YOƐLI
Gusunɔn sɔmɔ Yoɛlin wɑɑsu yɑ sɑ̃ɑ kirɔ ye u win tɔmbu kuɑ. U nɛɛ, Yinni Gusunɔn siribu bu koo nɑ bin sɑɑ sɔɔ. Siri bin sɑɑwɑ u sokumɔ Yinni Gusunɔn tɔ̃ru. Sɑɑ ye sɔɔ, twee yi koo nɑ yi tem wukiri yi ɑrumɑnibɑ kɑm koosiɑ. Nɡe mɛ twee yi, yi koo tem kɑm koosiɑ, nɡe mɛyɑ Gusunɔ u koo mɑɑ tɔn be bɑ ǹ nùn nɑɑnɛ doke kɑm koosiɑ.
Yoɛli u mɑɑ nɛɛ, sɑnɑm dɑ̃ɑkim sɔɔ, Yinni Gusunɔ u koo de win Hunde u nɑ win tɔmbu sɔɔ. Yɑ mɑɑ koorɑ nɡe mɛ sɑ ɡɑrimɔ GK 2:16-21 sɔɔ.
Yoɛli, yĩsi ten tubusiɑnɑ Gusunɔ u sɑ̃ɑwɑ Yinni.
Tire ten kpunɑɑ
1. Twee yi koo tem wukiri, wiru 1.
2. Yinni Gusunɔn tɔ̃ru, wiru 2:1-17.
3. Ye yɑ koo Yinni Gusunɔn tɔmbu deemɑ, wiru 2:18n di sere wiru 4:21.
1
1 Gɑri wee yi Yinni Gusunɔ u Yoɛli, Pɛtuɛlin bii sɔ̃ɔwɑ u Yudɑbɑ sɔ̃.
Twee wuuru kɑ ɡbeburu
2 U nɛɛ, bɛɛ Yudɑbɑn ɡuro ɡurobu,
i swɑɑ dɑkio i nɔ.
Bɛɛ Yudɑbɑ kpuro kpuro
i swɑɑ tem kpĩiyɔ i ɡɑri yi nɔ.
Gɑ̃ɑ ninin bweseru nu koore bɛɛn wɑɑti sɔɔ,
ǹ kun mɛ bɛɛn sikɑdobɑn wɑɑti sɔɔ?
3 I bɛɛn bibu yen ɡɑri sɔ̃ɔwɔ.
Kpɑ bii be, bu mɑɑ ben bibu sɔ̃,
kpɑ be, bɑ̀ n seewɑ bu mɑɑ beɡibu sɔ̃.
4 Wee dĩɑ ni kɔkɔnu nu di n tiɑrɑ,
twee yi nɑ yi di.
Ye twee yi nɑ yi di n tiɑrɑ
mɑ swĩini yi nɑ yi di.
Ye swĩini yi di n tiɑrɑ,
mɑ ɡbɑɑnu nɑ nu ye di.
5 Bɛɛ be tɑm mu ɡoomɔ, i dom yɑndo kpɑ i swĩ.
Bɛɛ tɑm nɔrobu, i weeweenu koowo.
Domi tɑm mu koo kpe resɛm biɑrun sɔ̃.
6 Domi twee wuurɑ nɑ nɡe tɑbu kowobu
tɑ bɛsɛn tem wukiri.
Yi dɑbi, yi mɑɑ dɑm mɔ.
Yin donnu dɑm mɔwɑ nɡe ɡbee sinɑnsuɡinu.
7 Yi bɛsɛn resɛm ɡbɑɑnu kɑm koosiɑmɔ.
Yi bɛsɛn fiɡie dɑ̃nu dimɔ.
Yi yen kokosu wĩɑmɔ.
Mɑ yi yen kɑ̃ɑsi derimɔ kokosu sɑri.
8 I wuri koowo nɡe kurɔ kpɑo wi ɡɔminirɑ deemɑ.
9 Bɑ ku rɑ mɑɑ kɑ kɛ̃nu de Yinni Gusunɔn sɑ̃ɑ yerɔ
ni nu sɑ̃ɑ ɑlikɑmɑ kɑ tɑm.
Yen sɔ̃nɑ Yinni Gusunɔn sɔm kowo be bɑ sɑ̃ɑ yɑ̃ku kowobu bɑ sɑ̃ɑre bɑ ɡɔɔ sɔ̃.
10 Gbeɑ kpuro yɑ kɑm kuɑ.
Mɑ yen tem mu sɑɑrɑ.
Alikɑmɑ sɑri, resɛm kɑ ɡum mɑɑ sɑri.
11 Gbee wukobu bɑ sɔ̃ biti sɔɔ.
Be bɑ rɑ resɛm yewe, weeweenɑ bɑ mɔ̀.
Domi dĩɑ bimi sɑri.
Dĩɑnu kpuro nu kɑm kuɑ.
12 Resɛm ɡbɑɑnu nu ɡberɑ.
Fiɡie yɑ dɛllɑ.
Dɑ̃ɑ ɡbɑɑnu kpuro nu ɡeɑ yinɑ.
Yɑ derɑ tɔmbu bɑ ǹ mɑɑ nuku dobu mɔ.
Yoɛli u tɔmbu kɑnɑmɔ
bu Yinni Gusunɔ suuru kɑnɑ
13 Bɛɛ Yinni Gusunɔn sɔm kowobu, yɑ̃ku kowobu,
i sɑɑki sebuo
i kɑ kpunɑ wɔ̃ku ɡiriru nuku sɑnkirɑnun sɔ̃.
Domi wee bɑ ku rɑ mɑɑ kɑ ɑlikɑmɑ kɑ tɑm kɛ̃nu nɛ
Gusunɔ bɛsɛn Yinnin sɑ̃ɑ yerɔ.
14 I tɔ̃ru ɡɑru wunɔ
tè sɔɔ i ko i nɔɔ bɔke.
I tɔmbu kpuro mɛnnɔ sere kɑ durɔ tɔkɔnɔ
Gusunɔ bɛsɛn Yinnin sɑ̃ɑ yerɔ,
kpɑ i nùn kɑnɑ.
Yinni Gusunɔn mɔrun tɔ̃ru
15 Yinni Gusunɔn tɔ̃ru tɑ turuku kuɑ.
Tɔ̃ɔ te, tɑ sɑ̃ɑwɑ win tɔ̃ru.
Te sɔɔrɑ wi, Dɑm kpuroɡii u koo kpuro kɑm koosiɑ.
Annɑ ɑ tɔ̃ɔ kɔ̃suru wɑ te tɑ sisi mi.
16 Wee sɑ mɛɛrɑ bɑ kɑ bɛsɛn dĩɑnu doonɔ.
Mɑ nuku dobu kpɑ Gusunɔ bɛsɛn Yinnin sɑ̃ɑ yerɔ.
17 Ye bɑ duurɑ, yɑ ɡberɑ tem kusɑnu sɔɔ.
Dĩɑnu kpɑ birɑnu sɔɔ.
Mɑ birɑ ni, nu wɔrukumɔ.
Domi nu ǹ mɑɑ dĩɑnu mɔ.
18 I swɑɑ dɑkio i nɔ nɡe mɛ yɛɛ yi wuri mɔ̀,
mɑ yi bɔsu bɑɑmɑ.
Domi yi ǹ yɑkɑsu wɑ kpɑrɑ yerɔ.
Bɑɑ kɑ yɑ̃ɑnɔ nu nɔni sɔ̃ɔre.
Yoɛli u kɑnɑru mɔ̀
19 Yinni Gusunɔ, wunɑ nɑ nɔɔɡiru suemɔ.
Domi wee, yɑkɑsu kɑ dɑ̃ɑ dɔ̃ɔ mwɑɑrɑ ɡberɔ.
20 Mɑ yɛɛ yi nɔɔɡiru sue yi nun kɑnɑmɔ.
Domi dɑɑnu ɡberɑ, yɑkɑsu mɑɑ dɔ̃ɔ mwɑɑkirɑ ɡbɑburɔ.
Yinni Gusunɔn tɔ̃ru
tɑ turuku kuɑ