41
1 À n ɡu mɑrɑ, ɑ rɑ nuki sɑnkirewɑ.
Gɑ̀ n mɑɑ yɑrimɑ, ɑ rɑ bɛrum soorewɑ,
kpɑ ɑ wɔrumɑ ɑ̀ n ɡu wɑ.
2 Goo sɑri wi u koo ɡɑri bɑkɑru ko u ɡen mɔru seeyɑ.
Ǹ n mɛn nɑ, wɑrɑ u koo yɔ̃rɑ u nɛ, Yinni Gusunɔ mɑ.
3 Wɑrɑn dibɑ nɑ nɛni, kon bu kɔsiɑ.
Domi ye yɑ wɑ̃ɑ hɑnduniɑ kpuro sɔɔ yɑ sɑ̃ɑwɑ nɛɡiɑ.
4 Wee nɑ mɑɑ kĩ n wure n kɑrɑku ɡen wɑsin kɑ̃ɑsi,
kɑ ɡen dɑm ɡɑri ko,
kɑ sere mɑɑ ɡen wɑsin burɑm.
5 Wɑrɑ u koo kpĩ u ɡen ɡɔnɑ potɑ.
Wɑrɑ u koo kpĩ u du ɡen bɑɑ sɑburosun bɑɑ sɔɔ.
6 Wɑrɑ u koo kpĩ u ɡen nɔɔ bɑɑyɑ.
Domi ɡen donnu nu bɛrum mɔ.
7 Gen birun koko wɔrukisu su sɑ̃ɑwɑ nɡe tɛrɛnu.
Mɑ su swɛɛnɛ mɑm mɑm.
8 Su mɑninɛ, bɑɑ woo ɡɑ ku rɑ kpĩ ɡu mɑm kurɑ min di.
9 Su sɑ̃ɑwɑ nɡe mɑɑbu kɑ wɔnɔ be bɑ wɑ̃ɑ bɑ bɔkɑsinɛ bɑɑtum.
Gɑ̃ɑnu sɑri ni nu koo su kɑrɑnɑ.
10 Gɑ̀ n sũɑ n dɑ n sɑ̃ɑwɑ nɡe dɔ̃ɔ buriyɑ yi yɑrimɔ,
kpɑ ɡen nɔni yi n sɑ̃ɑ nɡe buruku sɔ̃ɔ yɑnɑ.
11 N dɑ n sɑ̃ɑwɑ nɡe dɔ̃ɔ yɑri kɑ dɔ̃ɔ buriyɑ yi yɑrimɔ ɡen nɔɔn di.
12 Kpɑ n sɑ̃ɑre wiisu yɑrimɔ ɡen wɛ̃run di
nɡe weke te tɑ ɡbisimɔ dɔ̃ɔ boko sɔɔ.
13 Gen wɛ̃siɑru tɑ rɑ n sɑ̃ɑwɑ nɡe bɑ dɔ̃ɔ yɑbiɑmɔ,
kpɑ dɔ̃ɔ yɑrɑ yɑ n yɑrimɔ sɑɑ ɡen nɔɔn di.
14 Gen dɑm wɑ̃ɑwɑ ɡen wĩirɔ.
Be bɑ kɑ ɡu yinnɑ kpuro bɑ rɑ n bɛrum soore.
15 Gen ɡɔnɑ yɑ tɑu.
Gen wɑsin yɑɑ bɑɑsi yɑ mɑɑ sɛ̃kenɛwɑ sim sim.
Yɑ ǹ kɑrɑnɑmɔ.
16 Gen woo sɔndu tɑ bɔɔbuwɑ nɡe nɛɛ mɛro.
17 Gɑ̀ n seewɑ be bɑ dɑm bo, bɑ rɑ nɑndewɑ,
kpɑ bu yɑrinɑ.
18 Bɑ̀ n mɑɑ ɡu wɔri kɑ tɑkobi,
ǹ kun mɛ kɑ yɑɑsi kɑ sɛ̃ɛnu,
ye kpuro yɑ rɑ kowɑ kɑm.
19 Gɑ rɑ sisu ɡɑrisiwɑ nɡe yɑkɑsu.
Sii ɡɑndu mɑɑ nɡe dɑ̃ɑ te tɑ kɔ̃sɑ.
20 Bɑ̀ n ɡe tobɑ, ɡɑ ku rɑ dukɑ yɑkure.
Kpurɑntɛɛrun kperɑ rɑ n sɑ̃ɑwɑ nɡe yɑkɑsu ɡen mi.
21 Gɑ rɑ mɑɑ bokuru ɡɑrisiwɑ nɡe kɑbɑru.
Bɑ̀ n ɡu yɑɑsɑ kɔ̃ɔwɑ ɡɑ rɑ n ye yɛ̃ɛmɔwɑ.
22 Gen nukurun temɔ,
ɡen ɡɔnɑn kokosu sɑ̃ɑwɑ nɡe sɛ̃ɛnu.
Su sɑ̃ɑwɑ nɡe nɑɑ tebo ɡe bɑ rɑ kɑ tem kusɑnu kɔsuku.
23 Gɑ rɑ de nim wɔ̃kun nim mu n bweebweenu mɔ̀
nɡe weke tèn nim bɑ swɛ̃,
kpɑ mu n yɑkenu mɔ̀ nɡe turɑre ye bɑ yɔwɑ.
24 Mi ɡɑ sɑrɑ kpuro ɡen yirɑ yɑ rɑ sɔ̃ɔsirewɑ.
Domi nim mu rɑ burisinɛwɑ mu ɡɔsiɑ nɡe seri kpiki.
25 Hɑnduniɑ yeni sɔɔ, ɡɑ̃ɑnu sɑri ni nu sɑ̃ɑ ɡen yinni.
Gɑ ku rɑ n ɡɑ̃ɑnun bɛrum mɔ.
26 Gɑ rɑ yɛɛ kpuro tɑɑrewɑ bɑɑ yì n kpɑ̃.
Gɑ sɑ̃ɑwɑ yɛɛ ɡɔbi kpuron sunɔ.
Yoobu win kɔmiɑru wurɑ