5
1 Yoobu, ɑ kuuki koowo, ɡoo ù n koo re nun wisi.
Nɡe Gusunɔn ɡɔrɑdo wɑrɑ kɑɑ soku kpɑ u nɑ u nun wurɑri.
2 Gɑri bɔkɔ u rɑ ɡbiwɑ win mɔrun sɔ̃.
Bwisi sɑriruɡii u rɑ ɡbiwɑ win nisinun sɔ̃.
3 Nɑ ɡɑri bɔkɔ wɑ u kuurɑ.
Mɑ nɑ wɑ win wɑ̃ɑ yerɑ wɔriki.
4 Mɑ win bibɑ fɑɑbɑn swɑɑ deri.
Goo sɑri wi u koo bu wɔrɑ siri yerɔ.
5 Tɔn tukobɑ koo win dĩɑ ni u ɡɑ̃ kɑtɑ ko bu ɡurɑ,
bɑɑ kɑ ni u kɑrɑ koosi kɑ sɑ̃ki.
Kpɑ be bɑ win dukiɑn binɛ mɔ bu ye suɑ bu kɑ doonɑ.
6 Wɑhɑlɑ ku rɑ yɑri sɑɑ tuɑn di.
Mɛyɑ nɔni swɑ̃ɑrɑ ku rɑ mɑɑ kpi sɑɑ tem di.
7 Adɑmɑ wi bɑ mɑrɑ kpuro u koo wɑhɑlɑ kowɑ,
nɡe mɛ bɑ̀ n dɔ̃ɔ wure, dɔ̃ɔ buri yi rɑ yɔ̃.
8 Adɑmɑ nɛ Elifɑsi, ǹ n nɛn sɔ̃n nɑ, Gusunɔwɑ kon somiru kɑnɑ.
Kpɑ n nùn nɛn wɑhɑlɑ kpuro sɔ̃.
9 U rɑ ɡɑ̃ɑ bɑkɑnu kowɑ ni tɔnu kun kpɛ̃ u ɡiɑ.
U rɑ mɑɑmɑɑki dɑbinu ko.
10 U rɑ de ɡurɑ yu nɛ tem sɔɔ,
kpɑ ɡbeɑ yu nim wɑ.
11 U rɑ be bɑ tii kɑwe wɔlle sue,
kpɑ u be bɑ nuki sɑnkire yɑrɑ ben nuku sɑnkirɑrun di.
12 U rɑ be bɑ bwisi kɔ̃si mɔn himbɑ kɑm koosie,
kpɑ bu ku mɑɑ kpĩ bu ye yibiɑ.
13 U rɑ dewɑ bwisiɡibun tiin bwisi yi bu yinɑ mwɑ,
kpɑ ben wesiɑnɔ ɡu ko kɑm.
14 Ben mi, sɔ̃ɔ sɔɔ ɡbɑ̃ɑrɑ yɑ rɑ n bu sɑ̃ɑwɛwɑ yɑm wɔ̃kuru,
kpɑ bɑ n bɑbi.
15 Adɑmɑ Gusunɔ u rɑ dɑm sɑriruɡii ɡɑnɛ ben tɑbu yɑ̃nun di,
kpɑ u nùn wɔrɑ ben nɔmɑn di.
16 Nɡe mɛyɑ u rɑ dɑm sɑriruɡii wi yĩiyɔbu wɛ̃,
kpɑ u durumɡiin nɔɔ kɔre.
17 Domɑruɡiiwɑ wi Gusunɔ Dɑm kpuroɡii u sɛɛyɑsiɑmɔ.
Yen sɔ̃, Yoobu, ɑ ku yinɑ ù n nun sɛɛyɑsiɑmɔ.
18 Domi wiyɑ u rɑ tɔnu mɛɛrɑ ko, kpɑ u yɛ̃ron bosu nɔɔri.
Wiyɑ u rɑ tɔnu kɔsuku, kpɑ u nùn bɛkiɑ.
19 Nɔn dɑbinu u koo nun yɑrɑ nuku sɑnkirɑrun di,
kpɑ kɔ̃sɑ ɡɑɑ yu ku mɑɑ nun deemɑ.
20 Gɔ̃ɔru tɑ̀ n duɑ tem sɔɔ, u koo nun ɡɔɔ ɡbɑrɑri,
kpɑ u nun fɑɑbɑ ko tɑbu sɔɔ.
21 U koo nun bɔ̃ri ɡbɑrɑ.
Sɑnɑm mɛ yibɛrɛbɑ bɑ koo tem kɑm koosiɑ, u koo nun wɔrɑ.
22 Kpɑ ɑ n yɛ̃ɛmɔ ɡɔ̃ɔrun sɑɑ sɔɔ, kɑ sɑnɑm mɛ bɑ tem kɑm koosiɑmɔ.
A ǹ kɑɑ n mɑɑ yɑɑ ɡɔbɑ ɡɑɑn bɛrum mɔ.
23 A ǹ mɑɑ ɑsɔrɔ wɑsi wunɛn ɡberɔ.
Domi bɑ ǹ tu kpenu suremɔ.
Yɛɛ ɡɔbi kun mɑɑ duɔ mi.
24 Kɑɑ n bɔri yɛndu mɔwɑ wunɛn yɛnuɔ.
Kpɑ wunɛn sɑbenun ɡɔ̃ɔ ɡɑ n yibɑ bɑɑdommɑ.
25 Mɛyɑ mɑɑ wunɛn bibun bweseru tɑ koo kpɛ̃ɑ
kpɑ tu kɔwɑrɑ nɡe yɑkɑ bii.
26 Tɔkɔru sɔɔrɑ kɑɑ ɡbi
nɡe mɛ bɑ rɑ dobi ɡɛ̃ yen sɑɑ yɑ̀ n turɑ.
27 Gɑ̃ɑ niniwɑ sɑ ɡiɑ bɛsɛn wɑ̃ɑru sɔɔ.
Nu mɑɑ sɑ̃ɑwɑ ɡem.
Yen sɔ̃, ɑ nu bwisikuo, kpɑ ɑ nu mwɑ wunɛn tiin sɔ̃.
Yoobu u Elifɑsi wisɑ