14
نادانَ گوَشیت: «هُداے نێست»
په سازگر و وش‌آوازانی سالارا. داوودئے زَبور.
1 نادان وتی دلا گوَشیت:
«هُداے نێست.»
اے پلیت اَنت و کارِش سِلّ و گَنده،
نێک‌کارے نێست.
2 هُداوند چه آسمانا بنی آدما چاریت
تان بگندیت بارێن داناے هست
که هُدائے شۆهازا اِنت.
3 سجّهێنان وتی راه گار داتگ،
هۆریگا پلیت بوتگ‌اَنت،
نێک‌کارے نێست،
یکّے هم نێست.
4 بدکار هچبر سرپدَ نبنت؟
اے منی کئوما اَنچشَ ورنت که مردم نگنَ ورنت و
هُداوندا هچ تئوارَ نکننت.
5 بله اۆدا وتی تُرسئے تها بُڈّنت،
چیا که هُدا گۆن پهرێزکارانی نَسل و پدرێچا اِنت.
6 شما سِتم دیستگێنانی شئوربندیان ریشکندَ کنێت،
بله هُدا اِشانی پناهگاه اِنت.
7 کَسے چه سَهیونا بیایات و اِسراییلا برَکّێنات.
وهدے هُداوند وشبهتیا په وتی کئوما پِرَ ترّێنیت،
آکوب گَل و بالَ بیت و اِسراییل شادهیَ کنت.