4
1 Yinni Gusunɔ u nɛɛ, yen tɔ̃ɔ te,
kon Yudɑbɑ kɑ ben wuu Yerusɑlɛmu wesiɑ nɡe yellu.
2 Kpɑ n bwese tukunu kpuro mɛnnɑ
n nu sure Yosɑfɑtin wɔwɑ sɔɔ.
Miyɑ kon nu siri
kɔ̃sɑ ye nu nɛn tɔmbu Isirelibɑ kuɑn sɔ̃.
Domi nu bu yɑrinɑsiɑ tem kpuro sɔɔ.
Mɑ nu ben tem bɔnu kuɑ.
3 Nu nɛn tɔmbu bɔnu kuɑ kɑ tɛtɛ.
Nu ben ɑluwɑɑsibɑ mwɛɛrɑ nu dɔrɑ
nu kɑ wɑ nu kurɔ tɑnɔbu dwe.
Mɑ nu wɔndiɑbɑ mwɛɛrɑ nu dɔrɑ nu kɑ tɑm nɔ.
4 Bɛɛ Tiriɡibu kɑ Sidoniɡibu kɑ sere be bɑ wɑ̃ɑ Filisitibɑn temɔ,
mbɑ i kĩ nɛn mi.
I kĩ i mɑn mɔru kɔsiɑwɑ?
Ǹ n mɛn nɑ, nɑ ǹ tɛɛmɔ n kɑ mɑɑ bɛɛ mɔru kɔsie.
5 Wee i nɛn sii ɡeesu kɑ nɛn wurɑ
kɑ nɛn ɑrumɑni ɡurɑ.
Mɑ i dɑ i ye kpuro yi bɛɛn bũu sɑ̃ɑ yerɔ.
6 Mɑ i Yudɑbɑ kɑ Yerusɑlɛmuɡibu mwɛɛrɑ i Gɛrɛkibɑ dɔre.
Nɡe mɛyɑ i kɑ bu tondɑsiɑ ben tem di.
7 Adɑmɑ nɛ, kon kɑ bu wurɑmɑ mi bɑ rɑɑ wɑ̃ɑ.
Kon de kɔ̃sɑ ye i bu kuɑ mi,
yu wɔri bɛɛn wiru wɔllɔ.
8 Kon bɛɛn bibu Yudɑbɑ dɔre.
Kpɑ be mɑɑ, bu be Sɑbeɡibu dɔre,
be bɑ wɑ̃ɑ n tomɑ.
Yeniwɑ nɛ, Yinni Gusunɔ nɑ ɡeruɑ.
Tɑɑ dɑ̃ɑkibu kɑ siribu
9 Yoɛli u nɛɛ,
i bwese tukunu nɔɔsio bu tɑbun sɔɔru ko.
Nu tɑbu durɔ dɑmɡibu seesio, kpɑ bu swɑɑ wɔri,
tɑbu kowobu kpuro ɡesi.
10 Nu nin nɑɑ tebonu ɡɔsio tɑkobibɑ,
kpɑ nu nin kɔmbɔnu ɡɔsiɑ yɑɑsi.
Be bɑ rɑɑ sɑ̃ɑ bɛrurobu, bu tii koowo tɑbu durɔbu.
11 I seewo fuuku i nɑ.
Bɛɛ bwese ni i wɑ̃ɑ turuku, i mɛnnɑmɑ.
Yinni Gusunɔ, ɑ de wunɛn tɑbu kowobu bu nɑ.
12 Mɑ Yinni Gusunɔ u nɛɛ, bɛɛ bwesenu kpuro,
i seewo i nɑ Yosɑfɑtin wɔwɑ yen mi.
Domi miyɑ kon sinɑ
n bwese ni nu wɑ̃ɑ mi kpuro siri.
13 Domi ben nuku kɔ̃surɑ bɑndɑ.
I kɔmbɔnu suo i tɔn be ɡɛ̃ nɡe dĩɑ ni nu ye.
I nɑ i bu munku nɡe resɛm ye bɑ doke ɡɑmɑ yerɔ,
mɑ yen nim mu kotosu yibɑ.
14 Wee tɔn wɔru ɡɑ wee wɔwɑ yèn mi bɑ koo tɔmbu siri.
Domi nɛ, Yinni Gusunɔn tɔ̃ɔ te, tɑ turɑ
tè sɔɔ kon nɛn mɔru sɔ̃ɔsi.
15 Sɔ̃ɔ kɑ suru kun mɑɑ bɑllimɔ.
Mɑ kperi yi yɑm tĩrɑ.
16 Nɛ, Yinni Gusunɔ nɑ kukirimɔ Siɔnin ɡuurun di.
Nɛn nɔɔ ɡɑ nɔɔrɑmɔ Yerusɑlɛmun di.
Wɔllu kɑ tem mu yĩirimɔ.
Adɑmɑ nɑ nɛn tɔmbu Isirelibɑ kɔ̃su.
Nɛnɑ nɑ sɑ̃ɑ ben kuku yeru.
17 Bɛɛ Isirelibɑ, i ko i ɡiɑ
mɑ nɛ Gusunɔ nɑ sɑ̃ɑwɑ bɛɛn Yinni,
nɛ wi nɑ wɑ̃ɑ Siɔniɔ nɛn ɡuu dɛɛrɑru mi.
Yerusɑlɛmu kpuro yɑ koo kpɑm ko nɛɡiɑ.
Tɔn tukobu bɑ ǹ mɑɑ ye wɔrimɔ.
Yinni Gusunɔ
u koo win tɔmbu domɑru kuɑ
18 Sɑɑ ɡɑɑ wee yè sɔɔ resɛm yɑ koo ɡeɑ ko
sere kɑ ɡunɡunu wɔllɔ.
Kpɑ sɑbenu nu di mi.
Kpɑ nu bom ko mu n kpɑ̃.
Yudɑn tem dɑɑnu kpuro nu koo nim koku.
Dɑru kokɑ ɡɑɑ koo yɑri
Yinni Gusunɔn sɑ̃ɑ yerun di,
kpɑ yen nim mu dɑ
sere Sitimun wɔwɑɔ.
19 Eɡibiti yɑ koo kɑm ko,
kpɑ Edɔmun tem mu ko bɑnsu.
Domi bɑ Yudɑbɑ dɑm dɔre,
mɑ bɑ tɑɑrɛ sɑriruɡibu ɡo.
20-21 Adɑmɑ kon be bɑ tɔmbun yɛm yɑri mi mɔru kɔsiɑ.
Kpɑ Yudɑbɑ kɑ Yerusɑlɛmuɡibu bɑ n wɑ̃ɑ ben temɔ
sere kɑ bɑɑdommɑɔ.
Kpɑ nɛ, Yinni Gusunɔ nɑ n wɑ̃ɑ Siɔniɔ.