37
1 Nɑ̀ n yenibɑ kpuro wɑ, nɛn tororɑ rɑ kɑrewɑ
kpɑ nɑ n diirimɔ.
2 I swɑɑ dɑkio i Gusunɔn nɔɔ nɔ ɡe ɡɑ kukirimɔ nɡe ɡurɑ.
3 Gɑ nɔɔrɑ bɑɑmɑ wɔllɔ.
Mɑ ɡuru mɑɑkinu nu bɑllimɔ hɑnduniɑn ɡoonu nnɛ sɔɔ.
4 Guru mɑɑki nin biru, Gusunɔn nɔɔ ɡɑ rɑ nɔɔre kɑ dɑm
kpɑ yɑnde ɡuru mɑɑki kpɑɑnu nu sɔ̃ɔsirɑ.
5 Ù n ɡbɑ̃rɑ, tɔmbu bɑ rɑ biti soorewɑ.
Gɑ̃ɑ bɑkɑnɑ u kuɑ mi, ni tɔnu kun kpɛ̃ u tubu.
6 U rɑ ɡuru kpenu sɔ̃ u nɛɛ, nu nɛɛyɔ.
U rɑ mɑɑ ɡurɑn tii sɔ̃ u nɛɛ, yu nɛɛyɔ kɑ dɑm.
7 U rɑ de tɔmbu kpuro bu ben sɔmburu yɔ̃rɑsiɑ ɡurɑ yen sɔ̃,
kpɑ bu ɡiɑ mɑ wiyɑ u ye kpuro mɔ̀.
8 Bɑɑ kɑ ɡbeeku yɛɛyɔ u rɑ dewɑ yi dɑ yi kpunɑ yin wɑ̃ɑ yerɔ.
9 Guru woo bɔkɔ ɡɑ rɑ nɛwɑ sɑɑ sɔ̃ɔ yɛ̃sɑn nɔm dwɑru ɡiɑn di,
kpɑ purɑ yu nɑ sɔ̃ɔ yɛ̃sɑn nɔm ɡeu ɡiɑn di.
10 Yinni Gusunɔwɑ u rɑ nim wom wure,
kpɑ mu bɔbiɑ nɡe ɡuru kperu.
11 Wiyɑ u rɑ de kɑkoru tɑ n wɑ̃ɑ ɡuru wiru sɔɔ,
kpɑ u tu yɑrinɑsiɑ kɑ ɡuru mɑɑkinu sɑnnu.
12 U rɑ tu ɡɔsiewɑ nɡe mɛ u kĩ.
Kpɑ tu ko nɡe mɛ u ɡeruɑ hɑnduniɑ sɔɔ.
13 Tɑ sɑ̃ɑwɑ nɡe bokuru te u rɑ kɑ tɔmbu sɛɛyɑsie
ǹ kun mɛ u kɑ bu win kĩru sɔ̃ɔsi.
14 Yoobu, ɑ yenibɑ kpuro lɑɑkɑri koowo.
A Yinni Gusunɔn sɔm mɑɑmɑɑkiɡinu mɛɛrio ɑ wɑ.
15 A yɛ̃ nɡe mɛ Gusunɔ u rɑ nu dendisinɛ,
kpɑ u de ɡuru mɑɑkinu nu bɑlli ɡuru winu sɔɔ?
16 A yɛ̃ nɡe mɛ ɡuru winu nu kɑ bwɛ̃ɛ wɔllɔ?
Wi u yenin bweseru kuɑ, win yɛ̃ru tɑ yibɑ mɑm mɑm.
17 Woo ɡɑ̀ n sweemɑ sɔ̃ɔ yɛ̃sɑn nɔm dwɑru ɡiɑn di,
yɑm susurɑ rɑ nun ko, ɑ̀ n wunɛn yɑ̃nu doke.
18 Kɑɑ kpĩ ɑ wɔllu tɛriɑ nɡe wi,
kpɑ tɑ n dɑm mɔ nɡe diɡi ye bɑ kuɑ kɑ sisu?
19 A sun sɔ̃ɔsio ye n weenɛ su Gusunɔ sɔ̃.
Domi sɑ ǹ wɑ ye sɑ ko nùn wisi bɛsɛn yɛ̃ru sɑrirun sɔ̃.
20 Tilɑsiwɑ bu kɑ nùn sɔ̃ nɑ̀ n ɡɑri ɡeruɑ?
Tilɑsiwɑ bu kɑ nùn nɔɔsiɑ ye nɑ ɡeruɑ?
21 Wee u rɑ de yɑm mu tĩrɑ subɑru sɔɔ,
kpɑ ɡuru winu nu n sɔ̃ɔ beruɑ.
Adɑmɑ u rɑ de woo ɡu se ɡu wɔllu dɛɛrɑsiɑ.
22 Sɑɑ ye sɔɔrɑ yɑm bururɑm mu koo nɑ sɑɑ sɔ̃ɔ yɛ̃sɑn nɔm ɡeu ɡiɑn di,
kpɑ mu n nùn sikerenɛ kɑ nɑnum bɑkɑm.
23 Sɑ ǹ kpɛ̃ su Dɑm kpuroɡii tubu.
Domi win dɑm mu kpɑ̃.
U rɑ mɑɑ kpuro ko dee dee.
U ku rɑ wi u ɡem mɔ dɑm dɔre.
24 Mɛyɑ u ku rɑ mɑɑ be bɑ tii mɛɛrɑ bwisiɡibu ɡɑrisi ɡɑ̃ɑnu.
Yen sɔ̃nɑ n weenɛ tɔmbu bu nùn nɑsiɑ.