2 FITA
2 Fitado Vua Amure
E Fitare una kuke fasi ige isoena e ma vierafevo ije bu dabe giegisana are irore igia karinoeva ije nijiae. Ijadufuo Fita fu fasi ige isoena vua ju kuariae ijadufuo maeje e gue bu vua kufui kuaevo ro vua isema kuaena kuae Jesu fube una ruako kuaevo. Ijadufuo Fita fu e ije ma vierafevo ije Jesudo vua maeje nijasiaekina buka giriesa irena ma vierafeke. Ro Jesu fu irerefuo maza fuone fu una ruadufuo ije abe biona vako ijadufuo maeje Godi fu vierafe e boeje buka oe kuderiaga rade Jesu fu ruake.
2 Fitado vua binobino fu isoema ijeja -
1:3-15 Godire no umui bijuona kema ijadufuo fu vierafe no konuvuo kena una fu vajadufuo ijene.
1:16-21 E ije Godido vua vierafena kuaevo ijiakina Afasero ije bu Jesusina kuaeva ije buka vua ma ijiaru kuaevo ijene.
2:1-22 E vua kufui menoevo ijiebuo Fita fu vua ju kuariaema ijene.
3:1-18 Jesu fu una ruomo ijene.
1
1 Na Saemoni Fita e Afasero ije Jesu Kuraesido imevo ije nare fasi ige isoe. Na isoena e ije ja noena besu ma vierafevo ije nijiave. Ro nuvuone izege no ma vierafevo ije fuka irerebareki. Ma vierafevo ije fu Jesu Kuraesi Godi nuvuone e ka maturaema fu e karauniamo ijare abena mue.
2 Ijadufuo na baname isoega ja Godikiro Jesu Kuraesi E Ireobo nuvuone ijiebuo vame ije mukoreigia gana vierafeke. Ja ijiege rekuva Godi fu maza boeje ja ma rejiana mukoreigia ifejiakinu samuagiaga ja kafaena karinoedufuo.
Godire ja umui tuaema ijadufuo ja urina vame fuone ijia kenoedufuo ijene
3 No Godi ma vierafeva ijadufuo fu daro fuone ijia ire boeje no kena ume igia ma karinoedufuo ijene vajue. Ro kuke fu vame izege no Godi oemaedufuo ijia karinoedufuo ije kena vajue. Ro fune fure no kumemado no sanaema fuone ijiakiro vame fuone maeje ije akaegue abekinu karive.
4 Ro Godi fune sanaema fuone ijiakiro daro fuone ijiebuo duvado ijia e ije no Godi ma vierafevo ire maeje fu vajuoko kuema ije kena vajue. Fu ijiege rekina no ire ise boeje e bu ume igia renoejo ije giana akariakinu oenoeke. Ro kuke noka vame fuone maeje akaegue abekina no izege fu fino nodua no ijiege karinoeke.
5-7 Ijadufuo janika giriesana fu ma vierafekinu mukoreigia e akae rena karinoekinu Godi izege fu kemo ije vierafefo. Ro kuke janika vajae jone fu oemaekiro ja vierafena renoejo ijia mukoreigia samuanamifo. Ro maza oe fiaegi bino ja biediakuva ije nika giriesana ma vierafekinu karinoefo. Ro kairafa jone bu Godi ma vierafevo ije oetuakinu marejafo.
8 Ja ire boeje na kuariaeva ije mukoreigia maza boeje mimata renoekuva kavene jone buka daro abeke. Ro ire boeje ja E Ireobo Jesu Kuraesido ive ijia renoejo ije jaka mukoreigia renoedufuo.
9 Ro e be erare fu naebe vame maeje ijieki ije kenoeno ije fuje ni fuone funeka titute ro kuzeima ijieki. Ijadufuo fu izege Kuraesi ise fuone fu soejaema ije gana vierafema baki ro fune totei.
10-11 Ijadufuo erafano nika giriesana Godido vame maeje na kuariavo ije mukoreigia vierafekinu ijia mimatana kenoefo. Ja ijiege kenoega e bu ijia gia areme vierafero jaeje ja e bino Godire kumena karauniamoro bu ijiege vierafeke. Ro ja maza boeje ijiege renoekuva jabe mamoena una ise bino renoeke. Ro rade ja oekuva E Ireobo Jesu Kuraesi e ije fu e boeje karauniamo ije fu ja oemarekinu anadiana kaenamiaga ja are fuone maeje fu samuamo ijia maza boeje karivake.
Irere bu nijasaeva ije maza boeje vierafedufuo ijene
12-13 Vua ige na kuariavo ije jane ude vierafena giriesa mimata kenoejo na ijene una kuariave. Ro i ije fu none ijadufuo na ige na uria fivo ijia giriesana ja soesoena kuariaga ja ire ijene mukoreigia vierafenoeke.
14-15 E Ireobo Jesu Kuraesi fu na iviama igiebo baronedufuo ije fune samadukua nijasie. Ijadufuo na giriesana vame ige nijasiaga ja vierafekina na baronevo ije ja ire ije jabe totedufuo.
E ije Jesu Kuraesido sanaema ije gaeva ijene
16 Ro maza ije no kuariana kia Jesu Kuraesi fu daro fuone ijiakuma una ume igia ruomono kiaeva ije no vua kufui kuariaeva baki. Ro vua ije noka vua ma ijene kuariae. Ijadufuo maeje none ni nuvuone ijia daro fuone ijiakiro fuone maeje sanaema ije none giae.
17-18 Ro maza ije Godi fu uruo akae ijia Fari fuone ije dabe aroena sanaema fuone ije abe maema ije no fuina ijia irekoga fu abena mae. Ro kuke none adane nuvuone ijia kena ire fiekoga Godido itire ka daroki ije fu kumei, Fari none besu ije naka fuone ireobo oemarevono kumemo none fie.
19 Ijadufuo iviama noka giriesana vua ije e Godido vua vierafena kuaevo bu isuibe kuaeva ije ma vierafeve. Ijadufuo jadua janika vua ije giriesana vierafefo. Ijadufuo maeje vua ije fu ire raete ije fu are titutema ijia sanamo ijieki. Ijadufuo vua ije fu ja ifejiaga ja vame ma ro ise ije mukoreigia giakinu ke vakuma mazani ireobo ije fu ruadufuo. Ro e Jesu Kuraesi fuje fuka ire zuvi ije fu ve irasekuvega ajiamo ijieki. Ijadufuo fure oe jone ijia sanana ifejiaga ja ire boeje Godi fu remo ije mukoreigia giana vierafeke.
20-21 Ro ire ije ka ma anuigi ja mukoreigia vierafedufuo ije igene. E ije Godido vua fiena una e gue kuarianoevo ije bu Godido Kavene ijare daro miaga bu kuaenoeve. Ro bu daro buone ijia ire ije rade rekuvejo ije kuariavo baki. Ro kuke e ije Godido vua nijasiavo ije bu daro buone ro vierafe buone ijia kena e nijasianoevo baki. Ro fune Godido Kavene ijare daro miaga bu Godido vua ije e nijasianoeve.