67
سجّهێن کئوم ترا ستا کناتنت
په سازگر و وش‌آوازانی سالارا. په سیمّی سازان. زَبورے. سئوتے.
1 هُدا مئے سرا مهربان بات، مارا برکت بدئیات و
وتی دێما په ما دْرپشان کنات، اۆشت...،
2 تانکه تئیی راه جهانا زانگ ببیت و
تئیی داتگێن رَکّێنگ سجّهێن کئومانی نیاما.
3 او هُدا! کئوم ترا ستا کناتنت،
سجّهێن کئوم ترا ستا کناتنت.
4 کئوم شادهی کناتنت و شادمانیئے گوانکا بجناتنت،
چیا که تئو کئومانی سرا په اِنساپ دادرسیَ کنئے و
جهانئے کئومانی رهشۆنَ بئے. اۆشت...
5 او هُدا! کئوم ترا ستا کناتنت،
سجّهێن کئوم ترا ستا کناتنت.
6 زمینا وتی بَر و سَمر داتگ،
هُدا، مئے هُدا، مارا برکت بدئیات.
7 هُدا مارا برکت بدئیات
تانکه زمینئے چار کُنڈ آییئے مزنیا شرپ بدئینت.