Mo꞉fo꞉s Agel We
Yo꞉n
E Sa꞉sa꞉lo꞉
Asuluma꞉no꞉ towo꞉ we
Kalu bugo꞉lo꞉ sa꞉sa꞉lo꞉ we, Yo꞉n. E Ya꞉suwa꞉lo꞉ tili wido꞉ kalu kugula꞉fo꞉wo꞉ nowo꞉ e. E ko꞉go꞉do꞉ ulula꞉liabiki, mo꞉fo꞉s we tilidabu kaluka꞉isalemo꞉wo꞉ agelema꞉ki, sa꞉sa꞉lo꞉.
Mo꞉fo꞉s sa꞉sa꞉lo꞉ wenamio꞉, asulo꞉wo꞉ a꞉la꞉ da꞉labiki, asulo꞉ dima꞉ki, mo꞉fo꞉s we a꞉na sa꞉sa꞉lo꞉. To nowo꞉ we, nio꞉ Gode o꞉lia꞉ ene inso꞉ Ya꞉su Keliso o꞉lia꞉yo꞉ ha꞉fo꞉ disa꞉la꞉sa꞉ga꞉ asulo꞉wo꞉ imilise doma꞉ki, a꞉la꞉ta꞉ga꞉ tilidabu kaluka꞉isalemo꞉ ha꞉fo꞉ disa꞉ma꞉ki, to we Yo꞉na꞉yo꞉ a꞉na sa꞉sa꞉lo꞉. To andebo꞉ we, kaluka꞉isaleyo꞉ kaluwa꞉lo꞉ madali godeya꞉ man walasa꞉lakiyo꞉ wida꞉lab a꞉namio꞉ mo꞉tilidabuma꞉ki, a꞉la꞉ta꞉ga꞉ to we a꞉na alobana wido꞉. Kalu a꞉ma꞉ sa꞉lakiyo꞉, “Godeya꞉ ene So꞉wa Ya꞉su a꞉no꞉, kalu ni o꞉ngo꞉wo꞉ mo꞉fa꞉la꞉dowan” a꞉la꞉sio꞉. To we hala sa꞉labiki, Yo꞉n eyo꞉ da꞉da꞉sa꞉ga꞉, kaluka꞉isaleyo꞉ to wenamio꞉ mo꞉kudu hamana꞉ki, mo꞉fo꞉s we a꞉na sa꞉sa꞉lo꞉.
1
To Mela꞉no꞉ a꞉no꞉ kalaba fa꞉la꞉dowo꞉
+To mela꞉no꞉lo꞉ a꞉lab a꞉no꞉ taminde amio꞉ elen ko꞉lo꞉ niliyo꞉ dabu. A꞉la꞉ta꞉ga꞉ ninin siya꞉ ba꞉da꞉sa꞉ga꞉, nili dagiya꞉yo꞉ golo꞉. To a꞉namio꞉ mela꞉no꞉wo꞉ a꞉lab ko꞉lo꞉, to weko꞉ niliyo꞉ gimo꞉wo꞉ walama꞉nigo꞉l. +Mela꞉no꞉ a꞉no꞉ kalule fa꞉la꞉dota꞉ga꞉ a꞉lab a꞉no꞉ ninin ba꞉da꞉sa꞉ga꞉, mela꞉no꞉ mela꞉no꞉ we gimo꞉wo꞉ a꞉na walaso꞉lo꞉l. Tamin amio꞉ e iya o꞉lia꞉ elen ko꞉lo꞉, o꞉go꞉ nilo꞉ amio꞉ kalaba fa꞉la꞉dowo꞉. Gio꞉ ni o꞉lia꞉ ege doma꞉ki, nililo꞉ ba꞉ba꞉ o꞉lia꞉ nililo꞉ dabu a꞉no꞉lia꞉yo꞉ gimo꞉wo꞉lo꞉ a꞉na walaso꞉lo꞉l. A꞉la꞉ta꞉ga꞉ nio꞉ Gode o꞉lia꞉ Inso꞉, Ya꞉su Keliso o꞉lia꞉yo꞉ ege dowa꞉sen. +A꞉la꞉fo꞉ko꞉lo꞉ sagalo꞉ nililo꞉wo꞉ alan doma꞉ki, mo꞉fo꞉s we a꞉na sa꞉sa꞉lo꞉.
Nio꞉ Godeya꞉ ho꞉lena doma꞉niki
+To we Ya꞉suwa꞉yo꞉ malolabikiyo꞉, nio꞉ dabu ko꞉lo꞉ gimo꞉wo꞉ a꞉na sa꞉ma꞉nigo꞉l. Gode e ho꞉len nafa malilo꞉ ko꞉lo꞉ mogago꞉ imilig nowo꞉ e amio꞉ mada aundo꞉ma. +Niliyo꞉ to sa꞉lakiyo꞉, “Ne Gode o꞉lia꞉ ha꞉fo꞉wo꞉ disa꞉” a꞉la꞉sa꞉laki ko꞉sega, nio꞉ mogago꞉wo꞉ dimida꞉liki, sololi o꞉ngo꞉wa sia꞉lalega, to nililo꞉ sio꞉ a꞉ma꞉yo꞉ ninino꞉ madalilo꞉ sa꞉lan kalu dowab. A꞉la꞉fo꞉ko꞉lo꞉ Godeya꞉ to man hendeleyo꞉ niliyo꞉ mo꞉kudu ha꞉na꞉lab. Ko꞉sega Gode e, man nafale dimida꞉liki, malilo꞉ ho꞉lena a꞉lab ko꞉lo꞉, nio꞉ e dowo꞉ o꞉leo꞉ngo꞉ dowalega, negelebo꞉ ege doma꞉ib. A꞉la꞉ta꞉ga꞉ Godeya꞉ ene So꞉wa Ya꞉suwa꞉ ho꞉bo꞉ a꞉ma꞉yo꞉ nili mogago꞉ dimido꞉ a꞉no꞉ halaliki, nio꞉ malilo꞉ doma꞉ib. +A꞉la꞉fo꞉ko꞉lo꞉ kaluka꞉isale abeyo꞉, “Ne mogago꞉wo꞉ aundo꞉ma” a꞉la꞉sa꞉lalega, enena꞉ma꞉la꞉yo꞉ e mogago꞉lo꞉ mo꞉dimidan a꞉la꞉do꞉lo꞉le sa꞉lakigab ko꞉lo꞉, Godeya꞉ to hendeleyo꞉ e amio꞉ mo꞉da꞉lab. Nililo꞉ mogago꞉ dimido꞉ a꞉no꞉ foga꞉le sa꞉lalega, Gode eyo꞉ enedo꞉ to saefa꞉ o꞉leaumbo꞉ dimidama꞉ib. A꞉la꞉ta꞉ga꞉ Gode eyo꞉ man nafa digalo꞉ dimidaki, nili mogago꞉ dimido꞉ a꞉no꞉ hala꞉sa꞉ga꞉ ga꞉lilaliki, nio꞉ malilo꞉ ta꞉fa꞉ib. 10 Kaluka꞉isale abeyo꞉, “Ne mogago꞉wo꞉ mo꞉dimidan” a꞉la꞉sa꞉lalega, to a꞉la꞉do꞉ sa꞉lab a꞉ma꞉yo꞉ Godeyo꞉ madali tolo꞉ sa꞉lan kalu a꞉la꞉li sa꞉laki gab. A꞉la꞉fo꞉ko꞉lo꞉ Godeya꞉ to man a꞉no꞉ kalu a꞉ma꞉ asulo꞉ usamio꞉ mo꞉da꞉lab.
+ 1:1 Yo꞉n 1.1 + 1:2 Yo꞉n 1.14 + 1:4 Yo꞉n 16.24 + 1:5 1Tim 6.16, Ya꞉m 1.17 + 1:6 1Yo꞉n 2.4 + 1:8 Song 32.5, Sndn 28.13