑ wɑ ye bɑ koo Yoobu wisi, yerɑ u mɔru kuɑ.
6 Mɑ u ɡɑri suɑ u nɛɛ,
nɛ bii ɑluwɑɑsiwɑ. Bɛɛ mɑɑ i sɑ̃ɑwɑ bukurobu.
Yen sɔ̃nɑ bɛrum mɑn mwɑ
n kɑ bɛɛ nɛn bwisikunu sɔ̃.
7 Mɑ nɑ tii sɔ̃ɔwɑ nɑ nɛɛ,
durɔ tɔkɔnɑ nu ko n ɡɑri ɡerubu yɛ̃.
Niyɑ n weenɛ nu tɔmbu bwisi kɛ̃.
8 Adɑmɑ kɑ ɡem, nɑ wɑ mɑ Gusunɔ Dɑm kpuroɡiin Hundewɑ u rɑ tɔnu bwisi wɛ̃.
9 N ǹ mɔ tɔnun wɔ̃ɔn kpɑ̃ɑrɑ tɑ rɑ nùn yɛ̃ru wɛ̃.
N ǹ mɑɑ tɔkɔru tɑ rɑ nùn bwisi kɛ̃ u kɑ siri dee dee.
10 Yen sɔ̃nɑ nɑ nɛɛ, i mɑn swɑɑ dɑkio i nɔ,
kpɑ n mɑɑ ɡere ye nɑ bwisikɑ.
11 Domi nɑ mɑɑri sere i kɑ bɛɛn ɡɑri kuɑ i kpɑ.
Nɑ mɑɑ yi swɑɑ dɑki mɑm mɑm,
nɑ nuɑ kpuro bwisi yi i kɑ Yoobu siri.
12 Nɑ bɛɛ swɑɑ dɑki kɑ lɑɑkɑri,
ɑdɑmɑ nɑ wɑ bɛɛn ɡoon ɡɑri kun Yoobu kɑmiɛ.
Goo kun mɑɑ kpĩɑ u nùn wisɑ dee dee.
13 Yen sɔ̃, i ku ɡere i nɛɛ,
i win ɡɑrin wɛ̃ɛ nɔɔ wɑ.
Gusunɔ turowɑ koo kpĩ u nùn siri, n ǹ mɔ tɔnu.
14 N ǹ nɛ Yoobu u kɑ ɡɑri kuɑ.
Ǹ n dɑɑ nɛn nɑ, ye kon nùn wisi nɛnɛmɑ.
15 Yoobu, wee bɑ nɔɔ mɑri tɛ̃,
bɑ biɑ ye bɑ koo wisi mɑ bɑ wɑ̃ɑ sekuru sɔɔ.
16 Nɑ sɑkɑ sere bɑ kɑ ɡɑri yi kuɑ bɑ kpɑ,
mɑ bɑ mɑri, bɑ ǹ wɑ ye bɑ koo wisi.
17 Tɛ̃, kon ɡɑri suɑ,
kpɑ n ɡere ye nɛ nɑ mɑɑ bwisikɑ.
18 Domi ɡɑri wɑ̃ɑ nɛn ɡɔ̃ruɔ yi kpɑ̃,
nɑ mɑɑ sɛnde n kɑ yi ɡere.
19 Wee yi ɡbisimɔ nɛn nukurɔ nɡe tɑm mɛ bɑ doke ɡɔnɑn bɔɔ kpɑɑru sɔɔ
mɑ tɑ kĩ tu kurɑ.
20 Tɛ̃, i de n mɑɑ ɡɑri ɡere kpɑ nɛn bwɛ̃rɑ yu kpunɑ.
Kon nɔɔ wukiɑ, kpɑ n bɑɑwure wisi.
21 Nɑ ǹ ɡoon biru yɔ̃rɑmɔ.
Nɑ ǹ mɑɑ ɡoo fufu mɔ̀.
22 Domi nɑ ǹ yenibɑn dɔɔnɛ mɔ.
Nɑ̀ n dɑɑ yen dɔɔnɛ mɔn nɑ,
nɛn tɑkɑ kowo u n mɑn kpeerɑsie n tɛ.
Gusunɔ u rɑ kɑ ɡɑsɔ tɔnu ɡɑri kowɑ wɑhɑlɑ sɔɔn di