24
E Isureroko bu una Godi vua kuaena avenamiva ijene
1 Areme Josua fune e Isureroko ijiebuo agane boeje tuero (12) ije kiamo bu are Sekemi ijia besu afui. Fu e Isureroko ijiebuo e maki ro e mamekanu buone ijiakina e koto fievo ro e ifiki buone ije kiavo bu una E Ireobo ijadufuo nidua ijia besu afui.
2 Bu afuivoga Josua fune urina e boeje vua ijiege kuariae. Fu kiae, E Ireobo e Isureroko ijiebuo Godi ije fu ijiege kuae, Isuibe asaerafa jone ijiakina asae jone be e Tera Aburamekiro Neobuo asoe ije bu do Iufuretisi irifo ijia karinoeva bu godi kufui ijene baname isoekinu arorianoe.
3 Rove nare asoe jone e Aburame are do irifo fu finoeno ijia mesirina keke are Keinani vae. Areme nare daro mavoga e uine fuone fuka ma uruvana rei.
4 Nare Aburame ifejavoga fu fari fuone e Aeseki biete areme juaevasia uruvana furiko na kuke e Aeseki ifejavoga fu anafa inokiro e Jekafukiro Iso ijene nafei. Areme na uri aesakae Sia uruo irifo ije abena e Iso mae. Ro e Jekafu fu farirafa fuone ije fu kaenamiana aesakae Ijifiti ijia ari vae.
5 Areme na e Mosisikiro Eroni kiavo bu sakae Ijifiti ijia vakoga na duvado buone ijia irufui ka ise mamekanu ije e Ijifitiko ije vajia areme na asaerafa jone kaenamiana keke ruae.
6 Na kaenamiana ruoma do davare irifo ijia rovoga e Ijifitiko bu osekiro sarioti karina ja kame arafiria ruae. Bu nuvedia ruoma Do Kavuane nafuema irifo ijia usiae.
7 Rove asaerafa jone buka uri E Ireobo na kumevoga na ifejiana karauniae. Nare titutema ije kuavoga fu e Ijifiti ijiakiro asaerafa jone ijiebuo ukua ijia nae. Areme nare kuke do davare ije kuavoga fu e Ijifitiko ije okuriamoga jane ni jone ijia gae. Nare ijiege rei areme kaenamia romoga ja juaevasia ma uruvana aesao ijia karinoe.
8 Ro kuke nare ja kaenamiana e Amoraetiko ijiebuo aesakae ije bu do Jodeni irifo maza ajiamo nake kariva ijia vae. Ja ijia vakoga bu jaena bijae rove naka nare ifejiavoga ja iraraena e boeje kania furi areme aesakae buone ije kei.
9 Ro e Moabiko ijiebuo kini Beraki e Zifodo fari ije fuka e Isureroko ije jaena bijaekiro samuae. Ijadufuo fu urina Berame e Biodo fari ije kumeno fu e Isureroko ije ja kuravajiana vafiakiro ruae.
10 E Berame fu na baname isoena kumenoga na naebe fiena ifejae. Rove naka vierafe fuone ije dabe dakudevoga fu una ja daro miakinu vua ma ijiaru joesina kuaemoga na karauniavo ja irufui ije daoveabue.
11 Areme jane uri do Jodeni tuana are Jeriko ijia vae. Ro e Jeriko ro Amoraeti ijiakiro e Ferizaeti ro Kenanaeti ijiakiro e Itaeti ro e Gegasaeti ijiakina e Ivaeti ro Jebusaetiko ije bu jaena bijaekuae ruae. Rove na nare ifejiavoga jaka jare giriesana iraraevoga bu subinae vae.
12 Ro ja jare daro jone ijia e boeje ijiakiro e Amoraetiko ijiebuo kini inokiro ije juvuamagu jone ijia buina bijaena kaniaeva baki. Ro na nare ude vakoga e ani jone buka ijadufuo ireobo jumekinu ro ka totenamikoga ja kaniakuriae.
13 Nare aesakae ije ja ijia juae meva baki ro kuke sidove ije ja ijia are saeva baki ijene vajiae. Ro jame are ijia karina ine vaeni juare ijiakiro ine orivi fo ije ja umui jone ijia oeva baki ijene inoeve.
14 Ijadufuo ni godi kufui ije asaerafa jone bu sakae Mesofotemia do irifo ro sakae Ijifiti ijia karina buone baname isoenoeva ijene kame garege korefo. Ro nika uri E Ireobo ije oetuakinu irinana fuefuo ijuebaki imefo.
15 Ro ja fu oetuakinu irinadufuo ije ja isediakuva ni ivia samadukua ja era oetuakinu irinadufuo ije kuaefo. Ja vierafe ja asaerafa jone ijiebuo godi kufui ije bu are Mesofotemia do irifo ijia karina buone baname isoeva ije baname isoekuva ni ijiege kuaefo. Ro kuke gaga ja e Amoraetiko ijiebuo godi kufui ije baname isoekuva ni ijiege kuaega na fiefo. Ro naeje na agane none boeje ijena no vierafe no nuvuosukua no uria E Ireobo ije oetuakinu irinakono kiae.
16 Josua fu vua ijiege kuariamoga e boeje bu urina kuae, No E Ireobo ije ijuogafana una godi kufui ijiebuo baname isoekuva fuka naebe marei.
17 Ijadufuo maeje fune Godi nuvuone ijare no asaerafa nuvuone ijena Ijifiti ijia karina ebuo moni baki imenoevoga fu ijia karaunuona kaenamuo keke ruae. Ro kuke fuka ire sumiki uruvana nidua nuvuone ijia rei. Fuka vame ijia aesakae boeje no asidiaejana ruaeva ijia mukoreigia samuaguokinu kaenamuo ruae.
18 Fune E Ireobo ijare nidua nuvuone ijia e aesakae uruvana ijia kariva ijiakiro e Amoraetiko ijene kaniakuriae. Ijadufuo nodua no vierafe noka E Ireobo ije oetuakinu irinake. Ijadufuo maeje fuje fuka ma Godi nuvuone.
19 Bu ijiege kuaevoga Josua fu kiae, Na vierafe ja fu oetuakinu irinadufuo ije jaka naebe mani. Ijadufuo maeje E Ireobo ije fuka Godi akae. Fu vierafe jaka maza boeje fu fuosukua fuone baname isoedufuo. Ro ja uria faememarena godi kufui ije buone baname isoekuva fuka defaruike. Ro kuke ise jone fube giana areke.
20 Ro ja E Ireobo ije ijuonena uri e ae binoko ijiebuo godi kufui ije buone baname isoekuva fuka ire ise ro vajae fiane bino vajiake. Fu ude ja fuka marejiae rove ja una ijiege rekuva fuka kaniaga jaka oe furikono kiae.
21 Rove e boeje buka una Josua kuae, No vierafe nobe ijiege rekiro noka una E Ireobo oetuakinu irinakono kuae.
22 E boeje bu ijiege kuaevoga Josua fu una kiae, Jane kojo ijifureki itire jone ijia E Ireobo irinakuae kuaevono kiae. Fu ijiege kuariamoga e boeje bu kuae, Ke ije noneka konuvuo kuaedo no ijiege rekono kuae.
23 Areme Josua fu kiae, Ja ijiege kuaevo ijadufuo nine iviama e ae binoko ijiebuo godi kufui ije ja buone baname isoevo ije nika kena mutu korefo. Ro oe jone ije ka kena una E Ireobo e Isureroko ijiebuo Godi ije vajano kiae.
24 Ro e boeje bu una Josua kuae, No vierafe noneka E Ireobo Godi nuvuone ijiaru fufuru oetuana irinakinu fuone baname isoekono kuae.
25 Ijadufuo Josua fune buina vua ijiege kuaena avenami. Areme fune uri e ijiebuo akae gikikimana bino bu ijia giakinu kenoedufuo ijene nae.
26 Fu akae ije amaeriama areme kena E Ireobo ijadufuo buki bu akae fuone isoeva ijia isoe. Ro akae boeje Josua fu isoema ije fu are Sekeme ijia isoe. Areme fune mune ma ireobo be abena ine sio zinume E Ireobo ijadufuo Are Muvuaka Akae ivuake ijia nijae.
27 Areme fune uri e boeje kiae, Mune ige fune vua irere E Ireobo fu no kuaruema ije fune fie. Ijadufuo ja oenoeno E Ireobo ijuegafakuva ja mune ije gavo ijia ja una vua irere jare kojo kuaeva ije vierafekono kiae.
Josua fu baronema ijene
28 Areme Josua fune e boeje kiamo bu una aesakae buone ijia vae.
29 Ro rade juaevasia uvani aderedi teni (110) ijiege furikoga Josua e Nanedo fari E Ireobo ijadufuo imeno ije fu baronei.
30 Fu baronemoga bu abe sakae fuone Timinate Sera ijia mako rui. Ro sakae ije fu Ifuremi nafare ije ireva ukua ijia ro fu Uruo Gesi manino ivuake ijia.
31 Ro maza ije Josuakiro e Isureroko ijiebuo e mamekanu bu ire boeje E Ireobo fu rega bu giavo ije bu uria kariva ijia E Isureroko buka E Ireobo ije mukoreigia oetuakinu vua fuone iriniae.
32 Ro sakae Sekeme ije fu e Jekafure moni uvani aderedi siruva ijia kena Amo e Sekemedo asoe ijadufuo fuaevei. Ro kuke e Josofudo ane E Isureroko bu are Ijifiti ijia karina usiae ruaeva ije bu kena ijia mako rui. Ijadufuo sakae ije fu e Josofudo uifari ijiebuo.
33 Ro e Eronido fari e Eriza fu baronemoga bu abe are Gibia aesakae Ifuremi uruo ijia mako rui. Ro sakae ije bu isuibe abena e Erizado fari e Finiasi maeva ijene.