22
Godi fu e Eburame izege fu irinamo ije biesirigaema ijene
1 Areme rade maza be Godi fu Eburame izege fu irinamo ijene biesiri gakiro vierafei. Ijadufuo Godi fu urina kume, Eburameno kumenoga fu una gue onukuana kumei, Na igifurekino kumei.
2 Areme Godi fu kume, Urina Aeseki fari one ka besu a ma ireobo oetuamo ijene mesirina uri are Moraea ijia vane. A ijia vaga na uruo be nijasaga a ijia fari one ije abe kanana na zinone ifaejieno kumei.
3 Ijadufuo nituame suoke mugamia Eburame fune urina sinuome fuone ro miane fu zinone ifaejedufuo ije bino atama areme karina fanuve doniki ado ijia nana ivia kiriae. Areme fune uri e fuone imejo inokiro ro mave doniki ro fari fuone Aeseki ije kaenamiana bune are ije Godi fu kuaema ijia vae.
4 Bune vakuma mu inokubeke furikoga fu ijia uruo ije Godi fu kuaema ijene gae.
5 Areme fune una e fuone imejo inokiro ije kiae, Jani fanu doniki ijena igia karike na ame igiaki no va gafia Godi aroena baname isoe areme una rono kiae.
6-7 Areme Eburame fune miane fu zinone ifaejedufuo ije karina Aeseki vajamo fu karikoga fuje fu miane ijiakiro sime iseke ije kena bune vae. Bune buosiki uruo ijia ajia vako ijia Aeseki fu uri Eburame kuae, Ate, miane no zinone ifaejedufuo ije none igi karina ruove. Rove mave-ame ije no zinone ifaejedufuo ije izieburekino kuae?
8-9 Fu ijiege kuaramoga Eburame fu kuae, Farino, mave-ame ije no zinone ifaejedufuo ije fu Godire korufuo muokono kuae. Areme bune vakuma are ije Godi fu kuaema ijia usiae. Bu va ijia usiae areme Eburame fune uri fata zinone ifaejedufuo ije mune ijia kari nana amaerima areme uri miane ije karina fata ado ijia nae. Fune ijiege re areme fune uri fari fuone Aeseki farena toma areme dabena miane ado ijia nijae.
10-12 Areme fune uri sime abena Aeseki bijakuvenoga Godido anera ije fu saroruba saove ijia kumei, Eburame, Eburame, arene! A fari one ije ade kana ro ire be fuone remo. Ijadufuo maeje iviama na gaga aka Godi mukoreigia aguaekinu irinamo ijadufuo a fari one besu a ireobo oetuamo ije aka uria oemarekinu abe na miekiro vierafemano kumei.
13 Areme Eburame fu dakude gake mave-kumate ijadufuo nigofo muane ijare kaesa tarare ijia kena saguma manino fu gae. Ijadufuo fune va mave-ije farena dabe una ro kekena ijare abena Godi zinone ifaejegaro fari fuone fu ijare arei.
14 Ijadufuo Eburame fu are ije ive ina kuae, E Ireobo Korufuo Vajuokono kuae. Ijadufuo iviama are ije bu kua, E Ireobo ijadufuo uruo ijia fu vajuokono kuavo.
15-17 Areme E Ireobo ijadufuo anera ije fu saove ijia una kuke Eburame kumei, E Ireobo fu kuae, Aka na iriniema ijadufuo a fari one a ma ireobo oetuamo ije abe kanana na zinone ifaejiekiro naebe abe rui. Ijadufuo na ive none ijia kuranamina kuaedo nare daro ka ireobo maga uifari one buka ire zuvi saove gufia ireva ro kuke davare ajare game fu zaraema ijiege buka e uruvana reke. Ro kuke bure e ani buone ije iraraena kaniana aesakae ro sidove buone ije keke.
18 Ro kuke aka na iriniema ijadufuo na uifari one ijiebuo duvado ijia nare e aesakae binobino ijia kariva ije marejiakono kuae.
19 Areme Eburamekiro fari fuone ije bune una ari vakuma e fuone imejo ije kariva ijia usiae. Areme fune bu kaenamiana bune besu una are Biasiba ijia vae. Areme Eburame fune Biasiba ijia maza sibaneke ijia finoe.
E Neodo anafa fu tuanaema ijene
20-24 Eburame fu ijia fino ijia rade maza be bu ebe iviene fuone e Neodo bara Miruka ame eiti (8) fu tuanaema ijene kuarae. Ro ame ijiebuo ive ijeja boga ije e Uzi ro uviarafa fuone ije e Buzikina Kemuero e Aramedo asoe ijene. Ro e Kesetikina e Ezokina Firudasikina e Jidirafiki e Betuero bara Ribekado asoe ijene. Eburamedo uvia e Neodo bara Miruka fu ame uije eti (8) ijiege tuanae. Ro e Neo fu una bara Ruma bara ije fu fuefuo imeno ijiaki naenoga fu ame bino duaku tuanae. Ro ame amure ije Teba ro be ije Garami ro be ije e Tarasi ro iviene ije e Maka ijene tuanae.