Mo꞉fo꞉s Andeb We Fo꞉l Eyo꞉
Tesalonaika
Kaluka꞉isalemo꞉ Sa꞉sa꞉liga꞉fo꞉
Asuluma꞉no꞉ towo꞉ we
Tesalonaika sa꞉s kaluka꞉isale a꞉no꞉ Ya꞉su Keliso a꞉ma꞉la꞉lo꞉ mia꞉nigab a꞉no꞉ dinafa mo꞉fanda asulo꞉. Kalu nolba꞉ sa꞉lakiyo꞉, Ya꞉suwa꞉ ho꞉leno꞉ fa꞉la꞉dowo꞉ ko꞉m a꞉la꞉sa꞉labiki, Folo꞉ Sales, Timoti iliyo꞉ Tesalonaika kaluka꞉isale ililo꞉ hala asulab a꞉no꞉ ko꞉lo꞉ digale fanda asuluma꞉ki sa꞉sa꞉lo꞉.
Fo꞉l e sa꞉lakiyo꞉ Ya꞉sulo꞉ mia꞉no꞉ ho꞉leno꞉ semo꞉fa꞉la꞉dowo꞉ka꞉ a꞉la꞉sio꞉. A꞉la꞉ta꞉ga꞉ ho꞉len a꞉no꞉ semo꞉fa꞉la꞉dowab amio꞉, elelo꞉ gola ba꞉ba꞉no꞉ kalu nowo꞉ fa꞉la꞉dota꞉ga꞉, Ya꞉su Keliso o꞉lia꞉ gis dia꞉ib.
Fo꞉l eyo꞉ kaluka꞉isalemo꞉ sa꞉lakiyo꞉, tilidabuwo꞉ halale kagayaki, hida꞉yo꞉ yab a꞉no꞉ dima꞉ki sio꞉. A꞉la꞉ta꞉ga꞉ inina꞉ma꞉la꞉yo꞉ dinafa tilidoma꞉ki, a꞉la꞉ta꞉ga꞉ nanog dia꞉no꞉wo꞉ mo꞉bo꞉suluma꞉ki, a꞉la꞉ta꞉ga꞉ kalu nol asuwa꞉foma꞉kiyo꞉, mo꞉fo꞉s we a꞉na sa꞉sa꞉liga꞉fo꞉.
1
Ili tilidabuwo꞉ halaido꞉ dowaki, mada o꞉m a꞉la꞉sio꞉
Fo꞉l ne, Saleso꞉, Timotiyo꞉ niliyo꞉ to we sa꞉sa꞉lakiyo꞉, Do Gode o꞉lia꞉ Alan Ya꞉su Keliso o꞉lia꞉ma꞉ kaluka꞉isale Tesalonaika sa꞉s usamilo꞉ sab o꞉mo꞉ sa꞉sa꞉liga꞉to꞉l. +Gode o꞉lia꞉ Alan Ya꞉su Keliso o꞉lia꞉ma꞉ ha꞉fo꞉ disa꞉lan man o꞉lia꞉ ha꞉sa mesa꞉no꞉ man a꞉no꞉lia꞉yo꞉ gi o꞉lia꞉ dofo꞉melea꞉ki, Godemo꞉ dulugu so꞉lo꞉l.
Ni nao i, gili tilidabuwo꞉ anayaki halaido꞉ fa꞉la꞉ndab a꞉la꞉ta꞉ga꞉ gegelebo꞉ ha꞉fo꞉ disa꞉lan man a꞉no꞉lo꞉ gi usamio꞉ alan dowa꞉i ha꞉nab ko꞉lo꞉ niliyo꞉ ho꞉leno꞉ tambo Godemo꞉ mada o꞉m a꞉la꞉sa꞉la꞉mela꞉niki. A꞉la꞉do꞉ dimida꞉mela꞉no꞉wo꞉ mada nafayo꞉ o꞉m. +Hida꞉yo꞉ o꞉lia꞉ nagalo꞉ o꞉lia꞉yo꞉ gilo꞉wa fa꞉la꞉dowa꞉lab amio꞉, gio꞉ halale kagayaki, tilidabuwo꞉ o꞉ta꞉li sen ko꞉lo꞉ nio꞉ sa꞉s nola ha꞉nakiyo꞉, gio꞉ a꞉la꞉dimida꞉lab a꞉la꞉liki, gili wiyo꞉ wabulu sa꞉la꞉lab.
Giliyo꞉ a꞉la꞉dimido꞉ ko꞉lo꞉ Gode eyo꞉ kaluka꞉isale digalo꞉le aloba꞉da꞉sen a꞉la꞉bo꞉ fanda wida꞉lab. Gio꞉ Godeya꞉ enedo꞉ bo꞉fo꞉lab usa silikiyo꞉, hida꞉yo꞉ ko꞉li ko꞉lilo꞉wo꞉ dia꞉lab ko꞉lo꞉, gio꞉ a꞉na mesa꞉no꞉wo꞉ o꞉li ko꞉lo꞉lab a꞉la꞉liki wido꞉. +Gode eyo꞉ digalo꞉le mo꞉walila꞉sen ko꞉lo꞉, kalu abeyo꞉ gimo꞉lo꞉ hida꞉yo꞉lo꞉ dimia꞉lab o꞉mo꞉wo꞉ Gode eyo꞉ kalu a꞉no꞉ wa꞉deaki hida꞉yo꞉wo꞉ dimia꞉ib. +Hida꞉yo꞉lo꞉ dia꞉lab gi a꞉no꞉ a꞉la꞉ta꞉ga꞉ nio꞉lo꞉ Gode eyo꞉ ha꞉salo꞉ mesa꞉no꞉wo꞉ ko꞉lo꞉ dimia꞉ib. Ya꞉su Alan e Hebene a꞉la꞉ta꞉ga꞉ handalowakiyo꞉, ene ma꞉mula꞉ kalu halaido꞉ o꞉lia꞉ de wa꞉sowa o꞉lia꞉lo꞉ yab a꞉namio꞉ ha꞉salo꞉ mesa꞉no꞉wo꞉ a꞉na dimia꞉ib. +Kaluka꞉isale abeyo꞉ Godelo꞉ mo꞉asula꞉sen a꞉no꞉lia꞉ Ya꞉su Alana꞉ to nafalo꞉ mo꞉kudu ane a꞉no꞉lia꞉yo꞉, Eyo꞉ a꞉na wa꞉deaki falasila꞉ma꞉ib. +Imo꞉lo꞉ falasila꞉ma꞉no꞉wo꞉ we. Iyo꞉ Ya꞉su Alan o꞉lia꞉ ene halaido꞉ alan a꞉no꞉lia꞉ma꞉ anib amio꞉ mo꞉mesea꞉ki, ko꞉na꞉le ta꞉fa꞉ib. Gode eyo꞉ iyo꞉ mogagilaki, falasilo꞉ a꞉naka dofo꞉ ha꞉na꞉melea꞉ki ta꞉fa꞉ib. 10  +Ya꞉su Alan elo꞉ yab ho꞉len a꞉namio꞉, tilidabu kaluka꞉isale enedo꞉ da꞉feyo꞉ i a꞉ma꞉yo꞉ Ya꞉su Alano꞉ wabudakiyo꞉, molo asuluma꞉ib. Nililo꞉ gimo꞉lo꞉ wido꞉ a꞉no꞉ giliyo꞉ tilidabu ko꞉lo꞉ gio꞉lo꞉ i o꞉lia꞉ ua gasama꞉ib.
11-12  +Nili Gode o꞉lia꞉ Ya꞉su Keliso Alan o꞉lia꞉ma꞉yo꞉ nio꞉ kanulu alifa꞉ ko꞉lo꞉, Ya꞉suwa꞉lo꞉ mela꞉no꞉ gilo꞉ amilo꞉ dimido꞉ a꞉ma꞉yo꞉ ene wiyo꞉ ko꞉lo꞉ wabudabikiyo꞉, Ya꞉su eyo꞉ gili wiyo꞉lo꞉ wabuluma꞉kiyo꞉, niliyo꞉ ho꞉leno꞉ tambo gio꞉ Godemo꞉ dulugu sa꞉la꞉sen. Godeya꞉lo꞉ gimo꞉lo꞉ man nafa dimidama꞉kilo꞉ ho꞉ido꞉ a꞉no꞉ ililima꞉ki, dulugu sa꞉la꞉sen. A꞉la꞉ta꞉ga꞉ man nafa gililo꞉ dimidama꞉no꞉ asulan a꞉no꞉lia꞉, Godeya tilida꞉da꞉sa꞉ga꞉ ilikilo꞉ nanog dimidama꞉no꞉ a꞉no꞉lia꞉yo꞉, Godeya꞉ ene halaido꞉wa꞉yo꞉ gio꞉ asuwa꞉foma꞉ki, dulugu sa꞉la꞉sen.
+ 1:2 Lom 1.7 + 1:4 2Kol 7.4, 1Tes 2.19 + 1:6 Lom 12.19 + 1:7 1Tes 3.13 + 1:8 Ais 66.15 + 1:9 Ais 2.10 + 1:10 Kolo 3.4 + 1:11-12 Kolo 1.9, 1Tes 1.2-3